AI Classes: మూడో తరగతి నుంచే ‘ఏఐ’ పాఠాలు: కేంద్రం

భారత విద్యా వ్యవస్థలో భారీ విప్లవాత్మక మార్పుకు కేంద్ర ప్రభుత్వం శ్రీకారం చుట్టింది. రాబోయే విద్యా సంవత్సరం నుండి పాఠశాల స్థాయి నుంచి ఉన్నత విద్యా స్థాయి వరకు అన్ని దశల్లో కృత్రిమ మేధస్సును (Artificial Intelligence – AI) ఒక భాగంగా చేర్చాలని నిర్ణయించింది. ఢిల్లీలో గురువారం జరిగిన ‘భారత్ బోధన్ ఏఐ కాన్‌క్లేవ్ 2026’లో కేంద్ర విద్యాశాఖ మంత్రి ధర్మేంద్ర ప్రధాన్ ఈ కీలక ప్రకటన చేశారు. విద్యార్థులకు ప్రాథమిక స్థాయి నుంచే సాంకేతిక పరిజ్ఞానంపై (AI Classes) అవగాహన కల్పించాలనే ఉద్దేశంతో 3వ తరగతి నుంచే ఏఐ యాక్సెస్‌ను అందుబాటులోకి తీసుకురానున్నట్లు ఆయన వెల్లడించారు.

దేశంలో అపారమైన యువశక్తి, మేధస్సు ఉందని.. ఇది ఏఐ (AI Classes) అభివృద్ధికి బలమైన పునాదిగా నిలుస్తుందని మంత్రి అభిప్రాయపడ్డారు. ఏఐని కేవలం ఒక సబ్జెక్టుగా మాత్రమే కాకుండా, విద్యార్థుల్లో పరిశోధనా దృక్పథాన్ని, సృజనాత్మకతను పెంపొందించే ఒక సాధనంగా ఉపయోగించుకోవాలని ప్రభుత్వం భావిస్తోంది. పరిశోధనలు, ఆవిష్కరణలు, కమ్యూనికేషన్ వ్యూహాల్లో ఏఐని అంతర్భాగం చేయడం ద్వారా భారత విద్యా వ్యవస్థను అంతర్జాతీయ ప్రమాణాలకు అనుగుణంగా తీర్చిదిద్దడమే లక్ష్యమని ఆయన పేర్కొన్నారు.

మారుతున్న కాలానికి అనుగుణంగా విద్యార్థులను భవిష్యత్తు సవాళ్లకు సిద్ధం చేయడంలో సాంకేతిక ఆధునికీకరణ ఎంతో అవసరమని ప్రభుత్వం భావిస్తోంది. ఈ దిశగా ప్రభుత్వం అన్ని ఏర్పాట్లు పూర్తి చేస్తోందని, ఏఐ రాకతో (AI Classes) విద్యా బోధనలో పెను మార్పులు సంభవిస్తాయని మంత్రి ఆశాభావం వ్యక్తం చేశారు. రాబోయే రోజుల్లో భారత్ ప్రపంచ ఏఐ హబ్‌గా ఎదగడంలో ఈ నిర్ణయం మైలురాయిగా నిలవనుంది. కొత్త తరం విద్యార్థులు కేవలం సాంకేతికతను వినియోగించుకునేవారు మాత్రమే కాకుండా, కొత్త ఆవిష్కరణలు చేసే స్థాయికి ఎదగాలని మంత్రి పిలుపునిచ్చారు.