ట్రంప్ ది మోసపు పాలన.. ఎన్నికల ప్రచారంలో ఒబామా ఫైర్..!
- Published By: Srinivas Mohan
- October 27, 2026 / 08:09 AM IST
అమెరికా మధ్యంతర ఎన్నికల ప్రచారం పీక్స్ కు చేరింది. ఓవైపు ట్రంప్ సుడిగాలి పర్యటనలు చేస్తుంటే.. మరోవైపు విపక్షం తరపున మాజీ అధ్యక్షుడు ఒబామా ఎన్నికల ప్రచారం నిర్వహిస్తున్నారు. ఎన్నికల ప్రచారంలో ఒబామా.. ట్రంప్ పాలన విధానాలపై తీవ్రస్థాయిలో విరుచుకుపడుతున్నారు. ముఖ్యంగా ఇరాన్‌తో ఉద్రిక్తతలు, సుంకాల విధింపు, అధ్యక్ష పదవిని స్వప్రయోజనాలకు వాడుకోవడం వంటి అంశాలపై ఒబామా తీవ్ర ఆరోపణలు చేశారు.
“ఎవరూ కోరని, ఎవరూ ఓటు వేయని అనవసరమైన యుద్ధానికి” ట్రంప్ తెరలేపారని ఒబామా విమర్శించారు. తన హయాంలో కుదుర్చుకున్న అణు ఒప్పందం కారణంగా ఒక్క క్షిపణిని కూడా ప్రయోగించాల్సిన అవసరం లేకుండానే ఇరాన్‌ను అణ్వాయుధాల తయారీ నుంచి నిరోధించగలిగామని ఆయన గుర్తుచేశారు. అయితే, గత ఏడు నెలలుగా సాగుతున్న ఘర్షణల వల్ల మిత్రదేశాలు, అమెరికా సైనిక స్థావరాలపై దాడులు జరిగాయని.. ఈ క్రమంలో అమెరికన్లు ప్రాణాలు కోల్పోవడమే కాకుండా పలువురు గాయపడ్డారని ఆయన ఆవేదన వ్యక్తం చేశారు. హర్మూజ్ జలసంధిపై ఇరాన్‌కు పట్టుచిక్కడం వల్లే చమురు, డీజిల్ ధరలు పెరిగాయని మండిపడ్డారు.
ట్రంప్‌కు “సుంకాలంటే అమితమైన ఇష్టం” అని, అయితే వాటి భారం అంతిమంగా వినియోగదారులపైనే పడుతుందని హెచ్చరించినా ఆయన పట్టించుకోలేదని ఒబామా ఎద్దేవా చేశారు. ట్రంప్ పాలనను ఒక “మోసపూరిత వ్యవస్థ” (గ్రిఫ్టర్ ప్రెసిడెన్సీ) గా అభివర్ణించిన ఆయన, అధ్యక్ష పదవిని ట్రంప్ స్వప్రయోజనాల కోసం వినియోగించుకుంటున్నారని ఆరోపించారు. మీమ్ కాయిన్లు, తన సంతానానికి చెందిన కంపెనీలకు పన్ను చెల్లింపుదారుల నిధులతో కాంట్రాక్టులు కట్టబెట్టడం, వెనిజులాకు చెందిన బిలియనీర్‌కు క్షమాభిక్ష ప్రసాదించడం వంటి అంశాలను ఈ సందర్భంగా ఒబామా ఉదహరించారు.
నవంబర్ 3న జరగనున్న మధ్యంతర ఎన్నికలు ట్రంప్ ప్రభుత్వ నిర్ణయాలకు అడ్డుకట్ట వేయడానికి లభించిన ఆఖరి అవకాశమని ఒబామా పేర్కొన్నారు. ఈ ర్యాలీలో ఒహాయో గవర్నర్ అభ్యర్థి అమీ యాక్టన్, సెనేట్ అభ్యర్థి షెర్రాడ్ బ్రౌన్‌లకు మద్దతుగా ఆయన ప్రచారం నిర్వహించారు. క్లీవ్‌ల్యాండ్ సభ అనంతరం ఆయన మిషిగాన్‌లోని డెట్రాయిట్‌లో జరగనున్న ప్రచార కార్యక్రమానికి బయలుదేరి వెళ్లారు.
