త్రిప్తి పాత్రపై సైలెంట్‌గా లీకైన సమాచారం.. “స్పిరిట్”లో భారీ మిస్టరీ?

పాన్ ఇండియా స్టార్ ప్ర‌భాస్‌(Prabhas) హీరోగా, సంచలన దర్శకుడు సందీప్ రెడ్డి వంగా(Sandeep Reddy Vanga) తెరకెక్కిస్తున్న భారీ యాక్షన్ డ్రామా స్పిరిట్(Spirit) ఇప్పటికే దేశవ్యాప్తంగా భారీ అంచనాలు సృష్టిస్తోంది. ఈ చిత్రంలో బాలీవుడ్ నటి త్రిప్తి డిమ్రీ(Triptii Dimri) హీరోయిన్‌గా ఎంపిక కావడం సినీ వర్గాల్లో ఆసక్తికర చర్చకు దారి తీసింది. అయితే ఈ ఎంపికపై వస్తున్న కామెంట్స్ మధ్య ప్రముఖ దర్శకుడు హేమంత్ మ‌ధుక‌ర్(Hemant Madhukar) చేసిన వ్యాఖ్యలు ఇప్పుడు సోషల్ మీడియాలో వైరల్ అవుతున్నాయి. సందీప్ వంగా సినిమాల్లో హీరోయిన్ పాత్రలను కేవలం గ్లామర్ కోణంలో మాత్రమే చూడటం సరైన అంచనా కాదని ఆయన స్పష్టం చేశారు.

హేమంత్ మధుకర్ మాట్లాడుతూ.. సందీప్ వంగా తన కథల్లో మహిళా పాత్రలకు ప్రత్యేకమైన భావోద్వేగ బలం ఇస్తారని పేర్కొన్నారు. ఉదాహరణగా అర్జున్ రెడ్డి(Arjun Reddy) సినిమాలో షాలినీ పాండే(Shalini Pandey) పోషించిన పాత్రను, అలాగే యానిమ‌ల్‌(Animal)లో ర‌ష్మిక మంద‌న్నా(Rashmika Mandanna) పాత్రను గుర్తు చేశారు. ఆ పాత్రలు కథలో కీలకంగా నిలిచాయని, ప్రేక్షకులపై బలమైన ఎమోషనల్ ఇంపాక్ట్ చూపించాయని తెలిపారు. సందీప్ సినిమాల్లో హీరోయిన్ పాత్రలు కథను ముందుకు నడిపించే స్థాయిలో ఉంటాయని ఆయన అభిప్రాయపడ్డారు.

ఇక త్రిప్తి డిమ్రీ ఎంపిక విషయంలో నటీమణుల మధ్య పోలికలు తీసుకురావడం అవసరం లేదని హేమంత్ వ్యాఖ్యానించారు. పాత్రకు ఎవరు సరిపోతారనే అంశాన్నే సందీప్ వంగా ప్రధానంగా పరిగణలోకి తీసుకుంటారని చెప్పారు. ప్రస్తుతం బాలీవుడ్‌లో వరుస విజయాలతో మంచి ఫామ్‌లో ఉన్న త్రిప్తి, స్పిరిట్ లో కూడా తన నటనతో ప్రత్యేక గుర్తింపు తెచ్చుకుంటుందని ఆయన ధీమా వ్యక్తం చేశారు. ఈ వ్యాఖ్యలతో ఇప్పుడు స్పిరిట్ లో త్రిప్తి పాత్ర ఎలా ఉండబోతుందన్న ఆసక్తి అభిమానుల్లో మరింత పెరిగింది.