White House: ట్రంప్ ఆర్డర్స్.. ఏకబిగిన డజన్లకొద్దీ ఆదేశాలు..

అమెరికా అధ్యక్షుడిగా డొనాల్డ్‌ ట్రంప్‌(Donald Trump) పదవి చేపట్టగానే.. తనదైన స్టైల్‌లో పాలన మొదలుపెట్టారు. ఏకంగా డజన్ల కొద్దీ ఎగ్జిక్యూటివ్‌(Executive) ఆర్డర్లపై ఆయన సంతకం చేశారు. తొలి ఎనిమిది ఆదేశాలపై సంతకం చేసిన అనంతరం పెన్నును జనంలోకి విసిరేసి ఉత్సాహపర్చారు. దీంతోపాటు మాజీ అధ్యక్షుడు బైడెన్‌ జారీ చేసిన 78 ఆదేశాలను ట్రంప్‌ వెనక్కి తీసుకొన్నారు. ప్యారిస్‌ పర్యావరణ ఒప్పందం నుంచి వైదొలగడం, వాక్‌ స్వేచ్ఛకు రక్షణ, జీవన వ్యయాల సంక్షోభంపై దృష్టిపెట్టాలని అన్ని ఏజెన్సీలకు మార్గదర్శకాలు, ప్రభుత్వ ఉద్యోగులు కచ్చితంగా కార్యాలయాలకు వచ్చి విధుల్లో హాజరుకావాలన్న ఆదేశాలు ఉన్నాయి. అంతేకాదు.. కెనడా, మెక్సికోలపై ఫిబ్రవరి 1వ తేదీ నుంచి 25శాతం అదనపు సుంకాలు విధించనున్నట్లు ట్రంప్‌ అల్టిమేటమ్‌ జారీ చేశారు.

ప్రపంచ ఆరోగ్య సంస్థ నుంచి అమెరికా వైదొలగింది. ఈమేరకు ట్రంప్‌ నిర్ణయం తీసుకొన్నారు. కొవిడ్‌ వ్యాప్తి సమయంలో ఈ సంస్థ బాధ్యతారాహిత్యంగా ప్రవర్తించిదని ఆగ్రహంగా ఉన్న ట్రంప్‌ ఈమేరకు నిర్ణయం తీసుకొన్నారు. కృత్రిమ మేధ విస్తరణను నియంత్రిస్తూ బైడెన్‌ జారీ చేసిన ఆదేశాలను ట్రంప్‌ తొలగించారు. గత అధ్యక్షుడి ఆదేశాల మేరకు ఏఐ అభివృద్ధి , ప్రయోగాలపై నియంత్రణలు ఉండేవి. సరిహద్దు గోడ సామగ్రిని విక్రయించాలన్న బైడెన్‌ ఆదేశాలను ట్రంప్‌ వెనక్కి తీసుకొన్నారు. అమెరికాలోని కొన్ని రాష్ట్రాల్లో కొన్నాళ్లుగా ఈ గోడ సామగ్రిని వేలంలో విక్రయిస్తున్నారు.

చైనా కంపెనీ టిక్‌టాక్‌ అమెరికా విభాగాన్ని విక్రయించేందుకు ట్రంప్ సర్కారు 75 రోజుల సమయం ఇస్తూ నిర్ణయం తీసుకొంది. అమెరికాకు ఆ యాప్‌లో 50శాతం వాటా ఉండాలని ట్రంప్‌ ఈసందర్భంగా వ్యాఖ్యానించారు. వాస్తవానికి టిక్‌టాక్‌(Tiktok) పేరెంట్‌ కంపెనీకి దీనిని విక్రయించేందుకు జనవరి 19 వరకు గడువు ఇచ్చారు.

బైడెన్‌ కార్యవర్గం వాక్‌ స్వేచ్ఛపై నియంత్రణ విధించడాన్ని ట్రంప్‌ సీరియస్‌గా తీసుకొన్నారు. దీంతో డిపార్ట్‌మెంట్‌ ఆఫ్‌ జస్టిస్‌, డైరెక్టరేట్‌ ఆఫ్‌ నేషనల్‌ ఇంటెలిజెన్స్‌ విస్తృతంగా దర్యాప్తు చేయాలని ఆదేశాలు జారీ చేశారు. 2030 నుంచి విక్రయించే కొత్త కార్లలో కనీసం 50శాతం విద్యుత్తు వాహనాలు ఉండాలంటూ బైడెన్‌ తీసుకొన్న నిర్ణయాన్ని ట్రంప్‌ తొలగించారు.