పవన్ ఫామ్హౌస్ వివాదంపై క్లారిటీ.. ఆక్రమణ ఆరోపణలకు చెక్..
- Published By: Bhuvana
- July 21, 2026 / 06:18 PM IST
ఆంధ్రప్రదేశ్ (Andhra Pradesh) ఉప ముఖ్యమంత్రి, జనసేన (Jana Sena) అధ్యక్షుడు పవన్ కళ్యాణ్ (Pawan Kalyan)కు చెందిన హైదరాబాద్ (Hyderabad) శివార్లలోని ఫామ్హౌస్ ఇటీవల సోషల్ మీడియాలో పెద్ద చర్చకు దారితీసింది. ఆ భూమి చెరువు పరిధిలో ఉందని, అక్రమంగా ఆక్రమించి నిర్మాణాలు చేపట్టారని కొన్ని సోషల్ మీడియా ఖాతాలు, యూట్యూబ్ ఛానళ్లు ఆరోపించాయి. ఈ ప్రచారం రాజకీయ వర్గాల్లో కూడా చర్చనీయాంశంగా మారింది.
ఈ వివాదంపై పవన్ కళ్యాణ్ కూడా స్పందిస్తూ, తనపై వస్తున్న ఆరోపణల్లో నిజం ఉంటే ఆ స్థలాన్ని ప్రభుత్వానికి అప్పగించేందుకు సిద్ధంగా ఉన్నానని సవాల్ విసిరారు. తన భూమికి సంబంధించిన అన్ని పత్రాలు చట్టబద్ధంగానే ఉన్నాయని, అక్రమ ఆక్రమణ జరిగిందని ఎవరైనా నిరూపిస్తే తాను వెనుకాడబోనని ఆయన స్పష్టం చేశారు. దీంతో ఈ అంశం మరింత ప్రాధాన్యం సంతరించుకుంది.
తాజాగా ఈ వివాదంపై హైడ్రా (HYDRAA) కమిషనర్ రంగనాథ్ (Ranganath) వివరణ ఇవ్వడంతో పరిస్థితిపై కొంత స్పష్టత వచ్చింది. పవన్ కళ్యాణ్ 2014లో దాదాపు పది ఎకరాల భూమిని కొనుగోలు చేసినట్లు ఆయన తెలిపారు. అనంతరం 2016–17 మధ్యకాలంలో జరిగిన సర్వే, రీమార్కింగ్ ప్రక్రియలో ఆ భూమిలోని కొంత భాగం చెరువు పూర్తి స్థాయి నీటి మట్టం (FTL – Full Tank Level) పరిధిలోకి వచ్చినట్లు గుర్తించారని వివరించారు. అదే సమయంలో మిగిలిన భూమి ఈ పరిధికి బయటే ఉందని చెప్పారు.
రంగనాథ్ వివరణ ప్రకారం, చెరువుల పరిధిలో వ్యక్తిగత పట్టా భూములు ఉండటం అసాధారణం కాదని పేర్కొన్నారు. రాష్ట్రంలోని అనేక ప్రాంతాల్లో ఇలాంటి పరిస్థితులు కనిపిస్తాయని, అలాంటి భూముల్లో వ్యవసాయం చేయడానికి అవకాశం ఉంటుందని చెప్పారు. అయితే చెరువుకు నష్టం కలిగించే నిర్మాణాలు లేదా నీటి ప్రవాహాన్ని అడ్డుకునే చర్యలు మాత్రం నిబంధనలకు విరుద్ధమని ఆయన వివరించారు.
పవన్ కళ్యాణ్కు చెందిన భూమిలో చెరువు నీటి ప్రవాహానికి ఎలాంటి ఆటంకం కలిగించలేదని, చెరువును ఆక్రమించి నిర్మాణాలు చేపట్టిన ఆధారాలు తమ పరిశీలనలో లభించలేదని రంగనాథ్ స్పష్టం చేశారు. కేవలం భూమికి కంచె ఏర్పాటు చేసిన విషయం మాత్రమే గుర్తించినట్లు తెలిపారు. అదే ప్రాంతంలో కొంతమంది ఇతర భూ యజమానులు మట్టి నింపడం, నిర్మాణాలు చేపట్టడం వంటి చర్యల ద్వారా నిబంధనలు ఉల్లంఘించినట్లు గుర్తించామని, కానీ పవన్ కళ్యాణ్ భూమిలో అలాంటి పరిస్థితి లేదని వెల్లడించారు.
ఈ నేపథ్యంలో సోషల్ మీడియాలో ప్రచారం అవుతున్న ఆరోపణలపై కూడా ఆయన స్పందించారు. పూర్తి వివరాలు తెలుసుకోకుండా కొందరు తప్పుడు సమాచారం ప్రచారం చేస్తున్నారని, వాస్తవాలను పరిశీలించకుండా వస్తున్న వార్తలను ప్రజలు నమ్మకూడదని సూచించారు. పవన్ కళ్యాణ్ చెరువును ఆక్రమించారనే ప్రచారానికి తమ పరిశీలనలో ఆధారాలు లభించలేదని ఆయన వెల్లడించారు.
ఈ వివరణతో పవన్ కళ్యాణ్ ఫామ్హౌస్పై నెలకొన్న వివాదానికి కొత్త మలుపు తిరిగింది. అయినప్పటికీ ఈ అంశంపై రాజకీయ విమర్శలు, ప్రతివిమర్శలు కొనసాగుతున్నాయి. అయితే అధికారిక విచారణలో వెల్లడైన వివరాల ప్రకారం అక్రమ నిర్మాణాలు లేదా చెరువు ఆక్రమణ జరిగినట్లు నిర్ధారణ కాలేదని హైడ్రా కమిషనర్ చేసిన వ్యాఖ్యలు ఇప్పుడు రాజకీయంగా కూడా ప్రాధాన్యం సంతరించుకున్నాయి.
