ఎల్ నినో కరువు నీడలో ‘కృష్ణా డెల్టా’కు సంజీవని..!

ప్రపంచవ్యాప్తంగా ఎల్ నినో (El Niño) ప్రభావంతో తీవ్ర కరువు పరిస్థితులు, వర్షాభావ సూచనలు భయపెడుతున్న వేళ.. తెలుగు రాష్ట్రాల అన్నపూర్ణ, కృష్ణా డెల్టాకు శ్రీశైలం ప్రాజెక్టు ఒక సంజీవనిలా మారింది. ఎగువన కురుస్తున్న వర్షాలతో శ్రీశైలం ప్రాజెక్టుకు వరద ఉధృతి స్థిరంగా కొనసాగుతోంది. ప్రస్తుతం ఎగువన ఉన్న జూరాల ప్రాజెక్టు నుంచి శ్రీశైలానికి 44,730 క్యూసెక్కుల ఇన్-ఫ్లో వచ్చి చేరుతోంది. దీనితో ప్రాజెక్టు నిండైన జలకళతో ఉట్టిపడుతోంది. శ్రీశైలం పూర్తిస్థాయి నీటిమట్టం 885 అడుగులు కాగా.. ఈ వరద ధాటికి ప్రస్తుత నీటిమట్టం ఇప్పటికే 875.80 అడుగులకు చేరుకుని గరిష్ట స్థాయికి సమీపిస్తోంది.

సాధారణంగా ఎల్ నినో సంవత్సరాల్లో కృష్ణా బేసిన్ తీవ్ర నీటి ఎద్దడిని ఎదుర్కొంటుంది. కానీ శ్రీశైలంలో ప్రస్తుతం ఉన్న జల సమృద్ధి.. దిగువన ఉన్న లక్షలాది ఎకరాల కృష్ణా డెల్టా ఆయకట్టు రైతాంగానికి కొండంత అండగా నిలుస్తోంది. ప్రాజెక్టు పూర్తిస్థాయి నీటి నిల్వ సామర్థ్యం 215.80 టీఎంసీలు కాగా.. ఇప్పటికే ఇందులో 167.48 టీఎంసీల మేర నీరు నిల్వ ఉంది. ఎల్ నినో పరిస్థితుల్లోనూ ఇంత భారీ స్థాయిలో నీటి నిల్వలు ఉండటం, స్థిరంగా వరద వస్తుండటం కృష్ణా డెల్టాలో పండబోయే పంటలకు, తాగునీటి అవసరాలకు పూర్తి భరోసానిస్తోంది.

ఇక ప్రాజెక్టుకు వస్తున్న వరదను సద్వినియోగం చేసుకుంటూ శ్రీశైలం ఎడమ జల విద్యుత్ కేంద్రంలో విద్యుదుత్పత్తి ముమ్మరంగా సాగుతోంది. ఇక్కడ విద్యుత్ తయారు చేస్తూనే, ఏకంగా 82,368 క్యూసెక్కుల నీటిని దిగువన ఉన్న నాగార్జున సాగర్‌కు విడుదల చేస్తున్నారు. ఇది కృష్ణా డెల్టా పరిరక్షణలో కీలక ఘట్టం. వీటితో పాటు రాయలసీమ, ప్రకాశం, నెల్లూరు జిల్లాల దాహార్తిని, సాగు అవసరాలను తీర్చేందుకు వివిధ కాలువలు, ఎత్తిపోతల పథకాలకు నీటిని విస్తృతంగా విడుదల చేస్తున్నారు. ఇందులో భాగంగా పోతిరెడ్డిపాడు హెడ్ రెగ్యులేటర్‌కు 8,000 క్యూసెక్కులు, హంద్రీనీవా ఎత్తిపోతల పథకానికి 3,050 క్యూసెక్కులు, కల్వకుర్తి ఎత్తిపోతల పథకానికి 2,400 క్యూసెక్కుల నీటిని వదులుతున్నారు. మొత్తానికి, కరవు ముప్పు పొంచి ఉన్న కాలంలో కృష్ణా నది తెచ్చిన ఈ జలకళ తెలుగు రాష్ట్రాల పాలిట మహా వరంగా మారింది.