Aruna Nidigunta: నెల్లూరు లేడీ డాన్ నిడిగుంట అరుణ అరెస్ట్..!!

నెల్లూరు జిల్లాలో లేడీ డాన్‌గా (Lady Don) పేరొందిన నిడిగుంట అరుణ (Nidigunta Aruna) అరెస్ట్ పై ఏపీలో జోరుగా చర్చ సాగుతోంది. కోవూరు (Kovuru) పోలీసులు అరుణతో పాటు మరో ముగ్గురిని అరెస్టు చేశారు. ఇది నెల్లూరు (Nellore) జిల్లా రాజకీయ, పోలీసు వర్గాల్లో కలకలం రేపుతోంది.

నెల్లూరు జిల్లా కోవూరు పోలీస్ స్టేషన్‌లో అరుణ నిడిగుంటపై కేసు నమోదైంది. భారతీయ న్యాయ సంహిత (BNS) సెక్షన్లు 127(2), 140(3), 308(5), 115(2) r/w 3(5) కింద ఈ కేసు రిజిస్టర్ అయింది. అరుణతో పాటు ఆమె భర్త పల్లం వేణు (A2), అంకెం రాజ్ (A3), సీరం ఎలిష (A4)లను కూడా ముద్దాయిలుగా పేర్కొన్నారు. మునగ వెంకట మురళీ కృష్ణమోహన్ ఇచ్చిన ఫిర్యాదు ఆధారంగా ఈ కేసు నమోదైంది. అరుణతో పాటు ఆమె సహచరులు ఒక అపార్ట్‌మెంట్‌లో ప్లాట్‌ను అద్దెకు తీసుకుని, దానిని అక్రమంగా రిజిస్ట్రేషన్ చేయమని మురళీ కృష్ణను కత్తితో బెదిరించారు. దీనిపై మురళీకృష్ణ ఇచ్చిన ఫిర్యాదు మేరకు కేసు నమోదైంది. ఈ కేసులో అద్దంకి టోల్ ప్లాజా వద్ద విజయవాడ వైపు వెళ్తున్న అరుణను పోలీసులు అరెస్టు చేశారు. అరెస్టు తర్వాత, అరుణను కోవూరు పోలీస్ స్టేషన్‌కు తరలించి, వైద్య పరీక్షలు నిర్వహించిన అనంతరం నెల్లూరు కోర్టుకు హాజరుపరిచారు.

అరుణ నిడిగుంట ఒక బోటిక్ యజమానిగా తన వృత్తిని ప్రారంభించినప్పటికీ, ఆమె రౌడీ షీటర్ శ్రీకాంత్‌తో సంబంధాల వల్ల లేడీ డాన్ గా ఎదిగిందనే ఆరోపణలు ఉన్నాయి. శ్రీకాంత్ నెల్లూరు జైలులో జీవిత ఖైదు అనుభవిస్తున్న ఒక రౌడీ షీటర్. అరుణ అతనితో సన్నిహిత సంబంధాలు కలిగి ఉంది. శ్రీకాంత్ పేరును ఉపయోగించి అరుణ అనేక సెటిల్‌మెంట్‌లు, బెదిరింపులు, ఆర్థిక లావాదేవీలలో పాల్గొన్నట్లు ఆరోపణలు ఉన్నాయి. ఆమె శ్రీకాంత్‌కు పెరోల్ సంపాదించడంలో కీలక పాత్ర పోషించినట్లు చెబుతున్నారు, ఇందులో జిల్లాకు చెందిన కొంతమంది ప్రజాప్రతినిధులు, పోలీసు అధికారుల సహకారం ఉందని ఆరోపణలు ఉన్నాయి.

కొన్ని రోజులుగా అరుణపై మీడియాలో జోరుగా కథనాలు వెలువడుతున్నాయి. దీంతో అరుణ సోషల్ మీడియాలో ఒక వీడియోను విడుదల చేసి, తన వద్ద ప్రభావవంతమైన వ్యక్తులకు సంబంధించిన సున్నితమైన సమాచారం ఉందని, తనను వేధిస్తే ఆ సమాచారాన్ని బహిర్గతం చేస్తానని బెదిరించింది. ఈ వీడియోలో ఆమె పోలీసులు తనను లక్ష్యంగా చేసుకుని వేధిస్తున్నారని కూడా ఆరోపించింది.

శ్రీకాంత్ ఒక జీవిత ఖైదీగా ఉన్నప్పటికీ భారీగా సెటిల్‌మెంట్‌లను నడిపినట్లు ఆరోపణలు ఉన్నాయి. అరుణ, శ్రీకాంత్‌కు మద్దతుగా నిలిచి అతని పేరును ఉపయోగించి బెదిరింపులు, ఆర్థిక లావాదేవీలలో పాల్గొన్నట్లు చెబుతున్నారు. ఇటీవల, శ్రీకాంత్‌తో ఆమె ఆసుపత్రిలో సరసాలాడుతున్న వీడియోలు సోషల్ మీడియాలో వైరల్ అయ్యాయి. ఇది ఆమెపై ఉన్న దృష్టిని మరింత పెంచింది. శ్రీకాంత్‌కు పెరోల్ సంపాదించడంలో అరుణ పాత్ర కూడా వివాదాస్పదంగా మారింది. ఆమె హోం సెక్రటరీ కార్యాలయం నుండి పెరోల్ ఆర్డర్‌లను సంపాదించినట్లు తెలుస్తోంది. స్థానిక ఎస్పీల అభ్యంతరాలను పట్టించుకోకుండా పేరోల్ పొందినట్లు తెలుస్తోంది. ఈ విషయంలో ఉన్నత స్థాయి అధికారుల సహకారం ఉందనే ఆరోపణలు ఈ కేసును మరింత సంక్లిష్టం చేశాయి.

అరుణ గతంలో సూళ్లూరుపేట (SC) నియోజకవర్గం నుండి స్వతంత్ర అభ్యర్థిగా పోటీ చేసినట్లు సమాచారం ఉంది. ఆమెకు రాజకీయ నాయకులతో సన్నిహిత సంబంధాలు ఉన్నాయి. టీడీపీ ఎమ్మెల్యే సోమిరెడ్డి చంద్రమోహన్ రెడ్డి, అరుణ తన వద్దకు శ్రీకాంత్ పెరోల్ కోసం వచ్చినప్పటికీ, తాను సంతకం చేయలేదని వెల్లడించారు. మరోవైపు శ్రీకాంత్ పేరోల్ రద్దుపై హోంమంత్రి అనిత స్పందించారు. ఈ వ్యవహారంపై పూర్తిస్థాయి విచారణకు ఆదేశించారు.