Natyanjali 2026: సేవా యజ్ఞంలో భాగమైన ‘నటరాజ నాట్యాంజలి’.. అల్ఫారెట్టాలో మార్మోగిన నాట్య గజ్జెల సవ్వడి!

Natyanjali 2026: నటరాజ నాట్యాంజలి కూచిపూడి డ్యాన్స్ అకాడమీ ఆధ్వర్యంలో నిర్వహించిన “నాట్యాంజలి – 2026” వేడుకలు, అల్ఫారెట్టా డెన్మార్క్ హై స్కూల్‌లో కన్నులపండువగా జరిగాయి. “Dance for a Cause” (ఒక మంచి ఆశయం కోసం నృత్యం) అనే నినాదంతో నిర్వహించిన ఈ వేడుకకు 700 మందికి పైగా ప్రేక్షకులు హాజరయ్యారు. ఈ కార్యక్రమం ద్వారా భారతదేశం , అమెరికాలోని మూడు ప్రధాన సేవా సంస్థల కోసం నిధులను సేకరించారు.

కళాకారుల ప్రతిభ:
ఈ నృత్యోత్సవంలో అకాడమీకి చెందిన 168 మంది విద్యార్థులు పాల్గొన్నారు. 4 సంవత్సరాల పిన్న వయస్కుల నుండి 45 ఏళ్ల వయస్సు గల కళాకారుల వరకు అంతా కలిసి 28 రకాల కూచిపూడి నృత్య ప్రదర్శనలు ఇచ్చి ప్రేక్షకులను మంత్రముగ్ధులను చేశారు. భారతీయ శాస్త్రీయ నృత్య కళను అన్ని తరాలకు విస్తరించాలనే అకాడమీ లక్ష్యం ఈ వేడుకలో స్పష్టంగా కనిపించింది.

సమకూరిన నిధులు ఈ సంస్థలకు:
ఈ కార్యక్రమం ద్వారా సేకరించిన మొత్తాన్ని ఈ క్రింది సంస్థలకు అందజేయనున్నారు.

• శాంతినికేతన్ రిహాబిలిటేషన్ సెంటర్ ఫర్ ది డిసేబుల్డ్ చిల్డ్రెన్
• ది ప్లేస్ (The Place)
• శంకర నేత్రాలయ యూఎస్ఏ (Sankara Nethralaya USA)

గురువుగారి కృషి:
ఈ కార్యక్రమ విజయానికి అకాడమీ నృత్య గురువు నీలిమ గడ్డమనుగు గారి అచంచలమైన శ్రమ, అంకితభావమే ప్రధాన కారణం. చిన్నారుల నుండి పెద్దల వరకు ప్రతి ఒక్కరినీ శ్రద్ధగా తీర్చిదిద్దుతూ, వారిలోని కళాత్మకతను వెలికితీస్తూ ఆమె అందించిన మార్గదర్శకత్వం ప్రతి ప్రదర్శనలోనూ ప్రతిఫలించింది.

హాజరైన ప్రముఖులు:
ఈ వేడుకకు పలువురు సామాజిక నాయకులు హాజరయ్యారు. వారిలో బాల ఇందుర్తి, మాధవి ఇందుర్తి (శంకర నేత్రాలయ), గిరిధర్ కొటగిరి (IFA అధ్యక్షులు), జ్యోత్స్న పాలకుర్తి (GATES చైర్మన్), రమణ గంద్ర (GATES అధ్యక్షులు), సునీత పోట్నూరు (TAMA అధ్యక్షురాలు), ఆది శ్రీనివాసన్, శ్రీరామ్ రోయ్యాల, క్రిస్టీ ఫెరెన్సీ, జనార్ధన్ పన్నెల తదితరులు ఉన్నారు.

నిర్వహణ , సహకారం:
కార్యక్రమాన్ని శ్రీవల్లి శ్రీధర్ గారు వ్యాఖ్యాతగా (MC) అద్భుతంగా నడిపించారు. వేదిక ఏర్పాట్లు, సౌండ్ , లైటింగ్ బాధ్యతలను శివ గడ్డమనుగు గారు విజయవంతంగా నిర్వహించారు. జనార్ధన్ పన్నెల గారు ఇతర నిర్వహణ ఏర్పాట్లను సమన్వయం చేశారు. 3RDI ఫోటో & వీడియో తరపున రఘు వలుసాని ఫోటోగ్రఫీ సేవలు అందించారు.

ఈ కార్యక్రమానికి హెచ్‌సీ రోబోటిక్స్ (వెంకట్ చుండి), కోడ్ హీరో అకాడమీ (వెంకట్ , ప్రణీత కాకుల), రెడ్డి సీపీఏ, స్ప్లాష్ బీఐ (కిరణ్ రెడ్డి పాశం), రాపిడ్ ఐటి (గౌతమ్ గోలి), ట్రూవు ఫైనాన్షియల్ ప్రొఫెషనల్స్ (పరిమళ , శ్రవణ్ మరిపెల్లి), కళ ది ఆర్ట్ (కాత్యాయని పినిక), రాగం తాళం పల్లవి మ్యూజిక్ అకాడమీ (శ్రీవల్లి శ్రీధర్), ఫ్యామిలీ ఫస్ట్ ప్రైమరీ క్లినిక్ (డా. సుధాకర్ జొన్నలగడ్డ), శేఖర్స్ రియాల్టీ, వెంకట్ దుగ్గిరెడ్డి వంటి స్పాన్సర్లు అండగా నిలిచారు.

తల్లిదండ్రులు, వాలంటీర్లు , దాతల సహకారంతో ‘నాట్యాంజలి’ కేవలం ఒక సాంస్కృతిక వేడుకగా మాత్రమే కాకుండా ఒక గొప్ప సామాజిక సేవగా నిలిచింది..