అమెరికాలో ఎన్నారైలకు బిగ్ షాక్.. 540 రోజుల వర్క్ పర్మిట్లపై ట్రంప్ కీలక నిర్ణయం!

అమెరికాలో ఉద్యోగం చేస్తున్న భారతీయులకు ఇప్పుడు మరో టెన్షన్ మొదలైంది. ముఖ్యంగా H-1B వీసాపై ఉద్యోగం చేస్తున్న వారి భార్యాభర్తల్లో ఒకరు కూడా ఉద్యోగం చేస్తుంటే, ఈ కొత్త నిబంధన గురించి తప్పకుండా తెలుసుకోవాలి. ఇన్నాళ్ళూ వర్క్ పర్మిట్ రెన్యువల్ ఆలస్యమైనా, కొన్ని వర్గాల వారికి 540 రోజుల వరకు ఉద్యోగం కొనసాగించే వెసులుబాటు ఉండేది. కానీ ఇప్పుడు అమెరికా ప్రభుత్వం ఆ సదుపాయాన్ని రద్దు చేసింది. దీంతో కొత్త పర్మిట్ చేతికి అందేలోపు పాత పర్మిట్ గడువు ముగిసిపోతే, కొందరు ఉద్యోగులు తాత్కాలికంగా పని ఆపాల్సిన పరిస్థితి వస్తోంది.

అసలు ఈ 540 రోజుల వెసులుబాటు ఎందుకు ఇచ్చారు?

అమెరికాలో ఉద్యోగం చేయడానికి అర్హులైన కొన్ని వర్గాల వలసదారులకు ఎంప్లాయ్‌మెంట్ ఆథరైజేషన్ డాక్యుమెంట్ (EAD) అనే వర్క్ పర్మిట్ అవసరం. దీనికి గడువు ఉంటుంది. గడువు ముగిసేలోపు రెన్యువల్ కోసం దరఖాస్తు చేసినా, అమెరికా పౌరసత్వం, వలస సేవల విభాగం (USCIS) నుంచి కొత్త అనుమతి రావడానికి ఒక్కోసారి చాలా సమయం పడుతుంది. ప్రభుత్వ కార్యాలయాల్లో దరఖాస్తులు పేరుకుపోవడం వల్ల ఏర్పడే ఈ జాప్యానికి ఉద్యోగులు మూల్యం చెల్లించాల్సి రాకూడదనే ఉద్దేశంతో గతంలో ఆటోమేటిక్ ఎక్స్‌టెన్షన్ సదుపాయాన్ని తీసుకొచ్చారు.

ఈ విధానం ప్రకారం అర్హత ఉన్నవారు తమ రెన్యువల్ దరఖాస్తు పెండింగ్‌లో ఉన్నప్పటికీ, నిర్దిష్ట నిబంధనలకు లోబడి గరిష్ఠంగా 540 రోజుల వరకు ఉద్యోగం కొనసాగించగలిగేవారు. అంటే కొత్త పర్మిట్ చేతికి రావడానికి ఆలస్యమైనా, వెంటనే ఉద్యోగం మానేయాల్సిన అవసరం ఉండేది కాదు. 2022లో జో బైడెన్ ప్రభుత్వం ఈ సదుపాయాన్ని ప్రవేశపెట్టగా, 2024లో దీన్ని పునరుద్ధరించి మరింత విస్తరించింది. ఇప్పుడు ట్రంప్ ప్రభుత్వం కొన్ని వర్గాలకు ఈ రక్షణను తొలగించింది.

H-1B వీసాదారుల భార్యాభర్తలకు ఎందుకీ టెన్షన్?

అమెరికాలో H-1B వీసాపై పనిచేసే భారతీయుల జీవిత భాగస్వాముల్లో కొందరు H-4 వీసాపై ఉంటారు. అర్హత కలిగిన H-4 వీసాదారులు EAD తీసుకుని ఉద్యోగాలు చేస్తుంటారు. ఇలాంటి కుటుంబాల్లో ఒకరు ఉద్యోగం చేస్తున్నప్పటికీ, మరొకరు కూడా సంపాదించడం వల్ల ఇంటి ఆర్థిక పరిస్థితి మరింత స్థిరంగా ఉంటుంది.

