Musi: ఈ ప్రాజెక్టు ఎవరికీ వ్యతిరేకం కాదు : సీఎం రేవంత్

మూసీ(Musi) నదిని అభివృద్ధి చేసి పర్యాటక, అభివృద్ధి కేంద్రంగా తయారు చేసుకోవాల్సిన అవసరముందని, సమాజ పరిణామ క్రమంలో వస్తున్న అభివృద్ధిని అడ్డుకుంటే చరిత్ర క్షమించదని ముఖ్యమంత్రి రేవంత్ రెడ్డి (Revanth Reddy) వ్యాఖ్యానించారు. మూసీ ప్రాజెక్టు పునరుజ్జీవం, దానికయ్యే ఖర్చు సహా ప్రాజెక్టు వివరాలను తెలిపేందుకు హైదరాబాద్‌ లోని తాజ్ కృష్ణా హోటల్లో రేవంత్ మాట్లాడారు. చరిత్రను ఇప్పుడు తిరగరాయకపోతే ఎప్పటికీ రాయలేమన్న విషయం మూసీ అభివృద్ధిని అడ్డుకుంటున్న మేధావులకు అర్ధం కావడం లేదా? అని ప్రశ్నించారు. భవిష్యత్తు తరాల కోసం చేపట్టిన మూసీ పునరుజ్జీవన ప్రాజెక్టు విషయంలో ఏ పేదవాడికి అన్యాయం జరగనివ్వబోమని, ఏ పేద వ్యక్తిని నిరాశ్రయుడిని చేయబోమని, ఎవరి ఆస్తులను గుంజుకోబోమని స్పష్టం చేశారు. పేదలకు నష్టం, ఇబ్బంది కలిగించడానికి గానీ, రియల్ ఎస్టేట్ (Real Estate) ఆర్థిక ప్రయోజనాల కోసం ప్రజా ప్రభుత్వం పని చేయడం లేదని తేల్చి చెప్పారు.