ఇక షాపుల్లో మీకు ‘Energy Drink’ కనిపించదు. ప్రభుత్వ నిర్ణయం!

—సూర్య ప్రకాష్ జోశ్యుల

ఒక పదం…

దేశవ్యాప్తంగా కోట్ల బాటిళ్లపై ముద్రించబడింది.

కోట్లాది మంది అదే పేరును చూసి కొనుగోలు చేశారు.

కానీ ఇప్పుడు… ఆ ఒక్క పదమే వినియోగదారులను తప్పుదోవ పట్టించే అవకాశం ఉందని కేంద్రం భావిస్తోంది.

అసలు ఇన్నేళ్లు బాటిళ్లపై కనిపిస్తున్న ఆ పదంలో సమస్య ఏముంది?

ఈ ప్రశ్నకే ఇప్పుడు భారత ఆహార భద్రత, ప్రమాణాల సంస్థ (FSSAI) సమాధానం చెప్పింది. Red Bull, Sting, Monster, Hell Energy, Campa Energy Gold Boost వంటి ప్రముఖ బ్రాండ్లకు తమ ఉత్పత్తులపై “Energy Drink” అనే పదాన్ని 90 రోజుల్లో తొలగించాలని ఆదేశించింది.

మొదటి చూపుకు ఇది చిన్న లేబుల్ మార్పులా అనిపించొచ్చు. కానీ FSSAI చెబుతున్న కారణం మాత్రం భిన్నంగా ఉంది. భారత ఆహార భద్రతా నిబంధనల్లో “Energy Drink” అనే పేరుతో ఎలాంటి అధికారిక ఉత్పత్తి వర్గీకరణ లేదని సంస్థ స్పష్టం చేస్తోంది. అలాంటప్పుడు ఆ పేరును బాటిళ్లపై ఉపయోగించడం వల్ల, అది ప్రభుత్వం గుర్తించిన ప్రత్యేక ఉత్పత్తి వర్గమని వినియోగదారులు భావించే అవకాశం ఉందని FSSAI అభిప్రాయపడుతోంది.

అందుకే కేవలం “Energy Drink” అనే పదానికే కాదు, “Boosts Energy”, “Enhances Focus”, “Vitalises Body and Mind” వంటి ఆరోగ్య ప్రయోజనాలను సూచించే క్లెయిమ్స్‌పైనా సంస్థ అభ్యంతరం వ్యక్తం చేసింది. తగిన శాస్త్రీయ ప్రమాణాలు, నిబంధనలకు అనుగుణంగా లేని ఇలాంటి వాదనలు వినియోగదారులను తప్పుదోవ పట్టించే ప్రమాదం ఉందని పేర్కొంది.

ఇటీవల ప్రముఖ పానీయాల తయారీ సంస్థలతో సమావేశమైన FSSAI, లేబుళ్లలో ఈ మార్పులు తప్పనిసరిగా చేయాలని స్పష్టం చేసింది. ఇందుకోసం 90 రోజుల గడువును కూడా ఇచ్చింది. పరిశ్రమ మాత్రం ఈ మార్పు వల్ల బ్రాండ్ల గుర్తింపుపై ప్రభావం పడుతుందని ఆందోళన వ్యక్తం చేస్తోంది.

అయితే వినియోగదారులు ఆందోళన చెందాల్సిన అవసరం లేదు. Red Bull, Sting, Monster వంటి డ్రింక్స్‌పై ఎలాంటి నిషేధం విధించలేదు. మారేది ఉత్పత్తి కాదు… బాటిల్‌పై కనిపించే పేరు, మార్కెటింగ్ విధానం మాత్రమే.

ఇప్పుడు అందరి దృష్టి ఒక్క విషయంపైనే ఉంది. ఏళ్లుగా మార్కెట్‌లో కనిపిస్తున్న “Energy Drink” అనే పదానికి బదులుగా, ఇకపై ఆ బాటిళ్లపై ఏ కొత్త పదం కనిపించబోతోంది?