Jagan: జూలై 3 ఉత్కంఠ నడుమ జగన్ నెల్లూరు టూర్‌..

వైఎస్ జగన్ మోహన్ రెడ్డి (Y.S. Jagan Mohan Reddy), జూలై 3న నెల్లూరు (Nellore) జిల్లాకు పర్యటనకు సిద్ధమవుతున్నారు. గత కొద్ది కాలంగా సైలెంట్ గా ఉన్న జగన్ ఇప్పుడు ప్రభుత్వంపై ప్రశ్నల వర్షం కురిపిస్తూ తిరిగి ఆక్టివ్ మోడ్ లోకి వస్తున్నారు. తాడేపల్లి (Tadepalli) నుంచి హెలికాప్టర్‌లో బయలుదేరి ఆయన నేరుగా నెల్లూరు చేరనున్నారు. అక్కడ జైలులో రిమాండ్‌లో ఉన్న పార్టీ సీనియర్ నాయకుడు, మాజీ మంత్రి కాకాణి గోవర్ధన్ రెడ్డిని (Kakani Govardhan Reddy) ములాకాత్ ద్వారా పరామర్శించనున్నారు. కాకాణి జగన్‌కు అత్యంత విశ్వాసపాత్రుడిగా పేరు గాంచిన నేత కావడంతో, ఆయన ఆరోగ్య పరంగా ఎలా ఉన్నారన్న విషయంలో వ్యక్తిగతంగా తెలుసుకోవడమే జగన్ ఉద్దేశం అని పార్టీ వర్గాలు చెబుతున్నాయి.

అయితే ఈ పర్యటన మొదలయ్యే ముందే వివాదాస్పదంగా మారుతోంది. హెలికాప్టర్ ల్యాండింగ్‌కి అనుమతులు తీసుకోవడం, తగిన స్థలాన్ని ఖరారు చేయడం వంటి దశల్లో వైసీపీకి అడ్డంకులు ఎదురవుతున్నాయని ఆరోపణలు వస్తున్నాయి. జగన్ ల్యాండ్ అవ్వాల్సిన ప్రైవేట్ స్థలాల యజమానులకు ఇతర పార్టీ నేతల నుంచి ఒత్తిళ్లు వస్తున్నట్లు సమాచారం. ముఖ్యంగా టీడీపీ (TDP) వర్గాలు తమ పార్టీకి అనుకూలంగా వ్యవహరించేవారిపై ప్రభావం చూపుతున్నారని వైసీపీ (YCP) ఆరోపిస్తోంది.

ఆసక్తికర విషయమేమిటంటే, గతంలో వైసీపీ నేతగా జగన్‌ను “దేవుడు”గా పొగిడి, ఆ తరువాత టీడీపీలో చేరిన నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి (Kotamreddy Sridhar Reddy) అనుచరులే హెలికాప్టర్ ల్యాండింగ్‌కు వ్యతిరేకంగా వ్యవహరిస్తున్నారని వైసీపీ వర్గాలు ఆరోపిస్తున్నాయి. అధినాయకత్వం కళ్లల్లో మెప్పు పొందడానికే ఇలాంటి అడ్డంకులు సృష్టిస్తున్నారని అభిప్రాయపడుతున్నారు.

ఇటీవల జగన్ పర్యటనలు కొన్ని చోట్ల ఉద్రిక్తతకు దారి తీసిన నేపథ్యంలో నెల్లూరు టూర్‌పైనా అదే ఆందోళన నెలకొంది. జూన్‌లో ఆయన ఒంగోలు జిల్లాలోని పొదిలి (Podili) మరియు గుంటూరు జిల్లాలోని రెంటపాళ్ల (Rentapalla) ప్రాంతాల్లో చేసిన పర్యటనలు హాట్ టాపిక్ అయ్యాయి. రెంటపాళ్లలో ఓ వృద్ధుడు ప్రమాదవశాత్తు మరణించగా, పొదిలిలో ఘర్షణలు చోటుచేసుకోవడంతో కేసులు నమోదయ్యాయి. ఇప్పుడు నెల్లూరు పర్యటన కూడా రాజకీయంగా టెన్షన్‌కు దారి తీసే సూచనలు కనిపిస్తున్నాయి. హెలికాప్టర్ ల్యాండ్ కానిచ్చే పరిస్థితి ఏర్పడినా, జగన్ రోడ్ మార్గంలో నెల్లూరు చేరతారని వైసీపీ వర్గాలు స్పష్టం చేస్తున్నాయి. తమ నాయకుడి దృఢ సంకల్పం ముందు ఎలాంటి ఆటంకాలూ నిలవవని పేర్కొంటున్నారు. జూలై 3న జరగబోయే ఈ పర్యటన ఎలా జరుగుతుందన్నది రాష్ట్ర రాజకీయాల్లో ఆసక్తికర అంశంగా మారింది.