BRICS: బ్రిక్స్ ఉమ్మడి కరెన్సీపై క్లారిటీ ఇచ్చిన బ్రెజిల్ అధ్యక్షుడు లూలా!

బ్రిక్స్ (BRICS) దేశాలన్నీ కలిసి అమెరికా డాలర్‌కు ప్రత్యామ్నాయంగా ఒకే ఉమ్మడి కరెన్సీని తీసుకురాబోతున్నాయంటూ గత కొంతకాలంగా అంతర్జాతీయ స్థాయిలో జోరుగా ప్రచారం సాగుతోంది. అయితే ఈ వార్తలపై బ్రెజిల్ అధ్యక్షుడు లూయిజ్ ఇనాసియో లూలా డా సిల్వా తాజాగా స్పష్టతనిచ్చారు. బ్రిక్స్ సభ్య దేశాల మధ్య ఉమ్మడి కరెన్సీ గురించి ఎలాంటి అధికారిక చర్చలు జరగడం లేదని ఆయన స్పష్టం చేశారు. శనివారం ఒక ప్రముఖ మీడియా సంస్థకు ఇచ్చిన ప్రత్యేక ఇంటర్వ్యూలో ఆయన ఈ విషయాలను వెల్లడించారు.

ఊహాగానాలను కొట్టిపారేసిన లూలా..
బ్రిక్స్ (BRICS) కరెన్సీ అనేది ప్రస్తుతం తమ చర్చల జాబితాలోనే లేదని లూలా పేర్కొన్నారు. దీనిపై జరుగుతున్న ప్రచారం అంతా కేవలం తప్పుగా అర్థం చేసుకోవడం వల్ల వచ్చిందే తప్ప, ప్రాథమికంగా అలాంటి ప్రతిపాదనేదీ సభ్య దేశాల ముందు లేదని ఆయన వివరించారు. ఈ ప్రకటనతో బ్రిక్స్ కరెన్సీపై నెలకొన్న సందిగ్ధతకు తెరపడినట్లయింది.

స్థానిక కరెన్సీలతోనే వాణిజ్యం..
డాలర్ అవసరం లేకుండా వాణిజ్యాన్ని నిర్వహించడంపై లూలా ఆసక్తికర వ్యాఖ్యలు చేశారు. భారత్-బ్రెజిల్ (BRICS) మధ్య వ్యాపారం జరగాలంటే అమెరికా డాలర్ మాత్రమే ఏకైక మార్గం కాకూడదని ఆయన అభిప్రాయపడ్డారు. ఇరు దేశాలు తమ తమ స్వదేశీ కరెన్సీలలో (రూపాయి-రియల్) లావాదేవీలు జరుపుకునే దిశగా అడుగులు వేయాలని సూచించారు. ఇది కొంత కష్టమైన ప్రక్రియే అయినప్పటికీ, దీర్ఘకాలంలో దేశాలకు ప్రయోజనకరంగా ఉంటుందన్నారు. “డాలర్ ప్రపంచంలోనే అత్యంత బలమైన కరెన్సీ. ఇతర కరెన్సీలు దాని స్థానాన్ని ఆక్రమించాలని చూస్తే సహజంగానే ప్రతిఘటన ఎదురవుతుంది. అయితే స్థానిక కరెన్సీల వాడకం అనేది డాలర్‌కు వ్యతిరేకంగా చేసే యుద్ధం కాదు, కేవలం వ్యాపారంలో దేశాలకు మరిన్ని ప్రత్యామ్నాయాలను (Options) కల్పించడమే” అని ఆయన విశ్లేషించారు.