టాంటెక్స్ 5కే వాక్/రన్ గ్రాండ్ సక్సెస్.. ఉత్సాహంగా పాల్గొన్న ప్రవాసులు!

ఆరోగ్యం, ఫిట్‌నెస్, కమ్యూనిటీ సేవా కార్యక్రమాలను ప్రోత్సహించే ఉద్దేశంతో తెలుగు అసోసియేషన్ ఆఫ్ నార్త్ టెక్సాస్(TANTEX) ఆధ్వర్యంలో 5కే వాక్/రన్ (5K Walk/Run) కార్యక్రమం అత్యంత విజయవంతంగా నిర్వహించారు. ఆరోగ్యకరమైన జీవనశైలిని అలవర్చుకోవడం, సమాజానికి తిరిగి సేవ చేయడం అనే లక్ష్యంతో నిర్వహించిన ఈ వేడుకకు 150 మందికి పైగా కమ్యూనిటీ సభ్యులు ఉత్సాహంగా తరలివచ్చారు.

ఆరోగ్య అవగాహన, ప్రత్యేక కార్యక్రమాలు
ఈ కార్యక్రమంలో పాల్గొన్న వారికోసం కేవలం పరుగే కాకుండా పలు రకాల ఆరోగ్య పరీక్షలు, అవగాహన కార్యక్రమాలను ఏర్పాటు చేశారు.

వామ్-అప్ వ్యాయామాలు నిర్వహించారు.

రక్తపోటు మానిటరింగ్ చేపట్టారు.

బీఎంఐ కొలతలు తీసుకున్నారు.

ప్రాణాలను రక్షించే హ్యాండ్స్-ఆన్ సీపీఆర్(Hands-on CPR) శిక్షణను అందించారు.

ఉచితంగా పైలేట్స్ ప్రదర్శన ఏర్పాటు చేశారు.

చివరగా అందరూ కలిసి ఉత్సాహంగా 5కే వాక్/రన్ పూర్తి చేశారు.

దక్షిణాసియా ప్రజల్లో గుండె జబ్బులను నివారించడానికి కృషి చేస్తున్న దిల్ సే(DilSe) ప్రోగ్రామ్ ఆధ్వర్యంలో సీపీఆర్ శిక్షణ ఇచ్చారు. అలాగే క్లబ్ పైలేట్స్-ఈస్ట్ ఫ్రిస్కో బృందం అందజేసిన అద్భుతమైన పైలేట్స్ ప్రదర్శన ఈవెంట్‌కు మరింత ఊపునిచ్చింది.

యువ వాలంటీర్ల సేవలు
ఈ కార్యక్రమానికి నిధన్ రియల్టీ & మార్ట్‌గేజ్ సర్వీసెస్, వైట్ లోటస్ డెంటల్, రాడికో వెల్త్ పార్ట్‌నర్స్ సంస్థలు టీ-షర్ట్ స్పాన్సర్లుగా వ్యవహరించాయి. ఈ వేడుకలో 20 మందికి పైగా చిన్నారులు , యువ వాలంటీర్లు 5కే పరుగులో పాల్గొనడంతో పాటు సీపీఆర్ శిక్షణలో సహాయపడి భవిష్యత్ నాయకులుగా తమ ప్రతిభను చాటుకున్నారు.

ఫ్రిస్కో ఫ్యామిలీ సర్వీసెస్‌కు విరాళం
నార్త్ టెక్సాస్ కమ్యూనిటీకి సేవ చేయడంలో భాగంగా టాంటెక్స్ సంస్థ.. గత 30 సంవత్సరాలుగా ఆకలి, అత్యవసర అవసరాలతో సతమతమవుతున్న కుటుంబాలకు సహాయం చేస్తున్న ఫ్రిస్కో ఫ్యామిలీ సర్వీసెస్(Frisco Family Services) నాన్‌ప్రాఫిట్ సంస్థకు వెయ్యి డాలర్ల విరాళాన్ని అందజేసింది. “కలిసి నడుద్దాం.. కలిసి సేవ చేద్దాం.. మార్పును తెద్దాం” అనే నినాదంతో ఈ కార్యక్రమం ముగిసింది. ఈ వేడుకను విజయవంతం చేయడానికి సహకరించిన ప్రతి ఒక్కరికి, స్పాన్సర్లకు, వాలంటీర్లకు టాంటెక్స్ కార్యవర్గం కృతజ్ఞతలు తెలిపింది.