Sudheer Babu: డిజిట‌ల్ ఎంట్రీకి రెడీ అయిన సుధీర్

టాలీవుడ్‌లో తనకంటూ ప్రత్యేకమైన గుర్తింపు సంపాదించుకున్న సుధీర్ బాబు(Sudheer Babu) ఇప్పుడు తన కెరీర్‌లో మరో కీలక మలుపు తీసుకుంటున్నాడు. వరుసగా వైవిధ్యమైన పాత్రలను ఎంచుకుంటూ వస్తున్న ఆయన, ఈసారి డిజిటల్ రంగంలోకి అడుగుపెట్టేందుకు సిద్ధమయ్యాడు. ప్రముఖ డైరెక్ట‌ర్ ప్రవీణ్ సత్తారు(Praveen Sattaru) దర్శకత్వంలో రూపొందుతున్న ఓ భారీ వెబ్ సిరీస్‌తో సుధీర్ బాబు ఓటీటీ ఎంట్రీ ఇవ్వనున్నాడు. ప్రముఖ స్ట్రీమింగ్ ప్లాట్‌ఫార్మ్ అమెజాన్ ప్రైమ్ వీడియో కోసం రూపొందుతున్న ఈ ప్రాజెక్ట్‌పై ఇప్పటికే మంచి ఆసక్తి నెలకొంది.

గల్లీ(Gully) అనే టైటిల్‌తో తెరకెక్కుతున్న ఈ సిరీస్‌లో సుధీర్ బాబు పూర్తిగా కొత్త లుక్‌లో కనిపించబోతున్నట్లు సమాచారం. ఆయన గతంలో ఎప్పుడూ కనిపించని రఫ్ అండ్ రియలిస్టిక్ గెటప్ ఈ ప్రాజెక్ట్‌కు ప్రధాన ఆకర్షణగా నిలవనుందని టాక్. ముంబైలో జరుగుతున్న ప్రత్యేక కార్యక్రమంలో ఈ సిరీస్‌కు సంబంధించిన గ్లింప్స్‌ను రిలీజ్ చేయనుండగా, అదే వేదికపై అమెజాన్ ప్రైమ్ వీడియో(Amazon Prime Video) తమ ఫ్యూచ‌ర్ ప్రాజెక్ట్స్‌పై కూడా కీలక ప్రకటనలు చేయనుంది. దీంతో ఈ ఈవెంట్‌పై సినీ వర్గాల్లో ఆసక్తి మరింత పెరిగింది.

ఇంకా ఈ సిరీస్ జానర్, కథ నేపథ్యం, ఇతర నటీనటుల వివరాలు అధికారికంగా వెల్లడికాలేదు. అయితే సుధీర్ బాబు ఫిట్‌నెస్, యాక్షన్ ఇమేజ్‌కు సరిపోయే శక్తివంతమైన కథను ఎంపిక చేసినట్లు తెలుస్తోంది. ఇదే కాంబినేషన్‌లో గతంలో పుల్లెల గోపీచంద్(Pullela Gopichand) బయోపిక్ వస్తుందనే వార్తలు వినిపించగా, ఇప్పుడు ఈ వెబ్ సిరీస్‌తో ఆ కలయిక కొత్త దిశలో ప్రయాణం మొదలుపెట్టింది. ఈ ప్రాజెక్టు గురించి మరిన్ని వివరాల కోసం అభిమానులు ఆసక్తిగా ఎదురుచూస్తున్నారు.