విశాఖ ఎన్నికల్లో విచిత్ర రాజకీయం.. ఒకే నినాదంతో టీడీపీ, వైసీపీ ప్రచారం..

గ్రేటర్ విశాఖపట్నం మున్సిపల్ కార్పొరేషన్ (GVMC) ఎన్నికలతో నగర రాజకీయాలు ఒక్కసారిగా వేడెక్కాయి. మొత్తం 120 వార్డుల్లో గెలుపే లక్ష్యంగా ప్రధాన రాజకీయ పార్టీలు తమ ప్రచారాన్ని ముమ్మరం చేశాయి. అభ్యర్థులతో పాటు రాష్ట్ర స్థాయి నాయకులు కూడా రంగంలోకి దిగి ఓటర్లను ఆకట్టుకునే ప్రయత్నం చేస్తున్నారు. నవంబర్ 1న పోలింగ్, నవంబర్ 3న ఓట్ల లెక్కింపు జరగనున్న నేపథ్యంలో ప్రచారానికి సమయం తక్కువగా ఉండటంతో పార్టీలన్నీ వేగం పెంచాయి. అయితే ఈ ఎన్నికల్లో ఆసక్తికరమైన విషయం ఏమిటంటే.. అధికార కూటమి, ప్రతిపక్ష వైసీపీ రెండూ దాదాపు ఒకే నినాదాన్ని తమ ప్రచారంలో ఉపయోగిస్తున్నాయి. అదే ‘సేవ్ విశాఖ’.

విశాఖ నగరాన్ని కాపాడాలన్న నినాదంతో వైసీపీ ప్రజల్లోకి వెళ్తుండగా, గత ఐదేళ్ల పాలనలో నగరానికి జరిగిన నష్టాన్ని సరిదిద్దాల్సిన అవసరం ఉందంటూ టీడీపీ కూటమి తన వాదనను వినిపిస్తోంది. ఒకే నినాదాన్ని రెండు పార్టీలు వేర్వేరు రాజకీయ కోణాల్లో ఉపయోగిస్తుండటం ఎన్నికల ప్రచారంలో ప్రత్యేక ఆకర్షణగా మారింది.

వైసీపీ తరఫున మేయర్ అభ్యర్థిగా బరిలో ఉన్న ఎమ్మెల్సీ వరుదు కల్యాణి (Varudu Kalyani) ఈ ఎన్నికలను ప్రతిష్ఠాత్మకంగా తీసుకున్నారు. నగరంలోని విలువైన ప్రభుత్వ భూములను ప్రైవేటు, కార్పొరేట్ సంస్థలకు అప్పగిస్తున్నారంటూ కూటమి ప్రభుత్వంపై ఆమె విమర్శలు చేస్తున్నారు. ఈ అంశాన్నే ప్రధాన ప్రచారాస్త్రంగా మార్చుకుని ‘సేవ్ విశాఖ’ పోస్టర్లతో ప్రజల్లోకి వెళ్తున్నారు. వైసీపీ నాయకులు కేకే రాజు (KK Raju), కురసాల కన్నబాబు (Kurasala Kannababu), గుడివాడ అమర్నాథ్ (Gudivada Amarnath) తదితరులు వివిధ వార్డుల్లో పర్యటిస్తూ పార్టీ అభ్యర్థులకు మద్దతుగా ప్రచారం చేస్తున్నారు.

విశాఖ స్టీల్ ప్లాంట్ (Visakhapatnam Steel Plant) ప్రైవేటీకరణ అంశం, విశ్వవిద్యాలయ భూముల వివాదం, మత్స్యకారుల నివాస సమస్యలు కూడా వైసీపీ ప్రచారంలో ప్రాధాన్యత పొందుతున్నాయి. మహిళలకు పెన్షన్లు, నిరుద్యోగ భృతి వంటి అంశాలతో పాటు కూటమి ప్రభుత్వం ప్రకటించిన సూపర్ సిక్స్ హామీల అమలుపై ప్రశ్నలు సంధిస్తున్నారు. ధరల పెరుగుదలను ప్రస్తావిస్తూ వరుదు కల్యాణి చేస్తున్న వినూత్న వ్యాఖ్యలు కూడా ప్రచారంలో చర్చకు వస్తున్నాయి.

మరోవైపు టీడీపీ (TDP) కూటమి కూడా ప్రచారంలో వెనక్కి తగ్గడం లేదు. టీడీపీ తరఫున మాజీ కార్పొరేటర్ ముక్కా శ్రావణి (Mukka Sravani) మేయర్ అభ్యర్థిగా పోటీ చేస్తున్నారు. ‘చెప్పాం.. చేస్తున్నాం’ అనే నినాదంతో నగర అభివృద్ధి, సంక్షేమ పథకాల అమలును ప్రజలకు వివరిస్తున్నారు. గత వైసీపీ పాలనలో జరిగిన పరిణామాలను ప్రస్తావిస్తూ తమ ప్రభుత్వ పనితీరును వివరించే ప్రయత్నం చేస్తున్నారు.

సీట్ల పంపకాల్లో టీడీపీ 77, జనసేన (Janasena) 32, బీజేపీ (BJP) 11 వార్డుల్లో పోటీ చేస్తున్నాయి. మూడు పార్టీలు ఉమ్మడి మేనిఫెస్టోతో ప్రజల ముందుకు వెళ్లాయి. ఎమ్మెల్యేలు గంటా శ్రీనివాసరావు (Ganta Srinivasa Rao), పి. విష్ణుకుమార్ రాజు (P. Vishnukumar Raju) వార్డుల్లో పర్యటిస్తూ ప్రచారాన్ని నిర్వహిస్తున్నారు. విశాఖ ఎంపీ ఎం. శ్రీభరత్ (M. Sribharat), వీఎంఆర్‌డీఏ ఛైర్మన్ ప్రణవ్ గోపాల్ (Pranav Gopal) కూడా తమదైన శైలిలో ప్రచార కార్యక్రమాల్లో పాల్గొంటున్నారు.

మొత్తానికి విశాఖ ఎన్నికల్లో రెండు ప్రధాన రాజకీయ శిబిరాలు ఒకే నినాదాన్ని వేర్వేరు అర్థాలతో ప్రజల్లోకి తీసుకెళ్తున్నాయి. నగర భవిష్యత్తు, ప్రభుత్వ భూముల పరిరక్షణ, అభివృద్ధి, సంక్షేమం వంటి అంశాల చుట్టూ ప్రచారం సాగుతోంది. ఈ నేపథ్యంలో ఓటర్లు ఏ పార్టీ వాదనలకు ప్రాధాన్యత ఇస్తారన్నది నవంబర్ 3న వెలువడే ఫలితాలతో తేలనుంది.