యోగా బోర్‌గా అనిపిస్తుందా? ఈ ఆసనాలతో సరదాగా ఉత్సాహం పెంచుకోండి!

రోజువారీ జీవితంలో పని ఒత్తిడి, టెన్షన్, ఒకే రకమైన రొటీన్ కారణంగా చాలామందిలో ఉత్సాహం తగ్గిపోతుంది. ఇలాంటి సమయంలో యోగాను కేవలం వ్యాయామంలా కాకుండా సరదాగా, ఆనందంగా చేయడం వల్ల సాధనపై ఆసక్తి పెరుగుతుంది. శరీరాన్ని కదిలిస్తూ మనసును రిలాక్స్ చేసుకునేందుకు కొన్ని యోగా ఆసనాలు ఉపయోగపడతాయి. ముఖ్యంగా బ్యాలెన్స్, ఫ్లెక్సిబిలిటీ, శరీర కదలికలను కలిపే ఆసనాలను సరదాగా ప్రాక్టీస్ చేస్తే యోగా మరింత ఆసక్తికరంగా మారుతుంది.

సరదాగా యోగా చేయాలంటే.. ఈ ఆసనాలు ట్రై చేయండి!

డ్యాన్సర్ పోజ్ (Dancer Pose) ఈ విధమైన సాధనకు చక్కగా సరిపోతుంది. ఒక కాలిపై నిలబడి, మరో కాలును వెనక్కి మడిచి చేతితో పట్టుకుని శరీరాన్ని ముందుకు వంచాలి. ఈ ఆసనం బ్యాలెన్స్, కాళ్ల బలం, శరీర నియంత్రణపై దృష్టి పెట్టేలా చేస్తుంది. మొదటిసారి చేసేవారు గోడ లేదా యోగా స్ట్రాప్ (Yoga Strap) సహాయం తీసుకోవచ్చు.

హాఫ్ మూన్ పోజ్ (Half Moon Pose) కూడా శరీర సమతుల్యతను పెంచే ఆసనాల్లో ఒకటి. ఒక కాలిపై శరీరాన్ని నిలబెట్టి, మరో కాలును వెనుకకు చాపుతూ ఒక చేతిని నేలపై ఉంచాలి. మరో చేతిని పైకి ఎత్తాలి. ఇలా చేయడం వల్ల శరీరాన్ని ఒక కొత్త కోణంలో కదిలించే అవకాశం లభిస్తుంది. బ్యాలెన్స్ కష్టంగా అనిపిస్తే గోడ లేదా బ్లాక్ (Yoga Block) సహాయం తీసుకోవడం మంచిది.

ట్రీ పోజ్ (Tree Pose) చాలా సులభంగా ప్రారంభించగల ఆసనం. ఒక కాలిపై నిలబడి మరో పాదాన్ని తొడ లేదా కాలి కింది భాగంలో ఉంచి, చేతులను పైకి ఎత్తాలి. చెట్టు గాలికి ఊగుతున్నట్లుగా శరీరాన్ని స్వల్పంగా కదిలిస్తూ ఈ ఆసనాన్ని చేయడం వల్ల సాధనలో సరదా పెరుగుతుంది. అదే సమయంలో ఏకాగ్రత, సమతుల్యతపై దృష్టి పెట్టవచ్చు.

వీల్ పోజ్ (Wheel Pose) శరీరాన్ని వెనుకకు వంచే ఆసనం. ఇది కొంత కఠినమైనది కాబట్టి నేరుగా ప్రయత్నించకుండా ముందుగా శరీరాన్ని వేడెక్కించే సాధనలు చేయాలి. కోబ్రా పోజ్ (Cobra Pose), పప్పీ పోజ్ (Puppy Pose) వంటి సులభమైన ఆసనాలతో శరీరాన్ని సిద్ధం చేసుకోవాలి. సరైన పద్ధతిలో చేస్తే ఛాతీ, భుజాలు, వెన్నెముక భాగాలకు మంచి స్ట్రెచ్ లభిస్తుంది.

చివరగా శవాసనం (Savasana) ..ఇందులో నేలపై సౌకర్యంగా వెల్లకిలా పడుకుని శరీరాన్ని పూర్తిగా రిలాక్స్ చేయాలి. ఎలాంటి కదలిక లేకుండా కొద్దిసేపు ప్రశాంతంగా శ్వాసపై దృష్టి పెట్టడం వల్ల సాధన తర్వాత శరీరానికి, మనసుకు విశ్రాంతి లభిస్తుంది. యోగాను ప్రతిసారీ కఠినమైన వ్యాయామంలా కాకుండా ఆనందంగా చేసే అలవాటు పెంచుకుంటే రొటీన్‌లో కొత్త ఉత్సాహం వస్తుంది.

బ్యాలెన్స్ కష్టంగా ఉన్న ఆసనాల్లో తొందరపడకుండా గోడ, కుర్చీ లేదా యోగా బ్లాక్ వంటి సహాయకాలను ఉపయోగించాలి. నొప్పి కలిగితే ఆసనాన్ని ఆపేయాలి. ముఖ్యంగా వీల్ పోజ్ వంటి కఠినమైన ఆసనాలను నిపుణుల సూచనతో నేర్చుకోవడం మంచిది.