హెచ్‌-4 వీసా ఉన్నవారికి గుడ్ న్యూస్…

అమెరికాలో హెచ్‌-4 వీసా ఉన్నవారికి ఊరటనిచ్చే కీలక బిల్లుకు సెనెట్‌ ఆమోదించనుంది. ఈ బిల్లు ఆమోదం పొందితే సుమారు లక్ష మందికి లబ్ధి చేకూరుతుంది. అమెరికన్ సెనెట్లో రిపబ్లికన్లు, డెమోక్రాట్ల మధ్య జరిగిన సుదీర్ఘ చర్చల్లో జాతీయ భద్రత ఒప్పందానికి ఆమోదం తెలిపేందుకు అంగీకరించాయి. అమెరికాలో హెచ్‌-1బీ వీసా ఉన్నవారు తమ జీవిత భాగస్వామితో ఉద్యోగం చేయించాలనుకున్నా, 21 ఏళ్లలోపు యువకులు ఉద్యోగం చేయాలన్నా వారికి ఈ హెచ్‌-4 వీసా జారీ చేస్తారు.

ఎంప్లాయ్‌మెంట్‌ ఆథరైజేషన్‌ తప‍్పనిసరి..

హెచ్‌-4 వీసాదారులు అమెరికాలో ఉద్యోగం చేయాలంటే ముందుగా ఎంప్లాయ్‌మెంట్‌ ఆథరైజేషన్‌ డాక్యుమెంట్‌, ఐ-765 కోసం దరఖాస్తు చేసుకోవాలి. ఈ ప్రక్రియ పూర్తయితే ఆథరైజేషన్‌ ఇస్తారు. దీంతో ఉద్యోగం చేసుకునేందుకు అవకాశం లభిస్తుంది. అయితే ఆథరైజేషన్‌ పూర్తి కావడానికి సుమారు ఏడాది సమయం పడుతుంది. ఈ జాప్యంతో హెచ్-4 వీసాదారులు ఉద్యోగావకాశాలు కోల్పోతున్నారు. ఈ నేపథ్యంలో అమెరికా ప్రభుత్వం ప్రస్తుతం ఉన్న నిబంధనలను మార్చి హెచ్‌-4 వీసాదారులకు ఆటోమేటిక్‌ వర్క్‌ ఆథరైజేషన్‌ కల్పించేలా బిల్లుకు ఆమోదం తెలుపనుంది. ఈమేరకు వైట్‌హౌస్‌ ఒక ప్రకటన విడుదల చేసింది.

వలసలకు చట్టబద్ధత..

కొత్తగా తీసుకొస్తున‍్న బిల్లుతో అమెరికా బలోపేతం కావడంతోపాటు సరిహద్దులను సురక్షితం చేస్తుందని, వలసలకు చట్టబద్ధత లభిస్తుందని అమెరికా అధ్యక్షుడు జోబైడెన్‌ తెలిపారు. ఈ విధానం కింద ఏటా 18 వేల మందికి ఉపాధి ఆధారిత గ్రీన్‌ కార్డులు జారీ చేస్తామన్నారు బైడెన్. ఐదేళ్లలో 1,58,000 మందికి లబ్ధి కలుగుతుందని వెల్లడించారు. ఏడాదికి 25 వేల మందికి K-1, K-2, K-3 వలసేతర వీసా (పర్యాటకం, వైద్యం, వ్యాపారం వంటి తాత్కాలిక పనుల నిమిత్తం జారీ చేస్తారు) ఉన్నవారితోపాటు, లక్ష మంది హెచ్-4 వీసాదారులకు తమ జీవిత భాగస్వామి పనిచేసే ప్రాంతంలో ఉద్యోగం చేసే అవకాశం లభిస్తుందని వివరించారు.

2015లోనే నిర్ణయం..

హెచ్‌-4 వీసా కలిగిన వారు ఉద్యోగాలు చేసుకునే అవకాశం కల్పిస్తూ 2015లో ఒబామా ప్రభుత్వం నిర్ణయం తీసుకుంది. దీంతో శాస్త్ర సాంకేతిక రంగాల్లో నైపుణ్యం కలిగి ఉద్యోగం కోసం అమెరికా వెళ్లినవారికి ఆర్థికంగా ఊరట లభించింది. ఇక హెచ్‌-4 వీసాలు పొందిన వారిలో ఎక్కువ మంది భారతీయ మహిళలే ఉండడం విశేషం. అయితే తర్వాత ట్రంప్‌ అధికారంలోకి రావడం, వీసాలపై ఆంక్షలు విధించడంతో ఆటంకం కలిగింది. మరోవైపు నిపుణులైన భారతీయులు ఉద్యోగావకాశాలు కోల్పోయారు. ట్రంప్‌ ప్రభుత్వం విధించిన ఆంక్షలు ఎత్తివేసేందుకు బైడెన్‌ ప్రభుత్వం సిద్ధమవుతోంది.