హైదరాబాద్ రియల్ ఎస్టేట్‌ను షేక్ చేస్తున్న కొత్త ట్రెండ్!

“2BHK ఉందా?”

కొన్ని క్షణాల నిశ్శబ్దం.

“సారీ సార్… 3BHK మాత్రమే ఉంది.”

ఆ మాట విన్న తర్వాత అతను బ్రోచర్‌ను మెల్లగా మూసేశాడు. సేల్స్ ఎగ్జిక్యూటివ్ ఇంకా ఏదో చెబుతున్నాడు. కానీ అతని చెవికి ఏమీ వినిపించలేదు. కాఫీ కప్పు టేబుల్‌పైనే వదిలేసి బయటకు నడిచాడు.

ఎందుకంటే…

అతను వచ్చినది 3BHK కొనడానికి కాదు. అతని దగ్గర ఉన్న రూ.85 లక్షల బడ్జెట్‌తో ఒక 2BHK కోసం. బ్యాంక్ లోన్ ముందే శాంక్షన్ అయింది. EMI కూడా లెక్క వేసుకున్నాడు. కానీ ఆ రోజు చూసిన ప్రతి ప్రాజెక్ట్‌లో ఒకటే సమాధానం వినిపించింది.

బయటకు నడుస్తూ అతను ఒక్కటే ఆలోచించాడు. “నేను వెతుకుతున్న 2BHKలు నిజంగానే మాయమవుతున్నాయా?”

ఇది ఒక్క వ్యక్తి కథ కాదు. హైదరాబాద్‌లో రియల్ ఎస్టేట్ రంగంలో నిశ్శబ్దంగా జరుగుతున్న ఒక పెద్ద మార్పు కథ. ఒకప్పుడు ఒకటే ఆలోచన… “ఎంతలో ఇల్లు వస్తుంది?” మరి ఈరోజు “ఇంకో పదేళ్ల తర్వాత కూడా ఈ ఇల్లు మా కుటుంబానికి సరిపోతుందా?” అని. అంతే తేడా. అదే తేడా ఇప్పుడు 2BHK, 3BHK మధ్య కోట్ల రూపాయల మార్కెట్‌ను మార్చేస్తోంది.

మారింది బిల్డర్లు కాదు… మన జీవితాలు

ఒక్కసారి వెనక్కి వెళ్లండి.

2018…

ఉదయం ఆఫీస్. సాయంత్రం ఇల్లు. ఇల్లు అంటే విశ్రాంతి.

2026…

ఉదయం Zoom మీటింగ్. పక్క గదిలో పిల్లల ఆన్‌లైన్ క్లాస్. హాల్‌లో తల్లిదండ్రులు. సాయంత్రం అదే ఇల్లు జిమ్. రాత్రికి అదే ఫ్యామిలీ టైమ్. ఒకే ఇంట్లో… నాలుగు జీవితాలు నడుస్తున్నాయి. అందుకే ఒకప్పుడు “లగ్జరీ”గా కనిపించిన మూడో బెడ్‌రూమ్… ఇప్పుడు “అవసరం”గా కనిపిస్తోంది.

1100 SFT… కానీ నిజంగా ఎంత?

రియల్ ఎస్టేట్ ప్రకటనలో 1100 SFT పెద్ద అక్షరాలతో కనిపిస్తుంది. చూస్తే పెద్ద ఇల్లే అనిపిస్తుంది. కానీ అందులో కామన్ ఏరియా, కారిడార్, లిఫ్ట్, గోడలు, బాల్కనీ అన్నీ తీసేస్తే… రోజూ మీరు నిజంగా జీవించేది సుమారు 700–770 చదరపు అడుగుల్లోనే. ఇద్దరూ ఇంటి నుంచే పని చేస్తే…పిల్లలు కాస్త పెద్దవాళ్లు అయితే…ఆ ఒక గది ఒక్కసారిగా చాలదనిపిస్తుంది. ఇదే ఆలోచన చాలా కుటుంబాలను 3BHK వైపు నడిపిస్తోంది.

హైదరాబాద్ ఒక్కటే కాదు…

ఇదే ప్రశ్న ఇప్పుడు బెంగళూరులో ఉంది. పుణేలో ఉంది. గురుగ్రామ్‌లో ఉంది. చెన్నైలో ఉంది. ప్రతి నగరంలో కారణాలు కొంచెం మారొచ్చు. కానీ ప్రశ్న, అవసరం ఒక్కటే. “ఇంట్లో ఇంకో గది ఉందా?”

అమెరికాలో ఉన్న తెలుగు వాళ్లకు ఇది కొత్త విషయం కాదు

డల్లాస్‌లో ఒక తెలుగు కుటుంబం. సియాటిల్‌లో ఇంకో కుటుంబం. న్యూజెర్సీలో మరో కుటుంబం. వాళ్లు ఇల్లు చూసేటప్పుడు మొదట అడిగేది… “Home Office ఉందా?” అని.

