లాస్ ఏంజిల్స్ వేదికగా ‘రామాయణ: రైజ్ ఆఫ్ ఎ లెజెండ్’ వరల్డ్ ప్రీమియర్ వేడుక

లాస్ ఏంజిల్స్: భారతీయ ఇతిహాస గాథను అంతర్జాతీయ స్థాయిలో ఆవిష్కరిస్తూ రూపొందిన ప్రతిష్ఠాత్మక చిత్రం ‘రామాయణ: రైజ్ ఆఫ్ ఎ లెజెండ్’ వరల్డ్ ప్రీమియర్ వేడుక అమెరికాలోని లాస్ ఏంజిల్స్ నగరంలో అత్యంత వైభవంగా జరిగింది. అకాడమీ మ్యూజియం ఆఫ్ మోషన్ పిక్చర్స్‌లోని ప్రఖ్యాత డేవిడ్ గెఫెన్ థియేటర్ వేదికగా జరిగిన ఈ ప్రతిష్ఠాత్మక కార్యక్రమానికి సీజీ శ్రీనివాస కేజే గౌరవ అతిథిగా హాజరై ప్రత్యేక ఆకర్షణగా నిలిచారు.

హాలీవుడ్ నడిబొడ్డున భారతీయ సంస్కృతి, ఇతిహాస వైభవాన్ని చాటిచెప్పిన ఈ వేడుకలో భారతీయ సినీ రంగానికి చెందిన పలువురు అగ్రతారలు సందడి చేశారు. చిత్ర ప్రధాన తారాగణం రణ్‌బీర్ కపూర్, సాయి పల్లవి, యష్‌లతో పాటు దర్శకుడు నితీష్ తివారీ, నిర్మాత నమిత్ మల్హోత్రా ఈ ప్రీమియర్‌కు విచ్చేశారు. వీరితో పాటు ప్రముఖ హాలీవుడ్ నటి జాడా పింకెట్ స్మిత్ మరియు అంతర్జాతీయ సినీ ప్రముఖులు, దర్శక నిర్మాతలు పెద్ద ఎత్తున పాల్గొని చిత్ర బృందానికి అభినందనలు తెలిపారు.భారతదేశపు గొప్ప ఇతిహాసాన్ని ఆధునిక సాంకేతికతతో, ప్రపంచ స్థాయి ప్రమాణాలతో తెరకెక్కించిన తీరుపై ప్రీమియర్ వేడుకలో ప్రశంసల వర్షం కురిసింది.

వాల్మీకి రామాయణం ఆధారంగా తెరకెక్కిన ఈ మొదటి భాగంలో రాముడి బాల్యం, సీతా స్వయంవరం, అరణ్యవాసం, సీతాపహరణం వంటి కీలక ఘట్టాలను చూపించారు. విడుదలైన మొదటి వారాంతంలోనే ప్రపంచవ్యాప్తంగా ₹500 కోట్ల మార్కును దాటి, మొదటి వారంలోనే ₹940 కోట్లకు పైగా గ్రాస్ వసూళ్లతో సంచలనం సృష్టించింది. ఐమ్యాక్స్ (IMAX) ఫార్మాట్‌లో, అత్యున్నత స్థాయి వీఎఫ్ఎక్స్ (VFX) సాంకేతికతతో అంతర్జాతీయ ప్రమాణాలకు అనుగుణంగా ఈ చిత్రాన్ని నిర్మించారు.ఈ కథకు కొనసాగింపుగా ‘రామాయణ: పార్ట్ 2’ రానుంది.