వలస విధానాన్ని మార్చండి.. కాంగ్రెస్ కు బైడెన్ కార్యవర్గం సూచన

అమెరికాలో కాలం చెల్లిన వలస విధానాన్ని మార్చాలని కాంగ్రెస్‌కు బైడెన్‌ కార్యవర్గం సూచించింది. ఈ విషయాన్ని శ్వేతసౌధం వెల్లడించింది. ప్రస్తుత విధానంలో కొన్ని తాత్కాలిక వీసాలపై ఉన్న ఉద్యోగులు ఉపాధి కోల్పోతే, కొత్త ఉద్యోగం వెతుక్కోవడం, వేరే వీసా పొందడం, స్వదేశానికి వెళ్లడానికి కేవలం 60 రోజుల వ్యవధే ఉంటోంది. కాలం చెల్లిన దయనీయమైన వలస విధానాన్ని మార్చాలని ఇప్పటికే చాలాసార్లు కాంగ్రెస్‌కు చెప్పాం. 20 ఏళ్ల క్రితం మార్పులు జరిగిన తాత్కాలిక వీసా విధానం మొత్తాన్ని అప్‌డేట్‌ చేసే విషయంలో మేము చాలా స్పష్టంగా ఉన్నాం. కాంగ్రెస్‌ దాని పని అది పూర్తి చేసి చట్టాన్ని ఆమోదించాల్సిన అవసరం ఉంది. ప్రస్తుతం మనం ఉన్న 21వ శతాబ్దానికి అనుగుణంగా వీసా విధానాలను మార్చాల్సిన అవసరముంది అని శ్వేత సౌధం మీడియా కార్యదర్శి కరీన్‌ జేన్‌  పేర్కొన్నారు. వలస విధానంలో మార్పులపై బైడెన్‌ చాలా పట్టుదలతో ఉన్నారని తెలిపారు.