మీ హ్యాపీనెస్ కోసం పిల్ల‌ల్ని ఈ ప్రపంచంలోకి తీసుకురావ‌ద్దు

టాలీవుడ్ నటుడు జ‌గ‌ప‌తి బాబు(Jagapathi Babu) మరోసారి తన విభిన్న ఆలోచనలతో సోషల్ మీడియాలో హాట్ టాపిక్‌గా మారారు. సినిమాల్లో విలన్‌గా, క్యారెక్టర్ ఆర్టిస్ట్‌గా బిజీగా ఉన్న జ‌గ‌ప‌తి బాబు.. వ్యక్తిగత జీవితంపై, సమాజ మార్పులపై తనదైన స్టైల్‌లో స్పందిస్తూ తరచూ వార్తల్లో నిలుస్తుంటారు. తాజాగా ఓ ఇంటర్వ్యూలో ఆయన చేసిన వ్యాఖ్యలు పెద్ద చర్చకు దారితీశాయి. ప్రస్తుతం ప్రపంచం వెళ్తున్న దిశ చాలా భయంకరంగా ఉందని, అలాంటి పరిస్థితుల్లో పిల్లలను ఈ లోకంలోకి తీసుకురావడం సరైన నిర్ణయం కాదని ఆయన అభిప్రాయపడ్డారు.

టెక్నాలజీ, రోబోటిక్స్, ఆర్టిఫిషియల్ ఇంటెలిజెన్స్ వేగంగా పెరుగుతున్న నేపథ్యంలో మానవ సంబంధాలు క్రమంగా కనుమరుగవుతున్నాయని జ‌గ‌ప‌తి బాబు వ్యాఖ్యానించారు. ఫ్యూచ‌ర్ లో మనుషుల జీవితం మరింత ఒత్తిడులతో నిండిపోతుందని, పిల్లలు మానసికంగా ఎన్నో సమస్యలు ఎదుర్కొనే అవకాశం ఉందన్నారు. తల్లిదండ్రులు తమ ఆనందం కోసం పిల్లలను కనాలనుకుంటారని, కానీ ఆ పిల్లలే తర్వాత సమాజ ఒత్తిడులు, పోటీ ప్రపంచం కారణంగా బాధపడాల్సి వస్తుందని ఆయన అభిప్రాయపడ్డారు. ఇలాంటి భయంకరమైన ప్రపంచంలో కొత్త తరాన్ని ఎందుకు తీసుకురావాల‌నే ప్రశ్నను ఆయన లేవనెత్తారు.

పిల్లల పెంపకం, పెళ్లిళ్ల విషయంలో కూడా జ‌గ‌ప‌తి బాబు తన అభిప్రాయాలను స్పష్టంగా వెల్లడించారు. పిల్లలకు స్వేచ్ఛ ఇవ్వడమే నిజమైన ప్రేమ అని, వారి జీవితాలపై తల్లిదండ్రులు నిర్ణయాలు తీసుకోవడం సరైన విధానం కాదని అన్నారు. పెళ్లి, కుటుంబం, పిల్లల విషయంలో సమాజం పెట్టే ఒత్తిడిని ఆయన తీవ్రంగా విమర్శించారు. జ‌గ‌ప‌తి బాబు చేసిన ఈ వ్యాఖ్యలు ఇప్పుడు సోషల్ మీడియాలో వైరల్ అవుతుండగా, కొందరు ఆయన ఆలోచనలను సమర్థిస్తుంటే, మరికొందరు మాత్రం ఇది అతిశయోక్తి అని అభిప్రాయపడుతున్నారు.