బాబాయి పార్టీకి అలేఖ్యా రెడ్డి మద్దతు.. టీడీపీకి షాక్ ఇవ్వబోతున్నారా..

ఆంధ్రప్రదేశ్ (Andhra Pradesh) రాజకీయాల్లో మరో కొత్త అధ్యాయం మొదలైంది. మాజీ వైసీపీ (YSRCP) ఎంపీ విజయసాయిరెడ్డి (Vijayasai Reddy) కొత్త పార్టీని ప్రకటించడంతో రాష్ట్ర రాజకీయాల్లో ఆసక్తికర చర్చ మొదలైంది. ఇప్పటికే కుల సమీకరణాలు, ప్రాంతీయ రాజకీయాల చుట్టూ తిరుగుతున్న ఏపీ రాజకీయాల్లో ఆయన కొత్త పార్టీ ఎలాంటి ప్రభావం చూపిస్తుందనేది ఇప్పుడు చర్చనీయాంశంగా మారింది. యువత, జెన్ జెడ్ (Gen Z), బడుగు బలహీన వర్గాలకు ప్రాధాన్యం ఇస్తూ రాజకీయాల్లో మార్పు తీసుకొస్తానని విజయసాయిరెడ్డి ప్రకటించారు. ఈ లక్ష్యంతోనే ‘పరివర్తన రాజనీతి పార్టీ’ (Parivartana Rajaneethi Party) పేరుతో కొత్త రాజకీయ పార్టీని ప్రారంభించారు.

పార్టీ ప్రకటన సందర్భంగా ఆయన చేసిన మరో ఆసక్తికర వ్యాఖ్య వైసీపీ నేతలకు ఇచ్చిన ఆహ్వానం. గతంలో తనతో కలిసి పనిచేసిన నాయకులు, ప్రస్తుతం వైసీపీలో ఉన్న అసంతృప్త నేతలు తనతో కలిసి రావాలని పిలుపునిచ్చారు. దీంతో వైసీపీ అధినేత వైఎస్ జగన్ మోహన్ రెడ్డి (YS Jagan Mohan Reddy) రాజకీయ వర్గాల్లో ఈ పరిణామంపై చర్చ మొదలైంది. మరోవైపు టీడీపీ (TDP), జనసేన (Jana Sena) పార్టీల నుంచి కూడా ఎవరైనా విజయసాయిరెడ్డి వైపు మొగ్గు చూపుతారా అనే ఆసక్తి నెలకొంది.

అయితే కొత్త పార్టీ ఆవిర్భావ కార్యక్రమంలో కనిపించిన ఓ అతిథి అందరి దృష్టిని ఆకర్షించారు. దివంగత నందమూరి తారకరత్న (Nandamuri Taraka Ratna) భార్య అలేఖ్యా రెడ్డి (Alekhya Reddy) ఈ కార్యక్రమానికి హాజరుకావడం రాజకీయ వర్గాల్లో చర్చకు దారితీసింది. విజయసాయిరెడ్డి కొత్త పార్టీ ప్రకటనపై కంటే ఆమె అక్కడికి రావడం వెనుక ఉన్న కారణాలపైనే ఎక్కువగా ఆసక్తి కనిపిస్తోంది. అలేఖ్యా రెడ్డి కూడా భవిష్యత్తులో రాజకీయాల్లోకి వస్తారా? కొత్త పార్టీలో ఏదైనా బాధ్యత తీసుకుంటారా? లేక కుటుంబ అనుబంధంతోనే ఈ కార్యక్రమానికి వచ్చారా? అనే ప్రశ్నలు వినిపిస్తున్నాయి.

వాస్తవానికి తారకరత్నకు, విజయసాయిరెడ్డికి మధ్య కుటుంబ సంబంధాలు ఉన్నాయి. అలేఖ్యా రెడ్డి విజయసాయిరెడ్డికి బంధువు కావడంతో పాటు, తారకరత్న వివాహం విషయంలోనూ ఆయన కీలకంగా వ్యవహరించినట్లు తెలుస్తోంది. ఈ నేపథ్యంలో వీరి కుటుంబాల మధ్య చాలాకాలంగా సన్నిహిత సంబంధాలు కొనసాగుతున్నాయి. తారకరత్న పిల్లలతో కూడా విజయసాయిరెడ్డి గతంలో కొన్ని వీడియోలు పంచుకున్నారు. కుటుంబ వేడుకల్లోనూ పాల్గొంటూ తన అనుబంధాన్ని కొనసాగించారు.

మరోవైపు తారకరత్న రాజకీయంగా తెలుగుదేశం పార్టీకి దగ్గరగా ఉండేవారు. నందమూరి కుటుంబానికి చెందిన ఆయన టీడీపీ కార్యక్రమాల్లో చురుగ్గా పాల్గొన్నారు. ముఖ్యంగా నారా లోకేష్ (Nara Lokesh) చేపట్టిన యువగళం పాదయాత్రలో పాల్గొన్న సమయంలోనే ఆయన తీవ్ర అస్వస్థతకు గురయ్యారు. అనంతరం చికిత్స పొందుతూ కన్నుమూశారు. అప్పటి నుంచి అలేఖ్యా రెడ్డికి విజయసాయిరెడ్డి కుటుంబం అండగా నిలుస్తున్నట్లు రాజకీయ వర్గాల్లో ప్రచారం ఉంది.

ఈ పరిస్థితుల్లో కొత్త పార్టీ కార్యక్రమానికి ఆమె రావడాన్ని రాజకీయంగా అన్వయించుకోవడం సరైనదేనా అన్న ప్రశ్న కూడా తలెత్తుతోంది. కేవలం కుటుంబ బంధంతో హాజరయ్యారా? లేక విజయసాయిరెడ్డి రాజకీయ ప్రయాణంలో ఆమె కూడా భాగస్వామి కానున్నారా? అనేది ఇప్పుడే స్పష్టత లేదు. అలేఖ్యా రెడ్డి నుంచి ఎలాంటి రాజకీయ ప్రకటన రాకపోవడంతో ఈ అంశంపై ఊహాగానాలు కొనసాగుతున్నాయి. మొత్తానికి విజయసాయిరెడ్డి కొత్త పార్టీ ప్రారంభం ఒకవైపు ఏపీ రాజకీయాల్లో చర్చకు తెరలేపితే, మరోవైపు అలేఖ్యా రెడ్డి హాజరు ఆ చర్చకు మరింత ఆసక్తిని జోడించింది.