ఉదాహరణకు ..భర్త H-1B వీసాపై సాఫ్ట్‌వేర్ ఉద్యోగం చేస్తున్నాడు. భార్య H-4 వీసాపై ఉండి, తన వర్క్ పర్మిట్ ఆధారంగా మరో కంపెనీలో పనిచేస్తోంది. ఆమె EAD గడువు ముగిసేలోపు రెన్యువల్ కోసం దరఖాస్తు చేసినా, కొత్త పర్మిట్ ఇంకా రాలేదు. గతంలో ఆమెకు వర్తించే ఆటోమేటిక్ ఎక్స్‌టెన్షన్ ఉంటే, ఆ సదుపాయం ఆధారంగా ఉద్యోగం కొనసాగించే అవకాశం ఉండేది. కానీ కొత్త నిబంధన ప్రకారం ఆ పొడిగింపు వర్తించకపోతే, కొత్త అనుమతి వచ్చే వరకు ఆమె చేస్తున్న ఉద్యోగం ఆపాల్సి రావచ్చు.

ఇలాంటి పరిస్థితిలో జీతం ఆగిపోవడమే కాదు, ఉద్యోగంలో గ్యాప్ కూడా ఏర్పడుతుంది. ఇంటి అద్దె, కారు రుణాల వాయిదాలు, పిల్లల డేకేర్ ఖర్చులు, ఆరోగ్య బీమా.. ఇలా అమెరికాలో ప్రతి నెలా తప్పనిసరిగా చెల్లించాల్సిన ఖర్చులు చాలానే ఉంటాయి. అందుకే ఈ మార్పు కేవలం వీసా పత్రాలకు సంబంధించిన విషయం మాత్రమే కాదు; కొన్ని కుటుంబాల నెలవారీ ఆర్థిక ప్రణాళికను కూడా ప్రభావితం చేసే అవకాశం ఉందనే ఆందోళన నెలకొంది.

అమెరికాలో పనిచేస్తున్న భారతీయులందరికీ ఈ ప్రమాదం ఉందా?

ఈ కొత్త నిబంధన అన్ని వీసాదారుల వర్క్ పర్మిట్లను రద్దు చేయదు. ముఖ్యంగా ఆటోమేటిక్ ఎక్స్‌టెన్షన్‌కు అర్హత ఉన్న కొన్ని వర్గాలకే ఈ మార్పు వర్తిస్తుంది. అందువల్ల ప్రతి ఒక్కరూ తమ వీసా కేటగిరీ, పర్మిట్ గడువు, రెన్యువల్ దరఖాస్తు స్థితిని బట్టి పరిస్థితిని అర్థం చేసుకోవాలి.

ఉదాహరణకు, STEM విభాగాల్లో చదివిన F-1 విద్యార్థులు తమ OPT పొడిగింపునకు అర్హులై, గడువులోపు దరఖాస్తు చేస్తే 180 రోజుల ఆటోమేటిక్ ఎక్స్‌టెన్షన్ పొందే సదుపాయం కొనసాగుతుంది. అలాగే L, E వీసాదారుల జీవిత భాగస్వాముల్లో అర్హత కలిగినవారికి వీసా స్థితి ఆధారంగా ఉద్యోగ అనుమతి పొందే విధానం కొనసాగుతుంది. వారికి ప్రత్యేక EAD అవసరం లేని సందర్భాలు కూడా ఉన్నాయి.

మరోవైపు, అసైలమ్ దరఖాస్తుదారులు, శరణార్థులు, Temporary Protected Status (TPS) లబ్ధిదారులు, స్టేటస్ మార్పు కోసం దరఖాస్తు చేసుకున్న కొన్ని వర్గాలు కూడా కొత్త నిబంధన పరిధిలోకి రావచ్చు. కాబట్టి సోషల్ మీడియాలో కనిపించే ప్రతి వార్తను చూసి అందరి ఉద్యోగాలు ప్రమాదంలో పడ్డాయని భయపడాల్సిన అవసరం లేదు. తమకు వర్తించే నిబంధన ఏమిటో తెలుసుకోవడమే ముఖ్యం.

వర్క్ పర్మిట్లే కాదు.. వీసా రెన్యువల్స్‌పైనా మరింత పరిశీలన?

ఇంతటితో విషయం ముగియడం లేదు. కొన్ని నాన్-ఇమిగ్రెంట్ వీసాల పొడిగింపు దరఖాస్తులను మరింత క్షుణ్ణంగా పరిశీలించే మరో ప్రతిపాదనను కూడా ట్రంప్ ప్రభుత్వం ముందుకు తెచ్చింది. ఇప్పటివరకు కొన్ని సందర్భాల్లో గతంలో వీసా లేదా పిటిషన్ ఆమోదం పొందిన వారికి రెన్యువల్ సమయంలో పాత నిర్ణయానికి ప్రాధాన్యం ఇచ్చే విధానం ఉండేది. కొత్త ప్రతిపాదన ప్రకారం, అధికారులు ప్రతి దరఖాస్తును దాని అర్హతల ఆధారంగా మళ్లీ పరిశీలించవచ్చు.

