మిస్ యూనివర్స్ పోటీల్లో కజియా స్పెషల్ అట్రాక్షన్.. కేరళ సంప్రదాయానికి గ్లోబల్ గుర్తింపు!
దేశాలు మారినా.. మన మూలాలు, మన సంస్కృతి మాత్రం ఎప్పటికీ ప్రత్యేకమే! యూఏఈలో పుట్టి పెరిగిన మిస్ యూనివర్స్ ఇండియా ప్రతినిధి కజియా లిజ్ మెజో తన కేరళ మూలాలను గుర్తుచేసుకుంటూ అంతర్జాతీయ వేదికపై అందరి దృష్టినీ ఆకర్షించారు.
ప్యూర్టో రికోలో జరుగుతున్న మిస్ యూనివర్స్ 2026 పోటీల్లో కజియా లిజ్ మెజో కనిపించిన తీరు ఇప్పుడు ప్రత్యేక ఆకర్షణగా మారింది. అందాల పోటీల్లో గ్లామర్కు కొదవ ఉండదు. కానీ ఆ అందానికి మన సంస్కృతిని కూడా జోడిస్తే ఆ ప్రత్యేకతే వేరు కదా! సరిగ్గా ఇదే ఆలోచనతో కజియా తన వ్యక్తిగత ఇంటర్వ్యూ రౌండ్ కోసం కేరళ సంప్రదాయ కసవు చీర స్ఫూర్తితో రూపొందించిన అందమైన గౌన్ను ఎంచుకున్నారు. నవంబర్ 24న జరగనున్న గ్రాండ్ ఫినాలేకు ముందు ఆమె ఎంచుకున్న ఈ ప్రత్యేకమైన లుక్ ఇప్పుడు అందరి దృష్టిని ఆకర్షిస్తోంది.
View this post on Instagram
కసవు చీరలో కేరళ సంప్రదాయపు అందం
కేరళ అనగానే ముందుగా గుర్తొచ్చేవి అక్కడి పచ్చని ప్రకృతి, సంప్రదాయాలు, పండుగలు, తెలుపు రంగు చీరపై మెరిసే బంగారు అంచులు. అదే కసవు చీర ప్రత్యేకత. అలాంటి సంప్రదాయ చీర నుంచి స్ఫూర్తి పొందిన గౌన్ను కజియా ధరించారు. తెలుపు లేదా క్రీమ్ రంగు వస్త్రానికి బంగారు అంచులు, అందమైన చేతిపని అలంకరణలు తోడవడంతో ఆ దుస్తులు భారతీయ కళానైపుణ్యాన్ని అద్భుతంగా ప్రతిబింబించాయి.
ఈ లుక్కు సంబంధించిన ఫొటోలను ఇన్స్టాగ్రామ్లో పంచుకున్న కజియా, తన మనసులోని భావాలను కూడా అందంగా వివరించారు. ఇది కేవలం ఒక ఫ్యాషన్ ఎంపిక కాదని, తన స్వస్థలం, చరిత్ర, జీవిత ప్రయాణం అన్నీ కలిసిన ఒక ప్రత్యేకమైన జ్ఞాపకమని ఆమె చెప్పారు. నిజానికి, ప్రపంచ వేదికపై నిలబడినప్పుడు తనతో పాటు తన మూలాలను కూడా తీసుకెళ్లాలన్న ఆమె ఆలోచన ఈ దుస్తుల్లో స్పష్టంగా కనిపిస్తోంది.
ప్రతి ఆభరణం వెనుక ఒక జ్ఞాపకం!
కజియా అలంకరణలో మరో ప్రత్యేకమైన విషయం ఏమిటంటే, ఆమె ధరించిన ప్రతి ఆభరణం వెనుక ఒక ప్రత్యేకమైన కథ ఉంది. జుట్టులో పెట్టుకున్న మల్లెపూల గజ్రా తన తొలి అధికారిక అందాల పోటీ ఫొటోషూట్ను గుర్తుచేసేదిగా ఉందని ఆమె వివరించారు. అంతేకాదు, గతంలో మిస్ యూనివర్స్ వేదికపై భారత్కు ప్రాతినిధ్యం వహించిన అందాల రాణి వారసత్వానికి కూడా అది ఒక నివాళి.
అలాగే, భారత్ నుంచి బయలుదేరినప్పుడు ధరించిన అదే గాజును ఈసారి కూడా పెట్టుకున్నారు. చెవులకు ధరించిన జుంకాలు కూడా గతంలో భారత్కు ప్రాతినిధ్యం వహించిన ప్రతినిధికి చెందినవే. ఇలా తన ప్రయాణంలోని పాత జ్ఞాపకాలను, తనకు ప్రేరణనిచ్చిన వ్యక్తుల గుర్తులను ఒక్కో ఆభరణంలో దాచుకున్నారు. అందుకే ఈ అలంకరణ ఆమెకు మరింత ప్రత్యేకంగా మారింది.
