నా జీవితంలో దక్కిన గొప్ప గౌరవం ఇది : జో బైడెన్‌

అమెరికా అధ్యక్షుడు జో బైడెన్‌ వెటరన్స్‌ డే సర్వీస్‌ కార్యక్రమంలో సాయుధ దళాల్లో సేవలందించి అమరులైన వారిని గుర్తు చేసుకుంటూ భావోద్వేగానికి గురయ్యారు. గాడ్‌ బ్లెస్‌ అమెరికా పాట ఆలపిస్తూ కంటతడి పెట్టారు. అధ్యక్ష  ఎన్నికల ఫలితాలు వెలువడిన తర్వాత జో బైడెన్‌, ఉపాధ్యక్షురాలు కమలా హారిస్‌ తొలిసారి ఈ కార్యక్రమంలో పాల్గొన్నారు. ఈ సందర్బంగా బైడెన్‌ మాట్లాడుతూ నేను  కమాండర్‌ చీఫ్‌ హోదాలో ఇక్కడ నిలబడడం ఇదే చివరిసారి. నా జీవితంలో దక్కిన గొప్ప గౌరవం ఇది అని అన్నారు. తన కుమారుడు, మాజీ  డెలావేర్‌ అటార్నీ జనరల్‌ బ్యూ బైడెన్‌ను గుర్తు చేసుకున్నారు. మా కుమారుడు కూడా ఇరాక్‌లో ఏడాది పాటు పని చేశాడు. ఆ రోజు నాకు బాగా గుర్తుంది. తను అలా గంబీరంగా నిలబడి, తనకు బ్యాడ్జీలు పెట్టమని అడగడం చూసి నేను, జిల్‌ ఎంతో గర్వంగా ఫీలయ్యాం అని అన్నారు. 2015లో గ్లియోబ్లాస్టోమాతో బ్యూ బైడెన్‌ ప్రాణాలు కోల్పోయారు.