అమెరికా ప్రతినిధుల సభలో.. అంబేద్కర్ గౌరవార్థం తీర్మానం

వాషింగ్టన్: భారత రాజ్యాంగ నిర్మాత డాక్టర్​ బి.ఆర్.​​ అంబేద్కర్​ 130వ జయంతి సందర్భంగా అమెరికాలో అరుదైన ఘటన చోటుచేసుకుంది. అగ్రరాజ్యపు ప్రతినిధుల సభలో భారతీయ అమెరికన్​ కాంగ్రెస్ సభ్యుడు రోహ్ ఖన్నా.. అంబేద్కర్ గౌరవార్థం ఒక తీర్మానం ప్రవేశపెట్టారు. ఆయన ఇలా తీర్మానం చేయడం ఇది రెండోసారి కావడం గమనార్హం. ప్రపంచ దేశాల్లోని యువనేతలు అంబేద్కర్​​ చూపిన సమానత్వ మార్గాన్ని చూసి స్ఫూర్తి పొందాలని ఈ సందర్భంగా ఖన్నా చెప్పారు. ఈ సందర్భంగా మాట్లాడిన ఖన్నా.. “అంబేద్కర్​ గౌరవార్థం ఆయన 130వ జయంతి సందర్భంగా ఇవాళ నేను మరోసారి తీర్మానం ప్రవేశపెడుతున్నాను. ప్రపంచ వ్యాప్తంగా ఉన్న యువనేతలు అంబేద్కర్​​ చూపించిన సమానత్వం మార్గం నుంచి ప్రేరణ పొందాలని ఆశిస్తున్నా. దళితుడైన అంబేద్కర్​​ రచించిన భారత రాజ్యాంగం ద్వారా నేడు ఎంతో మంది భారతీయులు తమ హక్కులను కాపాడుకుంటున్నారు” అని తెలిపారు. అలాగే వైశాఖి పండుగ విశిష్టతను గుర్తించాలంటూ జాన్ ​గారమేండి అనే కాంగ్రెస్ సభ్యుడు ప్రతినిధుల సభలో మరో తీర్మానం ప్రవేశపెట్టారు. ఈ పండుగకు గల చారిత్రాత్మక, సాంస్కృతిక, మతపరమైన ప్రాముఖ్యతను గౌరవించాలని గారమేండి కోరారు. అమెరికా చట్ట సభలో సిక్కు సామాజిక వర్గానికి జాన్ ​గారమేండి ప్రాతినిధ్యం వహిస్తున్నారు.