రాయలసీమను రైజింగ్ సీమగా మారుస్తాం: సీఎం చంద్రబాబు..!

అమరావతిలోని ఉండవల్లి నివాసంలో ఏర్పాటు చేసిన మీడియా సమావేశంలో ముఖ్యమంత్రి చంద్రబాబు నాయుడు(Chandrababu Naidu) గత ప్రభుత్వ వైఫల్యాలపై, ప్రస్తుత కూటమి ప్రభుత్వ అభివృద్ధి వ్యూహాలపై సుదీర్ఘంగా మాట్లాడారు. గత వైఎస్సార్‌సీపీ(YSRCP) ప్రభుత్వ తుగ్లక్ నిర్ణయాలు, రాష్ట్రవ్యాప్త విధ్వంసం కారణంగా ఆంధ్రప్రదేశ్ తన పూర్వ వైభవాన్ని, అంతర్జాతీయ బ్రాండ్ ఇమేజ్ ను పూర్తిగా కోల్పోయిందని సీఎం ఆవేదన వ్యక్తం చేశారు. ఆ దారుణమైన నష్టాల నుంచి, విధ్వంసాల నుంచి రాష్ట్రాన్ని ఇప్పుడిప్పుడే గాడిన పెడుతూ కోలుకునేలా చేస్తున్నామని ఆయన పేర్కొన్నారు.

నిరుద్యోగుల కలల ప్రాజెక్ట్ అయిన మెగా డీఎస్సీ నోటిఫికేషన్ ప్రక్రియను అడ్డుకోవడానికి, దానిపై నీలినీడలు కప్పడానికి వైసీపీ నేతలు తెరవెనుక అనేక కుట్రలు, కుతంత్రాలు పన్నారని చంద్రబాబు మండిపడ్డారు. ఈ సందర్భంగా “నిజం నిప్పులాంటిది.. ఆ నిజంతో ఆడుకోవాలని చూస్తే వైసీపీ నేతలు మసైపోతారు” అంటూ సీఎం తీవ్రస్థాయిలో హెచ్చరించారు. కూటమి ప్రభుత్వం రాయలసీమ ప్రాంత అభివృద్ధికి కట్టుబడి ఉందంటూ చంద్రబాబు ఆసక్తికర వ్యాఖ్యలు చేశారు.

రాయలసీమ అంటే ఒకప్పుడు రాళ్ల సీమగా, వర్షాల్లేని ఎడారిగా గుర్తింపు ఉండేదని, కానీ రాబోయే రోజుల్లో దాన్ని రైజింగ్ సీమగా మారుస్తామని భరోసా ఇచ్చారు. గ్లోబల్ హార్టికల్చర్ హబ్, అత్యాధునిక ఎలక్ట్రానిక్స్ తయారీ పరిశ్రమలు, గ్రీన్ ఎనర్జీ ప్రాజెక్టుల ద్వారా రాయలసీమను నిజమైన రతనాల సీమగా మార్చడమే తమ సంకల్పమని స్పష్టం చేశారు. అలాగే భవిష్యత్తులో గోదావరి-కావేరి నదుల అనుసంధానం ప్రాజెక్టును పూర్తి చేయడం ద్వారా.. ఏపీతో పాటు దక్షిణాదిలోని ఐదు రాష్ట్రాలకు శాశ్వతంగా నీటి సమస్యలు, అంతర్రాష్ట్ర జల వివాదాలు లేకుండా చెక్ పెడతామని సీఎం చంద్రబాబు ఆశాభావం వ్యక్తం చేశారు.

ఇటీవల ముగిసిన దసరా శరన్నవరాత్రి ఉత్సవాలకు రాష్ట్రవ్యాప్తంగా భక్తులు రికార్డు స్థాయిలో తరలిరావడానికి కూటమి ప్రభుత్వం ప్రవేశపెట్టిన ‘స్త్రీ శక్తి’ ఉచిత బస్సు ప్రయాణ పథకమే కారణమని, మహిళలు అత్యధిక సంఖ్యలో సురక్షితంగా ప్రయాణించి దేవుని దర్శనాలు చేసుకున్నారని కొనియాడారు. గత 2024 అసెంబ్లీ ఎన్నికల్లో ఆంధ్రప్రదేశ్ ఓటర్లు దేశ రాజకీయాల్లోనే ఒక అపూర్వమైన చరిత్ర సృష్టించారని ముఖ్యమంత్రి గుర్తుచేశారు. కూటమికి ఏకంగా 94 శాతం స్ట్రైక్ రేట్, 57 శాతం భారీ ఓటు షేర్ అందించి ప్రజలు తమపై అపారమైన నమ్మకాన్ని ఉంచారని పేర్కొన్నారు.