తాను మలయాళీ వారసత్వం పట్ల ఎంతో గర్వంగా ఉన్నానని చెప్పిన కజియా, తన ప్రయాణంలో అండగా నిలిచిన ప్రతి ఒక్కరికీ ఈ ప్రత్యేకమైన లుక్ను అంకితం చేస్తున్నట్లు తెలిపారు. భారతీయ ప్రేక్షకులు తనను చూసినప్పుడు తమలోని ఒక భాగాన్ని తనలో చూసుకోవాలని కోరుకుంటున్నానని చెప్పారు. చివర్లో షారుఖ్ ఖాన్ నటించిన చక్ దే! ఇండియా సినిమాను గుర్తుచేస్తూ తన సందేశాన్ని ముగించడం కూడా అభిమానులను ఆకట్టుకుంది.
సరిహద్దులకు అతీతంగా స్నేహం.. భారత్, పాక్, బంగ్లాదేశ్ ప్రతినిధుల సందడి
కజియా సోషల్ మీడియాలో పంచుకున్న మరో పోస్ట్ కూడా ఆసక్తికరంగా మారింది. మిస్ యూనివర్స్ పాకిస్థాన్ మిస్బా అర్షద్, మిస్ యూనివర్స్ బంగ్లాదేశ్ సమీరా ఖాన్ మహితో కలిసి దిగిన ఫొటోలను ఆమె షేర్ చేశారు. మూడు దేశాలు, మూడు వేర్వేరు జెండాలు అయినప్పటికీ తమ మధ్య ఉన్న స్నేహం మాత్రం ఎంతో ప్రత్యేకమని ఆమె పేర్కొన్నారు.
దేశాల మధ్య రాజకీయ, భౌగోళిక సరిహద్దులు ఉండొచ్చు. కానీ మనుషుల మధ్య ఏర్పడే నిజమైన అనుబంధాలకు అవి అడ్డుకావని ఆమె సందేశం ఇచ్చారు. అందాల పోటీ వేదికపై పోటీదారులుగా ఉన్నప్పటికీ, వ్యక్తిగతంగా ఒకరికొకరు స్నేహితులుగా ఉండగలమని ఈ ముగ్గురి ఫొటోలు చాటిచెప్పాయి. ఆమెలో కనిపించిన ఆప్యాయత, సోదరీభావం నెటిజన్ల దృష్టిని ఆకర్షించే అంశంగా నిలిచాయి.
నవంబర్ 24న గ్రాండ్ ఫినాలే.. అందరి చూపూ ప్యూర్టో రికోపైనే!
ప్రపంచంలోని వివిధ దేశాలకు చెందిన అందాల రాణులు పాల్గొంటున్న మిస్ యూనివర్స్ 2026 పోటీలు ప్రస్తుతం ప్యూర్టో రికోలో జరుగుతున్నాయి. ఈ పోటీలకు కజియా ఇప్పటికే మరో ప్రత్యేకమైన భారతీయ సంప్రదాయపు లుక్తోనూ ఆకట్టుకున్నారు. ఆమె భారత్ నుంచి ప్యూర్టో రికోకు ప్రయాణించినప్పుడు ధరించిన చీర విలువ సుమారు రూ.1.40 లక్షలు. ప్రముఖ డిజైనర్ సమంత్ చౌహాన్ ఆ చీరను రూపొందించారు.
ఇక అసలు ఉత్కంఠకు తెరలేపే గ్రాండ్ ఫినాలే నవంబర్ 24న శాన్ జువాన్లోని జోస్ మిగ్యుల్ అగ్రెలాట్ కొలీజియంలో జరగనుంది. కజియా తన అందం, ఆత్మవిశ్వాసంతో పాటు భారతీయ సంస్కృతిని కూడా ప్రపంచానికి పరిచయం చేస్తున్నారు. కేరళ సంప్రదాయాన్ని తనదైన శైలిలో అంతర్జాతీయ వేదికపై నిలబెట్టిన ఆమె ప్రయాణం ఇప్పుడు ఆసక్తికరంగా మారింది. మరి ఈ ప్రయాణం మిస్ యూనివర్స్ కిరీటం వరకు చేరుతుందా? అన్నది తెలుసుకోవాలంటే గ్రాండ్ ఫినాలే వరకు వేచి చూడాల్సిందే!
—సూర్య ప్రకాష్ జోశ్యుల







