హర్భజన్తో తెగతెంపులు.. ఆ ‘చెంపదెబ్బ’తో కోటి రూపాయలు..!
- Published By: techteam
- April 25, 2026 / 02:50 PM IST
భారత మాజీ క్రికెటర్ ఎస్. శ్రీశాంత్ తాజాగా హర్భజన్ సింగ్పై విరుచుకుపడ్డాడు. 2008 ఐపీఎల్(IPL) సీజన్లో జరిగిన ప్రఖ్యాత ‘స్లాప్గేట్’ ఘటనను హర్భజన్(Harbhajan) తన వ్యాపార ప్రయోజనాల కోసం వాడుకుంటున్నాడని శ్రీశాంత్ తీవ్ర స్థాయిలో మండిపడ్డాడు. ఈ నేపథ్యంలోనే హర్భజన్తో తనకు ఉన్న అన్ని రకాల సంబంధాలను, స్నేహాన్ని పూర్తిగా తెంచుకుంటున్నట్లు ప్రకటించడం క్రికెట్ వర్గాల్లో పెను సంచలనం సృష్టిస్తోంది. శ్రీశాంత్ చేసిన ఆరోపణల ప్రకారం.. ఇటీవల ఒక ప్రముఖ అడ్వర్టైజ్మెంట్ కోసం హర్భజన్ సింగ్ ఆనాటి చెంపదెబ్బ ఘటనను ప్రతిబింబించేలా నటించాడట.
ఈ ఒక్క యాడ్ కోసం భజ్జీ సుమారు ఒక కోటి రూపాయల వరకు రెమ్యూనరేషన్ తీసుకున్నాడని శ్రీశాంత్ పేర్కొన్నాడు. తన జీవితంలో అత్యంత బాధాకరమైన మరియు అవమానకరమైన ఆ ఘటనను ఇలా కమర్షియల్గా వాడుకుని డబ్బు సంపాదించుకోవడాన్ని తాను ఏమాత్రం సహించలేనని స్పష్టం చేశాడు. ఇన్నేళ్లుగా వీరిద్దరూ స్నేహంగానే ఉన్నట్లు కనిపించినా, ఈ తాజా పరిణామంతో పాత గొడవలు మళ్ళీ మొదటికి వచ్చాయి. కేవలం డబ్బు కోసమే హర్భజన్ తన ఆత్మగౌరవాన్ని తాకట్టు పెట్టాడని, ఇలాంటి వ్యక్తితో స్నేహం కొనసాగించడం తనకు ఇష్టం లేదని శ్రీశాంత్ తేల్చి చెప్పాడు.
హర్భజన్ సింగ్ కేవలం డబ్బు కోసమే ఆనాటి చేదు జ్ఞాపకాలను మార్కెట్ చేసుకుంటున్నాడని, ఒక స్నేహితుడిని అవమానించేలా ఉన్న సీన్లను యాడ్లో ఎలా ఒప్పుకుంటారని శ్రీశాంత్ ప్రశ్నించాడు. గతంలో హర్భజన్ ఈ ఘటనపై పశ్చాత్తాపం వ్యక్తం చేస్తూ శ్రీశాంత్కు క్షమాపణలు చెప్పాడు. అయితే, ఇప్పుడు మళ్ళీ అదే ఘటనను కమర్షియల్ యాడ్స్ కోసం వాడుకోవడంతో.. ఆ క్షమాపణలు కేవలం నాటకమేనా అని శ్రీశాంత్ అనుమానం వ్యక్తం చేశాడు. ప్రస్తుతం సోషల్ మీడియాలో ఈ వార్త వైరల్ అవుతుండటంతో, హర్భజన్ సింగ్ దీనిపై ఎలా స్పందిస్తాడో చూడాలి.