అమెరికాలో కోవిడ్ తర్వాత కొత్త ఇళ్ల ప్రకటనల్లో Home Office, Flex Room, Study, Bonus Room అనే పదాలు సాధారణమయ్యాయి. ఎందుకంటే ఇంట్లో ఒక అదనపు గది ఇప్పుడు కేవలం బెడ్‌రూమ్ కాదు.

ఉదయం Office. మధ్యాహ్నం Kids Study. వీకెండ్‌లో Guest Room. అవసరం మారితే… అదే Hobby Room. వీళ్లు హైదరాబాద్ లాంటి చోట ఇల్లు కొనాలన్నా ఇవన్నీ చూస్తున్నారు.

ఇది అమెరికాలో మాత్రమే కాదు.

ఆస్ట్రేలియా, యూకే వంటి దేశాల్లో కూడా కొత్త ఇళ్ల డిజైన్‌లో స్టడీ స్పేస్‌లకు ప్రాధాన్యం పెరిగింది. స్థలం తక్కువగా ఉండే సింగపూర్‌లో అయితే ఒకే గదిని నాలుగు అవసరాలకు వాడే ఇంటీరియర్ డిజైన్లు పెరుగుతున్నాయి. నిజానికి మారింది ఇంటి సైజు కాదు. ఇంటి ఉపయోగం.

బిల్డర్లు ఏం చేస్తున్నారు?

చాలామంది అనుకుంటారు…బిల్డర్లు 3BHKలు కడుతున్నారు…ఎక్కువ లాభాల కోసం.అందుకే అవే అమ్మకానికి పెడుతున్నారు అని. అది కూడా కొంతవరకూ నిజమే. కానీ పూర్తిగా అదే నిజం కాదు. భూమి ఖరీదు పెరిగింది. నిర్మాణ వ్యయం పెరిగింది. కొనుగోలుదారుల అంచనాలు మారాయి. దీంతో కొత్త ప్రాజెక్టుల్లో పెద్ద ఇళ్ల వాటా పెరుగుతోంది.

ఒక విషయం గమనించారా?

ఇప్పుడు ఏ ప్రకటనలోనూ… “1100 SFT Flat” అని పెద్దగా కనపడడం లేదు. దాని బదులు…

Luxury Living.

Work From Home Ready.

Family Space.

అని రాస్తున్నారు.

ఎందుకంటే…బిల్డర్లు ఇప్పుడు అమ్మేది ఫ్లాట్ కాదు. ఒక జీవనశైలిని.

ఇంతకీ 3BHKనే సరైన నిర్ణయమా?

ఆర్దిక భాషలో చెప్పాలంటే అంత సులభం కాదు. 3BHK అంటే…పెద్ద EMI. భారీ ఇంటీరియర్ ఖర్చు. భారీ మెయింటెనెన్స్. బడ్జెట్‌కు మించి వెళ్లి కొనుగోలు చేస్తే అదే ఇల్లు భారం కూడా కావచ్చు.

అందుకే మొదటి ఇల్లు కొనేవారికి, చిన్న కుటుంబాలకు, EMIని నియంత్రణలో ఉంచుకోవాలనుకునేవారికి 2BHK ఇప్పటికీ అద్భుతమైన ఎంపికే.

అందుకే ఇల్లు ఎంత పెద్దదన్నది కాదు…

మీ జీవితం ఎంత పెద్ద EMIని తట్టుకోగలదన్నదే ముఖ్యమైన ప్రశ్న.

ఏదైమైనా ….

హైదరాబాద్‌లో మాయమవుతున్నది కేవలం 2BHK కాదు. “చిన్న ఇల్లు చాలు” అనే ఒక తరం ఆలోచన. దాని స్థానంలో ఇంకో ప్రశ్న వచ్చేసింది. “ఈరోజు కొనే ఇల్లు… నా పిల్లలు పెద్దయ్యాక కూడా సరిపోతుందా?”

కాబట్టి…రియల్ ఎస్టేట్ మార్కెట్ మారడం కంటే ముందే…మన జీవితాలే మారిపోయాయి అని అర్దం చేసుకోవాలి. అందుకే ఈరోజు గచ్చిబౌలి, కొండాపూర్‌లో వినిపిస్తున్న ఆ ఒక్క మాట…”3BHK మాత్రమే ఉంది సార్…”

ఆ మాట ఒక ఫ్లాట్ గురించే కాదు.

మధ్యతరగతి భవిష్యత్తు ఎలా మారుతోందో చెప్పే నిశ్శబ్ద సంకేతం కూడా.