సీన్ రివర్స్! ఇప్పుడు అమెరికాలో భారత్ అతి పెద్ద ఇన్వెస్టర్?

–సూర్య ప్రకాష్ జోశ్యుల

“మా అబ్బాయికి అమెరికాలో ఉద్యోగం వచ్చింది…”

ఒకప్పుడు తెలుగు కుటుంబాల్లో ఈ ఒక్క మాటే పెద్ద సంబరం.

అమెరికా కంపెనీ హైదరాబాద్‌కు వస్తే వేల ఉద్యోగాలు వస్తాయని ఎదురు చూసిన రోజులు ఇంకా గుర్తున్నాయి. విదేశీ పెట్టుబడులు వస్తేనే దేశం ఎదుగుతుందని నమ్మిన కాలం కూడా గుర్తుంది. కానీ ఇప్పుడు కథ పూర్తిగా మారిపోయింది. ఇప్పుడు భారత కంపెనీలే అమెరికాలో పెట్టుబడులు పెడుతున్నాయి.

ఇది సోషల్ మీడియాలో వినిపించే గాసిప్ లాంటి నినాదం కాదు. ఐక్యరాజ్యసమితి వేదికగా అమెరికా ఉన్నత అధికారి చేసిన వ్యాఖ్య.

అమెరికా ప్రతినిధి అంబాసిడర్ డాన్ నెగ్రియా మాట్లాడుతూ… “భారత్ చాలా రంగాల్లో నాయకత్వం వహిస్తోంది. అమెరికాలో భారత పెట్టుబడులు పెరుగుతున్నాయి. రెండు దేశాల మధ్య అన్ని రంగాల్లో సన్నిహిత సహకారం ఉంది” అని వ్యాఖ్యానించారు.

ఈ వ్యాఖ్య ఒక వార్త మాత్రమే కాదు… గత మూడు దశాబ్దాల్లో భారత్ సాధించిన ఆర్థిక ప్రయాణానికి ప్రపంచం ఇచ్చిన గుర్తింపుగా కూడా చూడొచ్చు.

ఒకప్పుడు పెట్టుబడులు వచ్చేవి… ఇప్పుడు పెట్టుబడులు వెళ్తున్నాయి!

1991 ఆర్థిక సంస్కరణల తర్వాత భారత్ విదేశీ పెట్టుబడులను ఆకర్షించడానికి తీవ్రంగా ప్రయత్నించింది. అమెరికా, యూరప్, జపాన్ కంపెనీలు భారత్‌లోకి రావడం దేశ అభివృద్ధికి కీలకంగా మారింది. కానీ ఇప్పుడు పరిస్థితి మారుతోంది.

భారత కంపెనీలు కూడా విదేశాల్లో, ముఖ్యంగా అమెరికాలో, పెట్టుబడులు పెడుతున్నాయి. ఐటీ, స్టీల్, ఫార్మా, కెమికల్స్, తయారీ వంటి రంగాల్లో తమ వ్యాపారాన్ని విస్తరిస్తున్నాయి.

ఇది కేవలం డబ్బు ఒక దేశం నుంచి మరో దేశానికి వెళ్లడం కాదు. భారత కంపెనీలు ప్రపంచ మార్కెట్లలో పోటీ పడగల స్థాయికి చేరుకున్నాయనే సంకేతం.

అమెరికా ఎందుకు ప్రత్యేకంగా భారత్‌ను ప్రస్తావించింది?

డాన్ నెగ్రియా వ్యాఖ్యల్లో ఎక్కువగా చర్చకు వచ్చిన అంశం ఒకటే. ఆయన ప్రకారం, భారత్ అమెరికాతో అన్ని రంగాల్లో సన్నిహిత భాగస్వామ్యాన్ని కొనసాగిస్తోంది. భారత్ వద్ద విదేశాల్లో కూడా పెట్టుబడులు పెట్టగలిగే మూలధనం ఉందని, అమెరికాలో భారత పెట్టుబడులు పెరుగుతున్నాయని ఆయన పేర్కొన్నారు.

ఇది దౌత్యపరమైన మర్యాద మాత్రమే కాదు. ప్రపంచంలో వేగంగా ఎదుగుతున్న ఆర్థిక వ్యవస్థల్లో భారత్ ఒకటిగా అమెరికా చూస్తోందనే సంకేతంగా కూడా దీన్ని విశ్లేషకులు భావిస్తున్నారు.

అమెరికాలో భారత కంపెనీల ప్రభావం ఎలా పెరుగుతోంది?

ఈ వ్యాఖ్యలకు కారణం కూడా ఉంది. TCS, Infosys, Wipro, HCL వంటి భారత ఐటీ కంపెనీలు అమెరికాలో వేలాది మందికి ఉద్యోగాలు కల్పిస్తున్నాయి. టాటా గ్రూప్, ఆదిత్య బిర్లా గ్రూప్, సన్ ఫార్మా, డాక్టర్ రెడ్డీస్ వంటి భారత సంస్థలు కూడా అమెరికా మార్కెట్లో తమ ఉనికిని విస్తరించాయి. అంటే…ఒకప్పుడు అమెరికా కంపెనీలు భారత్‌లో అవకాశాలు వెతికాయి. ఇప్పుడు భారత కంపెనీలు కూడా అమెరికాలో అవకాశాలను సృష్టిస్తున్నాయి.

