విశ్వంభరకు ఏమైంది..? మెగాస్టార్ ఫ్యాన్స్‌ను టెన్షన్ పెడుతున్న సైలెన్స్!

మెగాస్టార్ చిరంజీవి(Chiranjeevi) కెరీర్‌లో అత్యంత ప్రతిష్టాత్మకంగా ప్రారంభమైన సోషియో ఫాంటసీ మూవీ విశ్వంభ‌ర‌(Vishwambhara)పై అభిమానుల్లో మొదట కనిపించిన హైప్ ఇప్పుడు క్రమంగా ఆందోళనగా మారుతోంది. డైరెక్ట‌ర్ వ‌శిష్ఠ‌(Vassishta) తెరకెక్కిస్తున్న ఈ భారీ విజువల్ డ్రామా చాలా కాలం క్రితమే షూటింగ్ పూర్తి చేసుకున్నప్పటికీ, రిలీజ్ డేట్ విషయంలో మాత్రం ఇంకా స్పష్టత రాకపోవడం చర్చనీయాంశంగా మారింది. ఒకవైపు మెగాస్టార్ నటించిన గ‌త సినిమా భారీ విజయాన్ని అందుకోవడం, మరోవైపు తాజాగా డైరెక్ట‌ర్ బాబీ(Bobby)తో కొత్త సినిమా వేగంగా షూటింగ్ జరుపుకుంటుండటంతో విశ్వంభరపై ఫోకస్ తగ్గిపోతుందనే అభిప్రాయం ఇండస్ట్రీ వర్గాల్లో వినిపిస్తోంది.

మొద‌టి నుంచే ఈ సినిమాపై భారీ అంచనాలు నెలకొన్నాయి. మెగాస్టార్‌ను పూర్తిగా కొత్త ఫాంటసీ ప్రపంచంలో చూపించబోతున్నారని ప్రచారం రావడం, భారీ వీఎఫ్ఎక్స్(VFX) వర్క్, పాన్ ఇండియా స్థాయి నిర్మాణం వంటి అంశాలు సినిమాపై ఆసక్తిని పెంచాయి. అయితే అనుకున్న సమయానికి రిలీజ్ కాకపోవడం, సమ్మర్ రిలీజ్ ప్లాన్ కూడా అమలు కాకపోవచ్చన్న సంకేతాలు రావడంతో అభిమానుల్లో అసహనం పెరుగుతోంది. ముఖ్యంగా సోషల్ మీడియాలో సినిమా స్టేటస్ ఏమైంది? అనే ప్రశ్నలు ఎక్కువగా కనిపిస్తున్నాయి.

ఇప్పటికీ మేక‌ర్స్ నుంచి అధికారిక అప్డేట్ లేకపోవడం మరో ప్రధాన చర్చగా మారింది. కనీసం రిలీజ్ టైమ్‌లైన్ అయినా ప్రకటిస్తే అభిమానులు కూడా మానసికంగా సిద్ధమవుతారని సినీ విశ్లేషకులు అభిప్రాయపడుతున్నారు. భారీ బడ్జెట్ సినిమాల్లో పోస్ట్ ప్రొడక్షన్, విజువల్ ఎఫెక్ట్స్ పనులు ఎక్కువ సమయం తీసుకోవడం సహజమే అయినప్పటికీ, పూర్తిస్థాయి క్లారిటీ లేకపోవడం మాత్రం విశ్వంభర హైప్‌పై ప్రభావం చూపుతున్నట్టే కనిపిస్తోంది.