రష్యాపై అమెరికా ఆరోపణలు.. తమ ఆదేశాలను పాటించని

ఉక్రెయిన్‌పై కొద్ది నెలలుగా దాడులు చేస్తోన్న రష్యాపై అమెరికా తీవ్రమైన ఆరోపణలు చేసింది. తమ ఆదేశాలను పాటించని సైనికులను రష్యా చంపేస్తోందని అమెరికా అధ్యక్ష భవనం వైట్‌ హౌస్‌ ఆరోపించింది. ఇందుకు సంబంధించిన సమాచారం తమ దగ్గర ఉందని వెల్లడించింది. ఈ మేరకు వైట్‌హౌస్‌ అధికార ప్రతినిధి జాన్‌ కిర్బీ వెల్లడించారు. అంతేకాకుండా ఉక్రెయిన్‌పై ఫిరంగి దాడుల నుంచి వెనక్కి తగ్గాలని ప్రయత్నిస్తే ఆ యూనిట్‌ మొత్తాన్ని చంపేస్తామని రష్యన్‌ కమాండర్లు హెచ్చరిస్తున్నారనే సమాచారం కూడా తమవద్ద ఉందన్నారు. సరైన శిక్షణ లేని, ఆయుధాలు లేని యుద్ధానికి సిద్దంగాలేని వారిని రష్యా సమీకరించిందని జాన్‌ కిర్బీ పేర్కొన్నారు. పేలవ శిక్షణ పొందిన సైనికులను యుద్ధం లోకి పంపించి రష్యా తన వ్యూహాలను అమలు చేస్తోందన్నారు. ఈ క్రమంలో సైనికులను ఉరితీస్తామని బెదిరించడం అనాగరికమని విమర్శించారు. ఇవన్నీ చూస్తుంటే రష్యా సైనిక నేతల పేలవ పనితీరుకు నిదర్శనంగా కనిపిస్తున్నాయన్నారు. అయితే కీవ్‌కు అవసరమైన సాయాన్ని అందజేస్తున్నామన్నారు.