బౌండ‌రీలు దాటుతున్న నాని

టాలీవుడ్‌లో నేచురల్ స్టార్ నాని(Nani) తన కెరీర్‌లో కొత్త ప్రయోగాలకు ఎప్పుడూ సిద్ధంగా ఉంటున్న హీరోగా గుర్తింపు పొందారు. ఇటీవల ఆయన చేసిన సినిమాలు కంటెంట్ పరంగా మంచి స్పందన తెచ్చుకున్నప్పటికీ, థియేటర్లలో మాత్రం పెద్ద స్థాయిలో వసూళ్లు సాధించలేకపోయాయి. ద‌స‌రా(Dasara) సినిమా మాత్రం మంచి ప్రదర్శనతో పెట్టుబడులను తిరిగి తెచ్చింది. అయితే నాని సినిమాలకు ఓటీటీ, సాటిలైట్ వంటి నాన్-థియేట్రికల్ హక్కుల ద్వారా భారీ డీల్స్ రావడం నిర్మాతలకు కొంత ఊరటనిస్తోంది.

ఇక ప్రస్తుతం నాని నటిస్తున్న ది ప్యార‌డైజ్ (The Paradise) భారీ బడ్జెట్‌తో తెరకెక్కుతోంది. ఈ సినిమాకు పని దినాలు పెరగడంతో పాటు విడుదల ప్రణాళికలు వాయిదా పడటం వల్ల ఖర్చులు మరింత పెరిగినట్లు ఇండస్ట్రీ వర్గాల్లో చర్చ జరుగుతోంది. ఇదే తరహాలో, డైరెక్ట‌ర్ సుజీత్‌(Sujeeth)తో నాని చేయబోయే బ్ల‌డీ రోమియో(Bloody Romeo) ప్రాజెక్ట్ ఆయన కెరీర్‌లోనే అత్యంత ఖరీదైన సినిమాగా మారనుందని సమాచారం. ఈ రెండు ప్రాజెక్టుల బడ్జెట్‌లు నాని ప్రస్తుత థియేట్రికల్ మార్కెట్‌ను మించినవిగా ఉన్నాయని ట్రేడ్ వర్గాలు అభిప్రాయపడుతున్నాయి.

ఒకవైపు ప్రేక్షకులకు ఉత్తమమైన సినీ అనుభవం అందించాలనే లక్ష్యంతో నాని ఈ భారీ ప్రాజెక్టులను ముందుకు తీసుకెళ్తుండగా, మరోవైపు నిర్మాతలపై ఆర్థిక ఒత్తిడి పెరుగుతోందన్న వాదనలు వినిపిస్తున్నాయి. కంటెంట్ మీద నమ్మకంతో ముందుకు సాగుతున్న నాని ఈ రిస్క్‌ను ఎలా బ్యాలెన్స్ చేస్తాడన్నది ఇప్పుడు ఆసక్తికరంగా మారింది. రాబోయే చిత్రాల ఫలితాలు ఆయన మార్కెట్‌ను మరింత విస్తరిస్తాయా లేక ఈ భారీ పెట్టుబడులు నిర్మాతలకు భారమవుతాయా అన్నది చూడాల్సి ఉంది.