Polavaram: పొట్టి శ్రీరాములా.. వాజ్పేయియా? పోలవరం నామకరణంపై కన్ఫ్యూషన్..
- Published By: Bhuvana
- December 30, 2025 / 09:49 AM IST
ఆంధ్రప్రదేశ్ (Andhra Pradesh) ప్రజలకు జీవనాడిలా భావించే పోలవరం ప్రాజెక్టు (Polavaram Project) ఆలోచన మొదటిసారిగా 1940ల ప్రాంతంలో ఆవిర్భవించింది. దాదాపు తొంభై ఏళ్లుగా కొనసాగుతున్న ఈ కల ఇప్పుడు నిజమయ్యే దశకు చేరుకుంది. 2027లో జరగనున్న గోదావరి పుష్కరాలకు (Godavari Pushkaralu) ముందే ఈ మహా ప్రాజెక్టు పూర్తి అయ్యే అవకాశాలు కనిపిస్తున్నాయి. ఈ నేపథ్యంలో పోలవరం ప్రాజెక్టుకు ఏ మహానీయుడి పేరు పెట్టాలన్న అంశం ఇప్పుడు రాజకీయ వర్గాల్లో చర్చనీయాంశంగా మారింది.
ప్రస్తుతం రాష్ట్రంలో అధికారంలో ఉన్న కూటమి (Alliance) పార్టీల మధ్య ఈ విషయంలో భిన్నాభిప్రాయాలు వ్యక్తమవుతున్నాయని సమాచారం. ప్రధాన పక్షమైన తెలుగుదేశం పార్టీ (TDP) ఈ అంశంపై ఇప్పటివరకు పెద్దగా స్పందించకపోయినా, జనసేన (Jana Sena) , భారతీయ జనతా పార్టీ (BJP) నుంచి మాత్రం స్పష్టమైన డిమాండ్లు వినిపిస్తున్నాయి. పోలవరం వంటి ప్రతిష్ఠాత్మక ప్రాజెక్టుకు పేరు పెట్టడం చరిత్రలో నిలిచిపోయే నిర్ణయం కావడంతో ఈ చర్చకు మరింత ప్రాధాన్యం ఏర్పడింది.
జనసేన పార్టీ తరఫున అమరజీవి పొట్టి శ్రీరాములు (Potti Sriramulu) పేరును పోలవరం ప్రాజెక్టుకు పెట్టాలని ప్రతిపాదన వస్తోంది. ప్రత్యేక ఆంధ్ర రాష్ట్రం కోసం తన ప్రాణాలను అర్పించిన మహనీయుడు ఆయన. ఆయన త్యాగం వల్లే ప్రత్యేక రాష్ట్రం సాధ్యమైందని చాలా మంది భావిస్తారు. ఇటీవల జనసేన అధినేత పవన్ కళ్యాణ్ (Pawan Kalyan) కూడా ఇదే అభిప్రాయాన్ని వ్యక్తం చేశారు. పొట్టి శ్రీరాములు పేరు ఒక జిల్లా లేదా ఒక ప్రాంతానికి పరిమితం కాకుండా, ఆంధ్రులందరికీ ఉపయోగపడే పోలవరం వంటి ప్రాజెక్టుకు పెట్టడం మరింత అర్థవంతంగా ఉంటుందని ఆయన సూచించారు. ఈ వాదనకు మేధావుల నుంచి కూడా మద్దతు లభిస్తోంది.
ఇదే సమయంలో బీజేపీ నుంచి మరో ప్రతిపాదన ముందుకు వచ్చింది. దేశానికి ఆరున్నరేళ్ల పాటు ప్రధానిగా సేవలందించిన మాజీ ప్రధాని అటల్ బిహారీ వాజ్పేయి (Atal Bihari Vajpayee) పేరును పోలవరం ప్రాజెక్టుకు పెట్టాలని ఆ పార్టీ కోరుతోంది. వాజ్పేయి హయాంలోనే ఆంధ్రప్రదేశ్కు అనేక కీలక నిర్ణయాలు తీసుకున్నారని బీజేపీ నేతలు గుర్తు చేస్తున్నారు. ఇటీవల రాష్ట్రవ్యాప్తంగా వాజ్పేయి విగ్రహాల ఏర్పాటు, అమరావతి (Amaravati)లో స్మృతి వనం నిర్మాణం కూడా ఇదే దిశగా సాగుతున్న కార్యక్రమాలుగా చెప్పుకుంటున్నారు. ఈ నేపథ్యంలో జాతీయ ప్రాజెక్టుగా ఉన్న పోలవరం ప్రాజెక్టుకు ఆయన పేరు పెట్టడం సముచితమని బీజేపీ వాదిస్తోంది.
పొట్టి శ్రీరాములు ఆంధ్రుల ఆత్మగౌరవానికి ప్రతీక అయితే, పోలవరం ప్రాజెక్టు పూర్తిగా కేంద్ర ప్రభుత్వ నిధులతో నిర్మితమవుతున్న జాతీయ ప్రాజెక్టు. సాధారణంగా ఇటువంటి ప్రాజెక్టులకు కేంద్రంలో అధికారంలో ఉన్న నాయకుల పేర్లు పెట్టే ఆనవాయితీ ఉంది. ప్రస్తుతం కేంద్రంలో ఎన్డీయే (NDA) ప్రభుత్వం ఉండటంతో వాజ్పేయి పేరుకు అవకాశాలు ఉన్నాయని కొందరు అంటున్నారు. అయితే మరో వర్గం మాత్రం “దేశ నేత అయినా సరే, ఆంధ్రుల ప్రాణప్రదమైన ప్రాజెక్టుకు ఒక ఆంధ్రుడి పేరు ఉంటేనే బాగుంటుంది” అని అభిప్రాయం వ్యక్తం చేస్తోంది. ఈ పరిస్థితుల్లో ముఖ్యమంత్రి చంద్రబాబు నాయుడు (Chandrababu Naidu) ఏ నిర్ణయం తీసుకుంటారు అన్నది ఆసక్తిగా మారింది. పోలవరం ప్రాజెక్టుకు పెట్టే పేరు కేవలం ఒక నామకరణం మాత్రమే కాకుండా, ఆంధ్రుల చరిత్రలో చిరస్థాయిగా నిలిచే నిర్ణయంగా మారనుంది.
