వైసీపికి ఎంపీ సానా సతీష్ బాబు బహిరంగ సవాల్
- Published By: techteam
- July 29, 2026 / 12:35 PM IST
ఆంధ్రప్రదేశ్లో మెగా డీఎస్సీ భర్తీ, గత వైసీపి ప్రభుత్వ హయాంలో జరిగిన గ్రూప్-1 నియామకాలపై అధికార కూటమి, ప్రతిపక్షాల మధ్య రాజకీయ రచ్చ ముదిరింది. మెగా డీఎస్సీ నిర్వహణపై తప్పుడు ప్రచారాలు చేస్తున్న వైఎస్సార్ కాంగ్రెస్ పార్టీ (YSRCP) వైఖరిపై తెలుగుదేశం పార్టీ రాజ్యసభ సభ్యులు సానా సతీష్ బాబు తీవ్రస్థాయిలో విరుచుకుపడ్డారు. నిరుద్యోగుల జీవితాలతో ఆడుకున్న వైసీపి నేతలకు, మాజీ ముఖ్యమంత్రి జగన్ మోహన్ రెడ్డికి మెగా డీఎస్సీ గురించి మాట్లాడే కనీస నైతిక హక్కు లేదని ఆయన స్పష్టం చేశారు. ప్రభుత్వంపై బురదజల్లే తప్పుడు ప్రచారాలు మానుకుని, చేతనైతే మెగా డీఎస్సీపై బహిరంగ చర్చకు రావాలని వైసీపికి సవాల్ విసిరారు.
ముఖ్యమంత్రి చంద్రబాబు నాయుడు నేతృత్వంలోని కూటమి ప్రభుత్వం అధికారంలోకి వచ్చిన కేవలం 100 రోజుల్లోనే నిరుద్యోగ యువతకు ఇచ్చిన మాటను నిలబెట్టుకుందని సానా సతీష్ బాబు కొనియాడారు. రికార్డు స్థాయిలో 16,347 ఉపాధ్యాయ పోస్టుల భర్తీ ప్రక్రియను విజయవంతంగా పూర్తి చేసి నిరుద్యోగులకు కోర్టుల చుట్టూ తిరిగే తిప్పలు లేకుండా న్యాయం చేశారని గుర్తుచేశారు. ఈ మెగా డీఎస్సీ ద్వారా ఉద్యోగాలు సాధించిన 16 వేలకు పైగా అభ్యర్థులను, వారి కుటుంబాలను అవమానించేలా వైసీపి నేతలు తప్పుడు ఆరోపణలు చేయడం దుర్మార్గమని మండిపడ్డారు. పారదర్శకంగా జరిగిన ఈ ఉపాధ్యాయ నియామకాలపై అసత్యాలు ప్రచారం చేస్తే నిరుద్యోగ లోకం వైసీపికి తగిన బుద్ధి చెబుతుందని హెచ్చరించారు.
ఇదే సమయంలో గత వైసీపి ప్రభుత్వ హయాంలో ఆంధ్రప్రదేశ్ పబ్లిక్ సర్వీస్ కమిషన్ (APPSC) నిర్వహించిన గ్రూప్-1 నియామకాల్లో భారీ అక్రమాలు జరిగాయని ఎంపీ సానా సతీష్ బాబు ఆరోపించారు. అర్హులైన ఎంతోమంది ప్రతిభావంతులైన నిరుద్యోగులకు అన్యాయం చేస్తూ, తమకు నచ్చిన వారికి ఉద్యోగాలు ఇచ్చుకున్నారని విమర్శించారు. వైసీపి హయాంలో జరిగిన ఈ గ్రూప్-1 అక్రమాలపై సమగ్రంగా సెంట్రల్ బ్యూరో ఆఫ్ ఇన్వెస్టిగేషన్ (CBI) చేత విచారణ జరిపించాలని ఆయన డిమాండ్ చేశారు. విద్యా వ్యవస్థను, ఉద్యోగాల భర్తీని భ్రష్టు పట్టించిన వైసీపి నేతలు ఇప్పుడు బుకాయించడం హాస్యాస్పదంగా ఉందన్నారు.