“అమెరికాలో పెట్టుబడులు పెడితే… మనకు ఏం లాభం?”

ఇది చాలా మంది అడిగే ప్రశ్న. జవాబు కూడా అంతే సులభం. భారత కంపెనీలు విదేశాల్లో లాభాలు ఆర్జిస్తే…భారత్‌లో కొత్త పెట్టుబడులు పెట్టే అవకాశం పెరుగుతుంది. పరిశోధన, టెక్నాలజీ, తయారీ రంగాల్లో విస్తరణకు ఊతం లభిస్తుంది. ఐటీ, ఇంజినీరింగ్, మేనేజ్‌మెంట్ వంటి రంగాల్లో భారత నిపుణులకు మరిన్ని అంతర్జాతీయ అవకాశాలు లభించవచ్చు.భారత కంపెనీల గ్లోబల్ బ్రాండ్ విలువ పెరుగుతుంది.
ప్రపంచ పెట్టుబడిదారుల్లో భారత్‌పై విశ్వాసం మరింత బలపడే అవకాశం ఉంటుంది.

అంటే అమెరికాలో జరిగిన పెట్టుబడి… దీర్ఘకాలంలో భారత్‌లో ఉద్యోగాలు, వ్యాపార అవకాశాలు, సాంకేతిక అభివృద్ధికి కూడా దోహదపడే అవకాశం ఉంది.

పాకిస్థాన్‌పై పరోక్ష సందేశం

అదే సమావేశంలో పాకిస్థాన్‌కు అమెరికా సాయం గురించి ప్రశ్నించగా డాన్ నెగ్రియా మరో కీలక వ్యాఖ్య చేశారు. చట్టపాలన, రాజకీయ స్థిరత్వం, శాంతి లేకపోతే విదేశీ పెట్టుబడులు రావని ఆయన స్పష్టం చేశారు. ఉగ్రవాదం, యుద్ధ వాతావరణం ఉన్న దేశాల్లో పెట్టుబడిదారులు పెట్టుబడులు పెట్టరని పేర్కొన్నారు. పాకిస్థాన్ పేరు నేరుగా ప్రస్తావించకపోయినా, ఆ ప్రశ్నకు ఇచ్చిన సమాధానం ఆ దేశ పరిస్థితులపై కూడా చర్చకు దారితీసింది.

“Aid కాదు… Trade”

ఈ సమావేశంలో అమెరికా మరో ముఖ్యమైన విధానాన్ని కూడా వివరించింది. ఇకపై అభివృద్ధి చెందుతున్న దేశాలకు కేవలం ఆర్థిక సాయం ఇవ్వడం కంటే… వాణిజ్యం, విదేశీ పెట్టుబడులు, ప్రైవేట్ భాగస్వామ్యాన్ని ప్రోత్సహించడంపైనే ఎక్కువ దృష్టి పెడుతున్నట్లు వెల్లడించింది. దీనినే అమెరికా “Trade Over Aid” గా పేర్కొంటోంది. అంటే… సాయం కంటే వ్యాపారమే దేశాలను దీర్ఘకాలంలో బలపరుస్తుందన్నది అమెరికా తాజా విధానం.

ఎందుకు ఇప్పుడు భారత్‌కే ఇంత ప్రాధాన్యం?

దీనికి అనేక కారణాలున్నాయి.

అమెరికా-చైనా వ్యూహాత్మక పోటీ.
ప్రపంచ ఎగుమతి,దిగుమతిలలో మార్పులు.
వేగంగా పెరుగుతున్న భారత ఆర్థిక వ్యవస్థ.
ఇండో-పసిఫిక్ ప్రాంతంలో భారత్ ప్రాధాన్యం.
ప్రపంచ మార్కెట్లలో భారత కంపెనీల విస్తరణ.

ఈ పరిణామాలన్నీ కలిసి భారత్‌ను కేవలం వినియోగదారుల మార్కెట్‌గా కాకుండా, ప్రపంచ ఆర్థిక వ్యవస్థలో కీలక భాగస్వామిగా నిలబెడుతున్నాయి.

ముగింపు:

ఒకప్పుడు “భారత్‌లో పెట్టుబడి పెట్టాలి” అని ప్రపంచం చెప్పేది. ఇప్పుడు “భారత్‌తో కలిసి పెట్టుబడులు పెట్టాలి” అని అమెరికానే చెబుతోంది. ప్రపంచ ఆర్థిక సమీకరణాలు మారుతున్నాయనడానికి ఇదే అతిపెద్ద సంకేతం. ఒకప్పుడు సాయం కోసం ఎదురుచూసిన భారత్, ఇప్పుడు ప్రపంచ సూపర్ పవర్ ఆర్థిక వ్యవస్థకు సైతం వెన్నుదన్నుగా నిలిచే స్థాయికి ఎదగడం దేశ ఆర్థిక ప్రగతికి అద్దం పడుతోంది.