భారత్‌లో రికార్డు స్థాయికి సైబర్ దాడులు.. డేటా బ్రీచ్‌ ఖర్చు రూ. 25.5 కోట్లు!

కృత్రిమ మేధ (ఏఐ) సాంకేతికతతో మనకు ఎన్ని కొత్త అవకాశాలు పెరుగుతున్నాయో, అదే స్థాయిలో సైబర్ ముప్పులు కూడా విపరీతంగా పెరిగిపోతున్నాయని ఐబీఎం ‘2026 కాస్ట్ ఆఫ్ ఎ డేటా బ్రీచ్’ తాజా నివేదిక సంచలన విషయాలను వెల్లడించింది. ఈ నివేదిక ప్రకారం, భారతదేశంలో ఒక్క డేటా బ్రీచ్ (Data Breach) వల్ల కంపెనీలకు కలుగుతున్న సగటు ఆర్థిక నష్టం రికార్డు స్థాయికి చేరుకుంది. గతేడాది ఈ నష్టం సగటున రూ. 22 కోట్లుగా ఉండగా, ఈ ఏడాది అది ఏకంగా 15.9 శాతం మేర పెరిగి రూ. 25.5 కోట్లకు చేరడం టెక్ వర్గాలను తీవ్ర ఆందోళనకు గురిచేస్తోంది. మారుతున్న ఆధునిక టెక్నాలజీని సైబర్ నేరగాళ్లు తమకు అనుకూలంగా మార్చుకుని కార్పొరేట్ కంపెనీల భద్రతా వలయాలను సులభంగా ఛేదిస్తుండటమే ఈ నష్టాల తీవ్రతకు ప్రధాన కారణమని రిపోర్ట్ స్పష్టం చేసింది.

దేశంలో జరుగుతున్న మొత్తం సైబర్ దాడులను (Data Breach) పరిశీలిస్తే, అత్యధికంగా 26 శాతం దాడులు కేవలం ఏఐ సాంకేతికత ఆధారంగానే జరుగుతుండటం గమనార్హం. దీని తర్వాతి స్థానాల్లో ఫిషింగ్ దాడులు 19 శాతం, డ్రైవ్-బై కాంప్రమైజ్ దాడులు 16 శాతం, అలాగే సప్లై-చైన్ దాడులు 15 శాతం మేర ప్రధాన ముప్పుగా పరిణమించాయి. అన్ని రంగాల కంటే ఆర్థిక సేవల (ఫైనాన్షియల్ సర్వీసెస్) రంగం సైబర్ దాడుల వల్ల అత్యంత తీవ్రంగా నష్టపోతోందని నివేదిక పేర్కొంది. ఈ రంగంలో ఒక్కో డేటా బ్రీచ్ వల్ల సంస్థలు అత్యధికంగా రూ. 40.9 కోట్ల భారీ నష్టాన్ని చవిచూస్తున్నట్లు ఐబీఎం డేటా వెల్లడించింది. హ్యాకర్లు కేవలం ఆర్థిక లావాదేవీలను, కస్టమర్ల సున్నితమైన బ్యాంకింగ్ డేటాను ప్రధాన లక్ష్యంగా చేసుకుని ఈ దాడులకు తెగబడుతున్నారని ఈ గణాంకాలు చెప్తున్నాయి.

అయితే, ఏఐ టెక్నాలజీ ఒకవైపు ముప్పుగా మారుతున్నప్పటికీ, సైబర్ రక్షణలో కూడా అది అత్యంత కీలక పాత్ర పోషిస్తోందని నివేదిక పేర్కొంది. తమ సంస్థలో సైబర్ భద్రత కోసం ఏఐ, సెక్యూరిటీ ఆటోమేషన్‌ను విస్తృతంగా అమలు చేసిన కంపెనీల్లో డేటా బ్రీచ్ (Data Breach) నష్టం సగటున రూ. 21.3 కోట్లకే పరిమితమైంది. కానీ ఎలాంటి ఏఐ భద్రతా వినియోగం లేని సంస్థల్లో ఈ నష్టం ఏకంగా రూ. 31.6 కోట్లకు చేరడం గమనార్హం. ఒక భారీ సైబర్ దాడిని ఎదుర్కొని నష్టపోయిన తర్వాత 73 శాతం సంస్థలు తమ భద్రతా వ్యవస్థలపై మరింతగా పెట్టుబడి పెట్టాలని కీలక నిర్ణయం తీసుకున్నట్లు నివేదిక తెలిపింది. భవిష్యత్తులో ఈ ఏఐ ఆధారిత సైబర్ ముప్పులను సమర్థవంతంగా ఎదుర్కొని వ్యాపార నష్టాలను అరికట్టాలంటే.. ముందస్తుగా సంఘటనల గుర్తింపు (Detection), దాడులపై వేగవంతమైన స్పందన (Response), ఏఐ ఆధారిత భద్రతా వ్యవస్థల ఏర్పాటుతో పాటు తమ ఉద్యోగులకు సైబర్ భద్రతపై కచ్చితమైన శిక్షణ ఇవ్వడం వంటి కీలక అంశాలపై సంస్థలు తక్షణమే పెట్టుబడులు పెంచక తప్పదని ఐబీఎం సూచించింది.