KTR : రీకౌంటింగ్ రాజకీయం.. బెదిరింపుల పర్వం.. మున్సిపల్ ఫలితాలపై గులాబీ బాస్ ఆగ్రహం!

KTR : తెలంగాణ మున్సిపల్ ఎన్నికల ఫలితాల లెక్కింపు వేళ రాష్ట్ర రాజకీయాలు ఒక్కసారిగా వేడెక్కాయి. అధికార కాంగ్రెస్ పార్టీ పోలీసు యంత్రాంగాన్ని అడ్డు పెట్టుకుని అక్రమాలకు పాల్పడుతోందని బీఆర్ఎస్ వర్కింగ్ ప్రెసిడెంట్ కేటీఆర్ సంచలన ఆరోపణలు చేశారు. ఈ మేరకు ఆయన మీడియా వేదికగా కాంగ్రెస్ ప్రభుత్వంపై విమర్శల వర్షం కురిపించారు.

గద్వాలలో అక్రమాల పర్వం:
జోగులాంబ గద్వాల జిల్లాలోని ఒక వార్డు ఫలితంపై కేటీఆర్ తీవ్ర అభ్యంతరం వ్యక్తం చేశారు. “గద్వాలలోని ఓ వార్డులో బీఆర్ఎస్ గెలిచినప్పటికీ, అధికార బలంతో ఏకంగా నాలుగు సార్లు రీకౌంటింగ్ చేయించారు. చివరకు కేవలం ఒక్క ఓటు మెజారిటీతో కాంగ్రెస్ అభ్యర్థి గెలిచినట్లు ప్రకటించడం ప్రజాస్వామ్యాన్ని అపహాస్యం చేయడమే” అని ఆయన మండిపడ్డారు.

రాష్ట్రవ్యాప్తంగా అరాచకాలు:
కేవలం గద్వాల మాత్రమే కాకుండా వర్ధన్నపేట, చౌటుప్పల్ మున్సిపాలిటీల్లోనూ ఇదే తరహాలో అక్రమాలకు పాల్పడ్డారని కేటీఆర్ ఆరోపించారు. గెలిచిన బీఆర్ఎస్ అభ్యర్థులను భయభ్రాంతులకు గురి చేస్తున్నారని, పోలీసులతో బెదిరించి బలవంతంగా తమ పార్టీలో చేర్చుకునే ప్రయత్నం చేస్తున్నారని ఆగ్రహం వ్యక్తం చేశారు.

బలమైన శక్తిగా బీఆర్ఎస్:
ప్రభుత్వ వేధింపులు ఉన్నప్పటికీ ప్రజలు బీఆర్ఎస్ వైపే ఉన్నారని కేటీఆర్ ధీమా వ్యక్తం చేశారు.

రాష్ట్రవ్యాప్తంగా 16 మున్సిపాలిటీల్లో బీఆర్ఎస్ స్పష్టమైన మెజారిటీతో నేరుగా పీఠాలను కైవసం చేసుకుంటోందని వెల్లడించారు.

మరో 10 నుంచి 15 మున్సిపాలిటీల్లో బీఆర్ఎస్ ‘లార్జెస్ట్ పార్టీ’ (అత్యధిక సీట్లు సాధించిన పార్టీ)గా అవతరించిందని తెలిపారు.

ఓటమి భయంతోనే కాంగ్రెస్ అక్రమ మార్గాలను ఎంచుకుందని, తమ అభ్యర్థులను లాక్కునే ప్రయత్నాలను అడ్డుకుంటామని కేటీఆర్ హెచ్చరించారు. కౌంటింగ్ కేంద్రాల వద్ద అప్రమత్తంగా ఉండాలని పార్టీ శ్రేణులకు ఆయన పిలుపునిచ్చారు.