లాస్ వెగాస్‌లో ఘనంగా ‘వికసిత్ భారత్ రన్ 2026’.. ఫిట్‌నెస్, ఐక్యత సందేశంతో ఉత్సాహంగా పాల్గొన్న క్రీడాకారులు!

అమెరికాలోని లాస్ వెగాస్‌లో ‘స్వస్థ భారత్, వికసిత్ భారత్’ నినాదంతో వికసిత్ భారత్ రన్ 2026(Viksit Bharat Run 2026) కార్యక్రమం అత్యంత విజయవంతంగా నిర్వహించారు. లాస్ వెగాస్‌లోని భారత కాన్సులేట్ జనరల్(లాస్ ఏంజిల్స్), ఫ్రెండ్స్ ఆఫ్ ఇండియా – లాస్ వెగాస్ సంయుక్తంగా ఈ కార్యక్రమాన్ని ఏర్పాటు చేశాయి. అన్ని వయసుల వర్గాలకు చెందిన వందలాది మంది కమ్యూనిటీ సభ్యులు ఈ రన్‌లో ఉత్సాహంగా పాల్గొని ఫిట్‌నెస్, ఐక్యత, కమ్యూనిటీ భాగస్వామ్యాన్ని చాటారు.

పొంగిపొర్లిన దేశభక్తి…
భారతీయ ప్రవాస కమ్యూనిటీ సభ్యుల ఆలపించిన వందేమాతరం, జాతీయ గీతాలాపనతో ఈ కార్యక్రమం దేశభక్తి భావనలతో అట్టహాసంగా ప్రారంభమైంది. లాస్ వెగాస్‌లోని ప్రవాస భారతీయుల బలమైన కమ్యూనిటీ స్ఫూర్తిని ప్రతిబింబించేలా చిన్నారులు, యువకులు, పెద్దలు, సీనియర్ సిటిజన్లు ఈ పరుగులో ఎంతో ఉత్సాహంగా పాలుపంచుకున్నారు. కేవలం పరిమితం కాకుండా, ఆరోగ్యవంతమైన జీవనం, ఐక్యత, భారతదేశ అభివృద్ధి ప్రయాణంపై తమకు ఉన్న భాగస్వామ్య నిబద్ధతను చాటేందుకు అందరూ ఒక్కచోట చేరారు.

కాన్సుల్ జనరల్ ప్రత్యేక సంభాషణ
ఈ పరుగు ముగిసిన అనంతరం కాన్సుల్ జనరల్ డా.కె.జె. శ్రీనివాస(Dr. K. J. Srinivasa) కమ్యూనిటీ సభ్యులతో ముచ్చటించారు. ప్రవాస భారతీయులకు ఆసక్తికరంగా ఉన్న వివిధ అంశాలు, సమస్యలపై చర్చించడంతో పాటు కాన్సులేట్‌తో నేరుగా మమేకమయ్యేందుకు, తమ అభిప్రాయాలను, ఆందోళనలను పంచుకునేందుకు ఈ వేదిక ఎంతో దోహదపడింది. ఆరోగ్యవంతమైన సమాజమే బలమైన, మరింత అభివృద్ధి చెందిన భారతదేశ నిర్మాణంలో కీలక భాగమనే బలమైన సందేశాన్ని ఈ పరుగు అందించింది. “స్వస్థ భారత్. వికసిత్ భారత్. రన్ ఫర్ యూనిటీ. రన్ ఫర్ ప్రోగ్రెస్.” అనే నినాదాలతో ఈ కార్యక్రమం దిగ్విజయంగా ముగిసింది.