Green card: అతిథుల్లా  ప్రవర్తించాలి.. లేదంటే గ్రీన్‌కార్డు

అధ్యక్షుడు డొనాల్డ్‌ ట్రంప్‌ (Donald Trump) కఠిన వలస విధానాలు భారతీయులతో సహా అమెరికాలోని వేలాది మంది గ్రీన్‌కార్డు (Green card) హోల్డర్లలో గుబులు రేపుతున్నాయి. వలసదారులు అమెరికాలో అతిథుల్లా (Guests) ప్రవర్తించాలని ట్రంప్‌ సర్కారు తాజాగా హితవు పలికింది.  లేదంటే గ్రీన్‌కార్డు కోల్పోతారు. అంతేకాదు, దేశం నుంచి బహిష్కరణకు గురువుతారు అంటూ హెచ్చరించింది. గ్రీన్‌కార్డుదారులు అమెరికా చట్టాలు, విలువలకు కట్టుబడి ఉండాల్సిందేనని స్పష్టం చేసింది.  శావ్వత నివాస హక్కు రద్దుకు దారితీసే కారణాల  జాబితాను యూఎస్‌ సిటిజన్‌షిప్‌ అండ్‌ ఇమిగ్రేషన్‌ సర్వీసెస్‌ (యూఎస్‌సీఐఎస్‌) విడుదల చేసింది. విదేశీయులు చట్టాన్ని ఉల్లంఘిస్తే గ్రీన్‌ కార్డులు, వీసాలు (Visas) రద్దు చేస్తామని తెలిపింది. అమెరికా చట్టాలను, విలువలను గౌరవించాలి. హింసను సమర్థిస్తే, ఉగ్రవాద కార్యకలాపాలకు మద్దతిస్తే, అలా చేయాల్సిందిగా ఇతరులను ప్రోత్సహిస్తే అమెరికాలో ఉండటానికి అర్హులు కాదు. గ్రీన్‌కార్డుదులను కూడా కఠినంగా తనిఖీ చేయడానికి ఏజెన్సీలకు  అధికారముంది. డిపార్ట్‌మెంట్‌ ఆఫ్‌ హోంల్యాండ్‌ సెక్యూరిటీతో కలిసి దీనిపై నిరంతరం పనిచేస్తున్నాం. అమెరికాకు మళ్లీ సురక్షితంగా తీర్చిదిద్దడానికి ఈ అప్రమత్తత చాలా అవసరం అని యూఎస్‌సీఐఎస్‌ (USCIS)  పేర్కొంది.  ఈ విధానాలను ప్రకటించిన అనంతరం విదేశాంగ మంత్రి మార్కో రూబియో (Marco Rubio)  మాట్లాడారు. అమెరికా ఔదార్యాన్ని దుర్వినియోగం చేసే శకం ముగిసిందన్నారు. ట్రంప్‌ సర్కారు తాజా హెచ్చరికలు గ్రీన్‌కార్డుల్లో అందోళనలను మరింత పెంచుతున్నాయి.