భారత్లో అమెరికా విజిటర్ వీసా ఇంటర్వ్యూల కోసం భారీగా పెరిగిన వెయిటింగ్ టైమ్..
- Published By: Vishal
- September 27, 2026 / 07:34 PM IST
అమెరికా వెళ్లే భారతీయులకు నిరాశ కలిగించే వార్త ఇది. దేశంలోని వివిధ నగరాల్లోని యూఎస్ కాన్సులేట్ల వద్ద విజిటర్ వీసా ఇంటర్వ్యూ అపాయింట్మెంట్ల కోసం భారీగా నిరీక్షించాల్సి వస్తోంది. టూరిస్టులు, కుటుంబ సభ్యులను కలువాలనుకునేవారు, వ్యాపార ప్రయాణికులకు ఈ జాప్యం తీవ్ర ఆందోళన కలిగిస్తోంది. ఒక్కో నగరంలో అపాయింట్మెంట్ లభ్యతలో తీవ్ర వ్యత్యాసాలు కనిపిస్తున్నాయి.
ప్రధాన నగరాల్లో వీసా ఇంటర్వ్యూ వెయిటింగ్ టైమ్ వివరాలు:
దేశంలోని ప్రధాన కేంద్రాలలో హైదరాబాద్లో అత్యధికంగా సుమారు 12 నెలల పాటు వెయిటింగ్ టైమ్ ఉన్నట్లు నివేదికలు స్పష్టం చేస్తున్నాయి.
ముంబైలో దాదాపు 11.5 నెలల పాటు నిరీక్షణ తప్పడం లేదు.
న్యూఢిల్లీలో అపాయింట్మెంట్ పొందడానికి సుమారు 10 నెలల సమయం పడుతోంది.
మిగతా నగరాలతో పోలిస్తే చెన్నై, కోల్కతాలలో పరిస్థితి కొంత మెరుగ్గా ఉన్నప్పటికీ, వెయిటింగ్ పీరియడ్ మాత్రం గణనీయంగానే ఉంది. చెన్నైలో సుమారు 7.5 నెలలు, కోల్కతాలో దాదాపు 6.5 నెలల నిరీక్షణ సమయం ఉంది.
ప్రయాణికులకు సలహాలు…
ఈ సుదీర్ఘ జాప్యం కారణంగా అమెరికా వెళ్లాలనుకునేవారు ప్రయాణానికి కొన్ని నెలల ముందే వీసా ప్రక్రియను ప్రారంభించడం మంచిది. ముఖ్యంగా కుటుంబ సందర్శనలు, వ్యక్తిగత పర్యటనలు ప్లాన్ చేసుకునేవారికి ఈ లాంగ్ వెయిటింగ్ టైమ్ ఇబ్బందికరంగా మారుతోంది. క్యాన్సిలేషన్ల వల్ల లేదా అదనపు అపాయింట్మెంట్ల ప్రకటన వల్ల కొన్నిసార్లు త్వరగా స్లాట్లు దొరికే అవకాశం ఉంటుంది కాబట్టి, అభ్యర్థులు యూఎస్ వీసా అపాయింట్మెంట్ పోర్టల్ను క్రమం తప్పకుండా చెక్ చేస్తూ ఉండాలని సూచిస్తున్నారు. భారత్ నుంచి అమెరికా విజిటర్ వీసాలకు డిమాండ్ విపరీతంగా ఉండటమే ఈ జాప్యానికి ప్రధాన కారణమని తెలుస్తోంది.
