తమిళ సినిమాకు తెలుగు రాష్ట్రాల్లో టికెట్ ధ‌ర‌లు పెంచ‌డం అవ‌స‌ర‌మా?

సూపర్‌స్టార్ రజనీకాంత్(rajinikanth) నటించిన జైలర్2(jailer2) రిలీజ్ కు ముందే టికెట్ ధరల పెంపు అంశం చర్చనీయాంశంగా మారింది. అక్టోబర్ 15న ప్రేక్షకుల ముందుకు రానున్న ఈ సినిమాకు ఏపీలోని ఓ జిల్లా కేంద్రం మల్టీప్లెక్స్‌లో టికెట్ ధరలు చెన్నైతో పోలిస్తే ఎక్కువగా ఉండటం సినీ ప్రియుల దృష్టిని ఆకర్షిస్తోంది. ఒక్కో టికెట్‌పై రూ.50 నుంచి రూ.75 వరకు అదనపు భారం పడేలా ధరల పెంపునకు ప‌ర్మిష‌న్స్ రావ‌డంతో సోషల్ మీడియాలో విమర్శలు వ్యక్తమవుతున్నాయి. స్కూళ్ల‌కు, కాలేజీల‌కు సెలవులు ఉండటంతో థియేటర్లలో ఆక్యుపెన్సీ పెరిగే అవకాశాలున్న ఈ టైమ్ లో ధరలు పెంచడం ప్రేక్షకులకు భారంగా మారుతుందనే అభిప్రాయాలు వినిపిస్తున్నాయి.

టికెట్ ధరల పెంపుపై ప్రధానంగా మరో ప్రశ్న తెరపైకి వస్తోంది. జైలర్2 తమిళ సినిమా అయిన‌ప్పుడు, ఇతర రాష్ట్రాల కంటే ఏపీలోనే అధిక ధరలు ఎందుకు చెల్లించాలనేది ఆడియ‌న్స్ డౌట్. భారీ బడ్జెట్ తెలుగు సినిమాల‌కు పెట్టుబడుల రికవరీ కోసం ధరల పెంపునకు ప‌ర్మిష‌న్స్ ఇవ్వడాన్ని కొందరు సమర్థిస్తున్నప్పటికీ, డ‌బ్బింగ్ సినిమాల‌కు కూడా అదే విధానం వర్తింపజేయడంపై అభ్యంతరాలు వ్యక్తమవుతున్నాయి. నిర్మాతలు అధిక ధరలకు సినిమా రైట్స్ కొనుగోలు చేసి, ఆ భారాన్ని ఆడియ‌న్స్ పై మోపడం ఎంతవరకు సమంజసమనే డిస్క‌ష‌న్ కూడా సాగుతోంది.

గతంలో కేజీఎఫ్(KGF), కాంతార(kaanthara), కూలీ(Coolie) వంటి సినిమాల టికెట్ ధరల పెంపు కూడా చర్చకు దారితీసింది. కొన్ని సినిమాలు క‌లెక్ష‌న్ల‌ పరంగా లాభపడగా, మరికొన్ని ఆశించిన ఫలితాలను అందుకోలేకపోయాయి. మరోవైపు, రణబాలి(Ranabaali) వంటి తెలుగు సినిమాల‌కు ధరల పెంపు లేకుండానే ప్రేక్షకులను ఆకర్షించే ప్రయత్నాలు జరుగుతున్న నేపథ్యంలో, జైలర్2 విషయంలో అనుసరిస్తున్న విధానంపై ప్రశ్నలు తలెత్తుతున్నాయి. టికెట్ ధరల పెంపు టెంప‌ర‌రీ క‌లెక్ష‌న్ల‌కు తోడ్పడినా, లాంగ్ ర‌న్ లో ఆడియ‌న్స్ రెస్పాన్స్ పై ఎలాంటి ప్రభావం చూపుతుందనేది ఇండ‌స్ట్రీ ఆలోచించాల్సిన అంశంగా మారింది.