టీటీడీ కీలక నిర్ణయం.. ఎన్నారైలకు షాక్..!

తిరుమల శ్రీ వేంకటేశ్వరస్వామి వారి వార్షిక బ్రహ్మోత్సవాలను అత్యంత వైభవంగా నిర్వహించేందుకు తిరుమల తిరుపతి దేవస్థానం  ఎన్నారై (టిటిడి) సన్నద్ధమవుతోంది. ఇందులో భాగంగా బ్రహ్మోత్సవాల ఏర్పాట్లపై టిటిడి అదనపు ఈవో వెంకయ్య చౌదరి గురువారం ఉన్నతాధికారులతో కలిసి ఒక సుదీర్ఘ సమీక్షా సమావేశాన్ని నిర్వహించారు. ఈ సందర్భంగా బ్రహ్మోత్సవాల అఫీషియల్ షెడ్యూల్‌ను ఖరారు చేశారు. దీని ప్రకారం సెప్టెంబర్ 8వ తేదీన పవిత్రమైన ‘కోయిల్ ఆళ్వార్ తిరుమంజనం’ (ఆలయ శుద్ధి కార్యక్రమం) జరగనుంది.

ఆ తర్వాత సెప్టెంబర్ 15న శాస్త్రోక్తంగా ‘ధ్వజారోహణం’ చేయడంతో శ్రీవారి వార్షిక బ్రహ్మోత్సవాలు అధికారికంగా ప్రారంభమవుతాయి. బ్రహ్మోత్సవాల రోజుల్లో అత్యంత ప్రధానమైన ఘట్టాల తిథులను టిటిడి ప్రకటించింది. భక్తులు ఎంతో పవిత్రంగా భావించే శ్రీవారి ‘గరుడ వాహన సేవ’ సెప్టెంబర్ 19వ తేదీన అట్టహాసంగా జరగనుంది. అలాగే సెప్టెంబర్ 22న ‘రథోత్సవం’, సెప్టెంబర్ 23న పవిత్ర ‘చక్రస్నానం’ కార్యక్రమాలతో ఈ ఉత్సవాలు ముగియనున్నాయి. గరుడ సేవ రోజున లక్షలాది మంది భక్తులు తిరుమలకు తరలివచ్చే అవకాశం ఉన్నందున, సామాన్య భక్తులకు కల్పిస్తున్న సౌకర్యాలు, వసతి, లడ్డూ ప్రసాదాల పంపిణీపై ఈ సమీక్షలో ప్రత్యేకంగా చర్చించారు.

ఎలాంటి అవాంఛనీయ సంఘటనలు జరగకుండా విజిలెన్స్ మరియు పోలీస్ విభాగాల సమన్వయంతో పటిష్టమైన బందోబస్తును ఏర్పాటు చేయాలని అదనపు ఈవో ఆదేశించారు. సామాన్య భక్తులకు గరిష్టంగా స్వామివారి దర్శన భాగ్యం కల్పించాలనే లక్ష్యంతో బ్రహ్మోత్సవాల రోజుల్లో దర్శన నియమాలలో టిటిడి కీలక మార్పులు చేసింది. ఈ ఉత్సవాల సమయంలో ఎలాంటి సిఫార్సు లేఖలకు తావు లేకుండా.. కేవలం స్వయంగా వచ్చే ప్రముఖులకు (Protocol VIPs) మాత్రమే బ్రేక్ దర్శనాలు కల్పిస్తామని స్పష్టం చేసింది. అంతేకాకుండా, రద్దీని నియంత్రించేందుకు గాను చంటి పిల్లల తల్లిదండ్రులు, ఎన్ఆర్ఐలు (NRI), దాతలకు (Donors) కల్పించే ప్రత్యేక దర్శన ప్రివిలేజెస్‌ను బ్రహ్మోత్సవాల ముగిసేంత వరకు పూర్తిగా రద్దు చేస్తున్నట్లు ప్రకటించింది. భక్తులందరూ ఈ మార్పులను గమనించి టిటిడి బోర్డుకు సహకరించాలని అధికారులు విజ్ఞప్తి చేశారు.