ప్రపంచంలోనే అతిపెద్ద బ్యాటరీ ప్రాజెక్ట్ ప్రారంభం.. ఒకేసారి 10 లక్షల ఇళ్లకు పవర్!

భారతీయ వ్యాపార దిగ్గజం అదానీ గ్రూప్ (Adani Group) పునరుత్పాదక ఇంధన (Renewable Energy) రంగంలో సరికొత్త ప్రపంచ రికార్డు సృష్టించింది. గ్లోబల్ గ్రీన్ ఎనర్జీ మార్కెట్లో చైనా గుత్తాధిపత్యానికి గట్టి చెక్ పెడుతూ, అదానీ గ్రీన్ ఎనర్జీ లిమిటెడ్ (AGEL) ఒక అద్భుతాన్ని ఆవిష్కరించింది. గుజరాత్‌లోని ఖవాడా వేదికగా చైనా వెలుపల ప్రపంచంలోనే అతిపెద్దదైన ‘బ్యాటరీ ఎనర్జీ స్టోరేజ్ సిస్టమ్‌’ (BESS)ను విజయవంతంగా అందుబాటులోకి తెచ్చినట్లు కంపెనీ అధికారికంగా ప్రకటించింది.

10 నెలల్లోనే రికార్డు సృష్టిస్తూ..
గుజరాత్ సరిహద్దుల్లోని ఖవాడాలో ఏర్పాటు చేసిన ఈ ప్లాంట్ ఏకంగా 3.37 గిగావాట్-అవర్ (GWh) బ్యాటరీ స్టోరేజ్ సామర్థ్యాన్ని కలిగి ఉంది. ఈ ప్రాజెక్ట్ నిర్మాణంలో అదానీ గ్రూప్ (Adani Group) చూపిన వేగం అంతర్జాతీయ నిపుణులను సైతం ముక్కున వేలేసుకునేలా చేసింది. గత మార్చి నెలలో కేవలం 1.37 గిగావాట్-అవర్ సామర్థ్యంతో ప్రారంభమైన ఈ ప్రాజెక్టును, కేవలం 10 నెలల రికార్డు సమయంలోనే 3.37 గిగావాట్-అవర్ స్థాయికి విస్తరించడం విశేషం. ఇంత తక్కువ కాలంలో ఇంత భారీ గ్లోబల్ ప్రాజెక్ట్‌ను పూర్తి చేయడం ప్రపంచ గ్రీన్ ఎనర్జీ చరిత్రలోనే అత్యంత అరుదైన మైలురాయి.

ఒక్క రోజులో 10 లక్షల ఇళ్లకు వెలుగులు!
ఈ భారీ బ్యాటరీ స్టోరేజ్ సిస్టమ్ సామర్థ్యం ఏ స్థాయిలో ఉంటుందో వివరిస్తూ కంపెనీ ఎగ్జిక్యూటివ్ డైరెక్టర్ సాగర్ అదానీ (Adani Group) కీలక విషయాలు వెల్లడించారు. ఈ ప్లాంట్‌లో నిల్వ ఉంచే విద్యుత్‌తో అక్షరాలా 10 లక్షల ఇళ్లకు ఒక రోజంతా నిరంతరాయంగా పవర్ సప్లై చేయవచ్చు. అంతేకాకుండా, ఏకకాలంలో 1.2 కోట్లకు పైగా ఎల్‌ఈడీ (LED) బల్బులను వరుసగా 10 గంటల పాటు వెలిగించగల అపారమైన శక్తి ఈ బ్యాటరీల సొంతం.

సూర్యరశ్మి ద్వారా వచ్చే సోలార్ పవర్, గాలుల ద్వారా వచ్చే విండ్ ఎనర్జీ.. ఈ రెండింటి కలయికతో ఉత్పత్తి అయ్యే విద్యుత్‌ను గ్రిడ్‌లో వృధా కాకుండా ఈ అత్యాధునిక ప్లాంట్‌లో నిల్వ చేస్తారు. ఆ తర్వాత పీక్ అవర్స్‌లో ఈ విద్యుత్‌ను ప్రజల అవసరాల కోసం గ్రిడ్‌కు సరఫరా చేస్తారు. అంతర్జాతీయ ప్రమాణాలతో, పూర్తి సురక్షితమైన సాంకేతికతతో ఈ గ్లోబల్ ప్రాజెక్ట్‌ను నిర్మించినట్లు సాగర్ అదానీ (Adani Group) స్పష్టం చేశారు.

2029 నాటికి 30 గిగావాట్లు!
అదానీ గ్రీన్  (Adani Group) ఎనర్జీ కేవలం ఈ రికార్డుతోనే ఆగిపోవడం లేదు. రాబోయే 2029 నాటికి గుజరాత్‌లోని ఖవాడా ప్రాంతాన్ని ప్రపంచంలోనే అతిపెద్ద క్లీన్ ఎనర్జీ పార్క్‌గా మార్చాలనేది అదానీ మాస్టర్ ప్లాన్. అక్కడ ఏకంగా 30 గిగావాట్ల (GW) పునరుత్పాదక ఇంధన సామర్థ్యాన్ని అభివృద్ధి చేయాలనే భారీ లక్ష్యంతో కంపెనీ అహర్నిశలూ శ్రమిస్తోందని సాగర్ అదానీ వెల్లడించారు. విదేశీ బొగ్గు దిగుమతులపై ఆధారపడటాన్ని తగ్గిస్తూ, స్వచ్ఛమైన హరిత ఇంధనంతో భారతదేశాన్ని స్వయంసమృద్ధ దేశంగా మార్చడంలో అదానీ గ్రూప్ వేస్తున్న ఈ అడుగులు నిజంగానే దేశ ఆర్థిక వ్యవస్థకు కొత్త వెలుగులు ఇవ్వనున్నాయి.