ఇది అమల్లోకి వస్తే ఉద్యోగులు, వారిని నియమించుకున్న కంపెనీలు మరిన్ని పత్రాలు, ఆధారాలు సమర్పించాల్సి రావచ్చు. అదనపు వివరాలు కోరుతూ RFEలు జారీ చేయడం, దరఖాస్తుల పరిశీలన ఆలస్యం కావడం, న్యాయపరమైన ఖర్చులు పెరగడం వంటి పరిణామాలు ఎదురయ్యే అవకాశం ఉంది. అయితే ఇక్కడ ఒక ముఖ్యమైన తేడా ఉంది. వర్క్ పర్మిట్ ఆటోమేటిక్ ఎక్స్‌టెన్షన్ రద్దు తుది నిబంధన కాగా, వీసా రెన్యువల్స్‌పై మరింత కఠిన పరిశీలనకు సంబంధించిన ఈ మార్పు ఇంకా ప్రతిపాదన దశలోనే ఉంది. దీనిపై ప్రజల అభిప్రాయాలను తెలియజేయడానికి నవంబర్ 13 వరకు గడువు ఇచ్చారు.

ఎన్నారైలు ఇప్పుడు ఏం చేయాలి?

అమెరికాలో ఉద్యోగం చేస్తున్నవారు తమ వర్క్ పర్మిట్ గడువు ముగిసే చివరి రోజు వరకు వేచి ఉండకుండా, ముందుగానే రెన్యువల్ ప్రక్రియపై దృష్టి పెట్టడం మంచిది. అయితే దరఖాస్తును ముందుగా సమర్పించినంత మాత్రాన పర్మిట్ తప్పకుండా సమయానికి వస్తుందని హామీ లేదు. అందుకే ఆటోమేటిక్ ఎక్స్‌టెన్షన్ తమకు వర్తిస్తుందా లేదా అన్నది USCIS తాజా మార్గదర్శకాల ఆధారంగా నిర్ధారించుకోవాలి. అవసరమైతే కంపెనీ HR విభాగంతో మాట్లాడి, ఇమ్మిగ్రేషన్ న్యాయ నిపుణుడి సలహా తీసుకోవాలి.

ముఖ్యంగా H-4 వీసాపై ఉండి EAD ద్వారా ఉద్యోగం చేస్తున్నవారు తమ పర్మిట్ గడువు, రెన్యువల్ దరఖాస్తు తేదీ, వర్తించే మినహాయింపులను జాగ్రత్తగా పరిశీలించాలి. పాత నిబంధనల ప్రకారం తమకు 540 రోజుల పొడిగింపు వస్తుందని భావించి ఉద్యోగం కొనసాగించడం ఇబ్బందులకు దారితీయవచ్చు. తమకు చట్టబద్ధంగా పని చేసే అనుమతి ఉందో లేదో స్పష్టంగా తెలుసుకున్న తర్వాతే తదుపరి నిర్ణయం తీసుకోవాలి.

అమెరికాలో ఉద్యోగం ఉన్నా.. ఇక ప్రతిదీ ముందుగానే ప్లాన్ చేసుకోవాల్సిందేనా?

అమెరికాకు వెళ్లి ఉద్యోగం సంపాదించడం ఒక ఎత్తయితే, అక్కడి వీసా నిబంధనలకు అనుగుణంగా ఉద్యోగాన్ని నిరంతరాయంగా కొనసాగించడం మరో ఎత్తుగా మారుతోంది. ముఖ్యంగా భార్యాభర్తలిద్దరూ ఉద్యోగాలు చేస్తూ కుటుంబాన్ని నడిపించే ఎన్నారైలకు, వర్క్ పర్మిట్ రెన్యువల్‌లో వచ్చే జాప్యం కూడా పెద్ద సమస్యగా మారవచ్చు. ఒకరి ఉద్యోగం తాత్కాలికంగా ఆగిపోయినా, ఇంటి ఖర్చులు మాత్రం ఆగవు కదా!

—సూర్య ప్రకాష్ జోశ్యుల

అందుకే అమెరికాలో ఉద్యోగం చేస్తున్న ఎన్నారైలు ఇప్పుడు తమ వీసా గడువులనే కాదు, వర్క్ పర్మిట్ రెన్యువల్‌ను కూడా కుటుంబ ఆర్థిక భద్రతలో ఒక ముఖ్యమైన భాగంగా చూడాల్సిన పరిస్థితి ఏర్పడింది.