2028 అమెరికా అధ్యక్ష ఎన్నికల బరిలో రో ఖన్నా? డెమొక్రాట్ల విజయాలతో మారిన లెక్కలు!
అమెరికా అధ్యక్ష ఎన్నికలకు ఇంకా రెండేళ్ల సమయం ఉంది. కానీ 2028లో వైట్హౌస్ పీఠం ఎవరికి దక్కుతుందనే చర్చ మాత్రం ఆల్రెడీ మొదలైపోయింది. ముఖ్యంగా డెమొక్రటిక్ పార్టీలో కొత్త ముఖాలు తెరపైకి వస్తున్నాయి. ఈ క్రమంలో కాలిఫోర్నియా కాంగ్రెస్ సభ్యుడు రో ఖన్నా చేసిన వ్యాఖ్యలు ఇప్పుడు ఆసక్తికరంగా మారాయి. వచ్చే అధ్యక్ష ఎన్నికల్లో తాను పోటీ చేసే అవకాశాలు గతంలో కంటే ఎక్కువగా ఉన్నాయని ఆయన చెప్పడంతో అమెరికా రాజకీయాల్లో కొత్త చర్చ మొదలైంది.
ఎన్నికల ఫలితాలు ఇచ్చిన కొత్త ఉత్సాహం!
ఇటీవల జరిగిన మధ్యంతర ఎన్నికల్లో డెమొక్రటిక్ పార్టీ సాధించిన విజయాలు రో ఖన్నాలో కొత్త ఆశలు రేకెత్తించాయట. నవంబర్ 13న MS NOWకు ఇచ్చిన ఇంటర్వ్యూలో ఆయన తన మనసులో మాట బయటపెట్టారు. 2028 అధ్యక్ష ఎన్నికల్లో పోటీ చేసే విషయాన్ని సీరియస్గా ఆలోచిస్తున్నానని, సెలవుల తర్వాత దీనిపై తుది నిర్ణయం తీసుకుంటానని వెల్లడించారు. తాజా ఎన్నికల ఫలితాలను చూస్తుంటే తన పోటీ అవకాశాలు గతంలో కంటే ఎక్కువగా కనిపిస్తున్నాయని కూడా అన్నారు.
సంప్రదాయ రాజకీయాలకు భిన్నంగా కొత్త గొంతుకలు!
ఈ ఎన్నికల్లో గెలిచిన కొందరు అభ్యర్థుల విజయాలను రో ఖన్నా ప్రత్యేకంగా ప్రస్తావించారు. మిచిగాన్లో ముస్లిం అభ్యర్థి సెనేటర్గా ఎన్నికవడం, టెక్సాస్లో యువ మతబోధకుడు విజయం సాధించడం, మిసిసిపీలో ఆఫ్రికన్ అమెరికన్ జిల్లా అటార్నీ గెలుపొందడం వంటివి ఆయన దృష్టిని ఆకర్షించాయి. వీళ్లంతా సంప్రదాయ రాజకీయ నాయకత్వానికి భిన్నమైన నేపథ్యాల నుంచి వచ్చినవారే. అయినప్పటికీ ఓటర్లు వారికి అవకాశం కల్పించారని ఖన్నా గుర్తుచేశారు.
అంటే అమెరికా ఓటర్లు ఇప్పుడు కేవలం పాత రాజకీయ ముఖాలనే నమ్ముకోవడం లేదన్నది ఆయన అభిప్రాయం. విభిన్న నేపథ్యాలు, కొత్త ఆలోచనలు, రాజకీయ వ్యవస్థకు వెలుపల నుంచి వచ్చే గొంతుకలకు కూడా ప్రజలు ఆదరణ చూపిస్తున్నారని ఈ ఫలితాలు చెబుతున్నాయని ఆయన అన్నారు. అమెరికా సమాజం వైవిధ్యాన్ని స్వీకరించడానికి సిద్ధంగా ఉందనే సంకేతాలు కనిపిస్తున్నాయని వివరించారు.
ఇవి కూడా చదవండి
ఎప్స్టీన్ ఫైల్స్ వ్యవహారంతోనూ జాతీయ గుర్తింపు
రో ఖన్నా పేరు ఇటీవల అమెరికా రాజకీయాల్లో మరో కారణంతోనూ ఎక్కువగా వినిపిస్తోంది. జెఫ్రీ ఎప్స్టీన్కు సంబంధించిన రహస్య ఫైళ్లను ప్రజల ముందుకు తీసుకురావాలన్న ప్రయత్నాల్లో ఆయన కీలకంగా వ్యవహరించారు. రిపబ్లికన్ పార్టీకి చెందిన కాంగ్రెస్ సభ్యుడు థామస్ మాసీతో కలిసి ఎప్స్టీన్ ఫైల్స్ ట్రాన్స్పరెన్సీ యాక్ట్కు ప్రధాన మద్దతుదారుగా నిలిచారు. భిన్న రాజకీయ పార్టీలకు చెందిన ఇద్దరు నేతలు ఈ అంశంపై కలిసి పనిచేయడం కూడా అప్పట్లో చర్చనీయాంశమైంది.
డెమొక్రటిక్ పార్టీలో పోటీ అంత సులభం కాదు!
అయితే 2028 అధ్యక్ష ఎన్నికల బరిలోకి దిగాలనుకునే డెమొక్రటిక్ నేత రో ఖన్నా ఒక్కరే కాదు. ఇప్పటికే పార్టీలో యువ నాయకులతో పాటు అనుభవం ఉన్న పలువురు నేతల పేర్లు కూడా వినిపిస్తున్నాయి. ఇలాంటి పరిస్థితుల్లో ఖన్నా తన నిర్ణయం తీసుకోవడం, అధ్యక్ష అభ్యర్థిత్వం కోసం ముందుకు రావడం ఆసక్తికరంగా మారనుంది.
ప్రస్తుతానికి ఆయన నుంచి అధికారిక ప్రకటన రాలేదు. సెలవుల తర్వాత తన నిర్ణయం వెల్లడిస్తానని మాత్రమే చెప్పారు. మరి రో ఖన్నా నిజంగానే 2028 అధ్యక్ష ఎన్నికల బరిలోకి దిగుతారా? లేక ఈ ఆలోచనను మరికొంతకాలం పరిశీలిస్తారా? దీనిపై స్పష్టత రావాలంటే ఆయన తుది ప్రకటన వరకు వేచి చూడాల్సిందే.
—సూర్య ప్రకాష్ జోశ్యుల







