Indian Healthcare: HbA1c పరీక్షతోనే షుగర్ నిర్ధారించుకుంటున్నారా? అయితే మీరు ప్రమాదంలో ఉన్నట్లే!

HbA1c, Anemia: భారతీయులలో మధుమేహాన్ని (Diabetes) గుర్తించడానికి అత్యంత ప్రాచుర్యం పొందిన HbA1c పరీక్ష ఎల్లప్పుడూ సరైన ఫలితాలను ఇవ్వకపోవచ్చని ప్రముఖ వైద్య జర్నల్ ‘ది లాన్సెట్’ (The Lancet) హెచ్చరించింది. ముఖ్యంగా రక్తహీనత, ఇతర రక్త సంబంధిత సమస్యలు ఉన్నవారిలో ఈ పరీక్ష ఫలితాలు తప్పుగా వచ్చే అవకాశం ఉందని పరిశోధకులు పేర్కొన్నారు.

HbA1c పరీక్ష ఎందుకు విఫలమవుతోంది?

సాధారణంగా HbA1c పరీక్ష గత మూడు నెలల సగటు చక్కెర స్థాయిలను చూపుతుంది. అయితే భారతీయులలో ఎక్కువగా కనిపించే కింది సమస్యలు ఈ రీడింగ్‌ను వక్రీకరిస్తున్నాయి.

రక్తహీనత (Anemia): శరీరంలో ఐరన్ లోపం వల్ల రక్తం తక్కువగా ఉంటే, HbA1c ఫలితాలు తప్పుగా వస్తాయి.

జన్యుపరమైన లోపాలు: భారతదేశంలో ప్రబలంగా ఉన్న G6PD లోపం, హిమోగ్లోబిన్ రుగ్మతలు ఉన్నవారిలో షుగర్ స్థాయిలు ఉన్నదాని కంటే తక్కువగా లేదా ఎక్కువగా కనిపిస్తాయి.

ఆలస్యమైన గుర్తింపు: ఈ పరీక్షపైనే ఆధారపడటం వల్ల కొంతమందిలో డయాబెటిస్ ఉన్నా అది బయటపడటానికి 4 ఏళ్లు ఆలస్యం కావచ్చని నిపుణులు హెచ్చరిస్తున్నారు.

నిపుణుల సూచన:
OGTT పరీక్షే మేలు: HbA1c ఒక్కటే నమ్మదగినది కాదని, దానితో పాటు OGTT (Oral Glucose Tolerance Test) చేయించుకోవడం ఉత్తమమని నిపుణులు సూచిస్తున్నారు.

OGTT అంటే ఏమిటి?

గ్లూకోజ్ పానీయం తాగకముందు, తాగిన గంట తర్వాత రక్తంలో చక్కెర స్థాయిలను పరీక్షించడం. ఇది HbA1c కంటే చాలా ఖచ్చితమైన ఫలితాలను ఇస్తుంది.

ఒక గంట పరీక్ష: గ్లూకోజ్ తాగిన ఒక గంట తర్వాత చేసే పరీక్ష ద్వారా భవిష్యత్తులో వచ్చే గుండె జబ్బులు, లివర్ సమస్యలను కూడా ముందుగానే ఊహించవచ్చు.

మనం ఏం చేయాలి?
కేవలం HbA1c రిపోర్ట్ చూసి డయాబెటిస్ లేదని నిర్ధారించుకోవద్దు.

మీకు రక్తహీనత (అనీమియా) ఉంటే, ఆ విషయాన్ని మీ డాక్టరుకు చెప్పి ప్రత్యామ్నాయ పరీక్షలు చేయించుకోండి.

గ్లూకోజ్ పర్యవేక్షణ కోసం ఇంట్లోనే షుగర్ టెస్ట్ చేసుకునే మెషీన్లు (Self Monitoring) లేదా నిరంతర గ్లూకోజ్ మానిటర్లను వాడటం మంచిది.

భారతదేశంలో ఇప్పటికే 10 కోట్ల మందికి పైగా మధుమేహంతో బాధపడుతున్నారు. సరైన సమయంలో, సరైన పరీక్ష ద్వారా వ్యాధిని గుర్తిస్తేనే ప్రాణాంతకమైన గుండె, కిడ్నీ సమస్యల నుండి తప్పించుకోవచ్చు.