కడప జెడ్పీ పీఠం చిచ్చు.. ఆదినారాయణ రెడ్డి అసంతృప్తి వెనుక అసలు కారణం ఇదేనా..
వైఎస్ఆర్ కడప జిల్లా (YSR Kadapa District) రాజకీయాల్లో జిల్లా పరిషత్ చైర్మన్ పదవి కొత్త వివాదానికి తెరలేపినట్లు కనిపిస్తోంది. కూటమి పార్టీల మధ్య పదవుల పంపకం పూర్తయిన తర్వాత జమ్మలమడుగు బీజేపీ ఎమ్మెల్యే ఆదినారాయణ రెడ్డి (Adinarayana Reddy) తీవ్ర అసంతృప్తితో ఉన్నారనే ప్రచారం రాజకీయ వర్గాల్లో చర్చనీయాంశంగా మారింది. తాను ఆశించిన పదవి దక్కకపోవడంతో ఆయన కీలక నిర్ణయం తీసుకోబోతున్నారనే వార్తలు ఇప్పుడు జిల్లా రాజకీయాలను వేడెక్కిస్తున్నాయి.
కడప జిల్లా పరిషత్ చైర్మన్గా టీడీపీ (TDP) సీనియర్ నేత, మాజీ ఎమ్మెల్సీ పుత్తా నరసింహారెడ్డి (Putta Narasimha Reddy) పేరు ఖరారు కావడం ఆదినారాయణ రెడ్డికి నచ్చలేదని సమాచారం. ఈ పదవిని తన సోదరుడి కుమారుడు, డాక్టర్ చదిపిరాళ్ల రాజేష్ రెడ్డి (Rajesh Reddy)కి ఇప్పించాలని ఆయన కొంతకాలంగా ప్రయత్నిస్తున్నట్లు ప్రచారం జరుగుతోంది. ఈ విషయంలో తనకు సానుకూల సంకేతాలు కూడా అందాయని ఆయన వర్గీయులు భావించినట్లు తెలుస్తోంది. అయితే చివరి దశలో కూటమి నేతలు తీసుకున్న నిర్ణయం ఆయన అంచనాలకు భిన్నంగా ఉండటంతో అసంతృప్తి పెరిగిందని రాజకీయ వర్గాల్లో చర్చ సాగుతోంది.
కూటమి పార్టీల మధ్య జిల్లా పరిషత్ చైర్మన్ పదవుల కేటాయింపులో భాగంగా బీజేపీకి (BJP) కృష్ణా జిల్లా పీఠం దక్కగా, కడప చైర్మన్ పదవిని టీడీపీకి కేటాయించినట్లు తెలుస్తోంది. దీంతో పుత్తా నరసింహారెడ్డి ఎంపికకు మార్గం సుగమమైంది. అయితే ఈ నిర్ణయంతో ఆదినారాయణ రెడ్డి వర్గం తీవ్ర నిరాశకు గురైందని ప్రచారం జరుగుతోంది. పదవి విషయంలో తన ప్రతిపాదనకు ప్రాధాన్యం ఇవ్వలేదనే భావన ఆయనలో అసంతృప్తికి కారణమైందని సమాచారం.
చైర్మన్ ఎంపికపై స్పష్టత వచ్చిన తర్వాత ఆదినారాయణ రెడ్డి తన అనుచరులతో కలిసి విజయవాడ (Vijayawada)కు వెళ్లినట్లు వార్తలు వస్తున్నాయి. కడపలో జరిగిన ప్రమాణస్వీకార కార్యక్రమానికి ఆయన హాజరుకాకపోవడం కూడా ఈ ప్రచారానికి మరింత బలం చేకూర్చింది. అక్కడ తన మద్దతుదారులతో భవిష్యత్ రాజకీయ కార్యాచరణపై చర్చించినట్లు సమాచారం. అంతేకాదు, జమ్మలమడుగు, ముద్దనూరు, ఎర్రగుంట్ల ప్రాంతాలకు చెందిన కొందరు జడ్పీటీసీ సభ్యులు కూడా తమ పదవులకు రాజీనామా చేసే ఆలోచనలో ఉన్నారనే ప్రచారం వినిపిస్తోంది. అయితే ఈ పరిణామాలపై అధికారికంగా స్పష్టత రావాల్సి ఉంది.
ఇవి కూడా చదవండి
ఆదినారాయణ రెడ్డి రాజకీయ ప్రయాణం కూడా ఆసక్తికరంగా సాగింది. 2014 ఎన్నికల్లో వైసీపీ తరఫున విజయం సాధించిన ఆయన, అనంతరం టీడీపీలో చేరి మంత్రిగా పనిచేశారు. ఆ తర్వాత 2024 ఎన్నికల్లో బీజేపీ అభ్యర్థిగా జమ్మలమడుగు నుంచి పోటీ చేసి గెలుపొందారు. జిల్లాలో పార్టీ బలోపేతానికి కీలకంగా వ్యవహరించిన నాయకుడిగా ఆయనకు గుర్తింపు ఉంది.
ఇలాంటి సమయంలో జడ్పీ చైర్మన్ పదవి విషయంలో ఎదురైన పరిణామాలు కూటమిలో అంతర్గత విభేదాలకు దారితీస్తాయా? ఆదినారాయణ రెడ్డి నిజంగానే రాజీనామా దిశగా అడుగులు వేస్తారా? లేక పార్టీ పెద్దలతో చర్చల ద్వారా ఈ అసంతృప్తి సద్దుమణుగుతుందా? అనేది ఇప్పుడు ఆసక్తికరంగా మారింది. ఈ వ్యవహారంపై ఆయన నుంచి అధికారిక ప్రకటన వస్తేనే పూర్తి స్పష్టత వచ్చే అవకాశం ఉంది.







