TANA: ఫిలడెల్ఫియాలో తానా ఆధ్వర్యంలో ఘనంగా సీపీఆర్, ప్రథమ చికిత్స శిక్షణ

ఫిలడెల్ఫియా: ఉత్తర అమెరికా తెలుగు సంఘం (TANA) మిడ్-అట్లాంటిక్ టీమ్ ఆధ్వర్యంలో చెస్టర్ స్ప్రింగ్స్, ఫిలడెల్ఫియాలో నిర్వహించిన రెండు సీపీఆర్ (CPR), ప్రథమ చికిత్స శిక్షణా శిబిరాలు విజయవంతమయ్యాయి. అత్యవసర సమయాల్లో ప్రాణాలను ఎలా కాపాడాలో అవగాహన కల్పించే ఉద్దేశంతో నిర్వహించిన ఈ కార్యక్రమానికి స్థానిక కమ్యూనిటీ నుండి విశేష స్పందన లభించింది. ఈ శిక్షణా శిబిరంలో పాల్గొన్న వారికి సీపీఆర్ చేయడం, ఏఈడీ(AED) పరికరాన్ని ఉపయోగించడం, ప్రాథమిక ప్రథమ చికిత్స పద్ధతులపై నిపుణులు ప్రత్యక్షంగా శిక్షణ ఇచ్చారు. కమ్యూనిటీలో పెరుగుతున్న ఆసక్తిని దృష్టిలో ఉంచుకుని, మిడ్-అట్లాంటిక్ ప్రాంతవ్యాప్తంగా మరిన్ని ఇలాంటి కార్యక్రమాలను నిర్వహించాలని తానా బృందం నిర్ణయించింది.

శిక్షకులకు అభినందనలు: శిక్షణను ఎంతో ఆసక్తికరంగా, అర్థవంతంగా నిర్వహించిన సీపీఆర్ ఇన్‌స్ట్రక్టర్ మన్విత యాగంటికి, ఆమెకు సహాయకారిగా ఉండి అద్భుతమైన సహకారాన్ని అందించిన లౌక్య పావులూరికి తానా బృందం ప్రత్యేక కృతజ్ఞతలు తెలియజేసింది.

నిర్వహణ, అతిథులు: తానా అధ్యక్షులు డాక్టర్ నరేన్ కొడాలి, బోర్డు సభ్యులు రవి పొట్లూరి, హెల్త్ సర్వీసెస్ కోఆర్డినేటర్ మాధురి ఏలూరు, మిడ్-అట్లాంటిక్ రీజినల్ రిప్రజెంటేటివ్ ఫణి కాంతేటి, బెనిఫిట్ కోఆర్డినేటర్ వెంకట్ సింగుల పర్యవేక్షణలో ఈ కార్యక్రమం జరిగింది. తానా నాయకులు సతీష్ తుమ్మల, సురేష్ ఎలమంచిలి, కోటి యాగంటి, ప్రసాద్ కస్తూరి తదితరులు ఈ కార్యక్రమంలో పాల్గొని, శిక్షణ పూర్తి చేసుకున్న అభ్యర్థులకు సర్టిఫికెట్లను అందజేశారు. కమ్యూనిటీ క్షేమం కోసం తానా నిరంతరం కృషి చేస్తుందని ఫణి కాంతేటి ఈ సందర్భంగా పేర్కొన్నారు.