Y.S Sharmila: వైఎస్ కుటుంబ ఆస్తుల వివాదం ..షర్మిల కౌంటర్‌తో కొత్త ట్విస్ట్..

వైఎస్ కుటుంబంలో (YS Family) ఇటీవలి కాలంలో నెలకొన్న ఆస్తుల వివాదం రాజకీయంగానే కాదు, న్యాయపరంగానూ ఆసక్తికరంగా మారింది. గతంలో ఎన్నడూ లేని విధంగా ఈ కుటుంబ వ్యవహారం బహిరంగ చర్చకు రావడం ప్రాధాన్యం సంతరించుకుంది. ఒకప్పుడు తన అన్న జగనన్నకు (Jagan) తానే బాణమని చెప్పుకున్న వైఎస్ షర్మిల (Y.S. Sharmila) ఇప్పుడు అదే కుటుంబ ఆస్తుల అంశంపై పోరాటానికి సిద్ధమవడం ఈ వివాదానికి ప్రత్యేకతగా మారింది.

సరస్వతి పవర్‌కు (Sarawsati Powers) సంబంధించిన వాటాల బదిలీపై తనపై వచ్చిన ఆరోపణలకు సమాధానం ఇవ్వాలని షర్మిల కీలక నిర్ణయం తీసుకున్నారు. ఈ అంశంపై తాను కౌంటర్ దాఖలు చేయాల్సిన అవసరం ఉందని భావించిన ఆమె, అందుకు తగిన సమయం ఇవ్వాలని న్యాయస్థానాన్ని కోరారు. దీంతో ప్రస్తుతం ఈ వివాదంపై విచారణ జరుపుతున్న జాతీయ కంపెనీ లా అప్పిలేట్ ట్రిబ్యునల్ (National Company Law Appellate Tribunal) ముందు ఆమె తన వాదనలను కౌంటర్ రూపంలో సమర్పించేందుకు సిద్ధమవుతున్నారు.

తన తండ్రి దివంగత వైఎస్ రాజశేఖర్ రెడ్డి (Y.S. Rajasekhara Reddy) ఆశయం ప్రకారం కుటుంబ ఆస్తులు నలుగురు మనవళ్లకు సమానంగా పంచాలన్నదే తన లక్ష్యమని షర్మిల గతంలోనే స్పష్టం చేశారు. అయితే ఆ దిశగా తన సోదరుడు వైఎస్ జగన్‌మోహన్ రెడ్డి (Y.S. Jagan Mohan Reddy) వ్యవహరించడంలేదని ఆమె ఆరోపణలు చేశారు. జగన్, భారతి రెడ్డి (Bharathi Reddy) పేర్లపై ఉన్న సరస్వతి పవర్ వాటాలు గిఫ్ట్ డీడ్ ద్వారా తన తల్లి విజయమ్మ (Y.S. Vijayamma)కు దక్కాయని, ఆ ప్రక్రియ చట్టబద్ధమేనని షర్మిల వాదన.

ఈ వివాదంలో కీలక మలుపు హైదరాబాద్‌లోని నేషనల్ కంపెనీ లా ట్రిబ్యునల్ (National Company Law Tribunal, Hyderabad) ఇచ్చిన తీర్పుతో ఏర్పడింది. షర్మిలకు బదిలీ అయిన వాటాలు చెల్లవని ఆ ట్రిబ్యునల్ పేర్కొనగా, ఆ తీర్పును సవాలు చేస్తూ ఆమె అప్పిలేట్ ట్రిబ్యునల్‌ను ఆశ్రయించారు. ఈ కేసులో ప్రస్తుతం కోర్టు స్టేటస్ కోను కొనసాగించాలని ఆదేశాలు జారీ చేసింది.

ఇప్పటివరకు జరిగిన పరిణామాలను పరిశీలిస్తే, 2019 ఆగస్టు 31న జగన్, షర్మిల మధ్య కుదిరిన అవగాహన ఒప్పందం కీలకంగా నిలుస్తోంది. అక్రమాస్తుల కేసులు ముగిసిన తరువాత సరస్వతి పవర్ వాటాలను బదిలీ చేస్తానని జగన్ అప్పట్లో హామీ ఇచ్చినట్లు తెలుస్తోంది. 2021లో వాటాలను విజయమ్మకు గిఫ్ట్ డీడ్ ద్వారా బదిలీ చేయడం తాత్కాలిక ఏర్పాటేనని, పూర్తిస్థాయి బదిలీ తరువాత జరుగుతుందని అప్పట్లో వివరణ ఇచ్చారు.

అయితే రాజకీయంగా షర్మిల తనను వ్యతిరేకించడంతో అసలు షేర్ సర్టిఫికేట్లు లేకుండానే వాటాల బదిలీ జరిగిందని జగన్ ఆరోపించారు. గిఫ్ట్ డీడ్ ప్రేమాభిమానాలతో ఇచ్చినదేనని, అవసరమైతే దాన్ని ఉపసంహరించుకునే హక్కు తనకుందని ఆయన వాదన. ఈ అంశాలనే ఆధారంగా తీసుకుని మొదటి ట్రిబ్యునల్ తీర్పు ఇచ్చింది. దీనికి భిన్నంగా, గిఫ్ట్ డీడ్‌లు లేదా ఎంవోయూలను ఎప్పుడూ రద్దు చేయలేదని, వాటాల బదిలీ చట్టబద్ధంగానే జరిగిందని షర్మిల వాదిస్తున్నారు. ఇప్పటికే విజయమ్మ అఫిడవిట్ దాఖలు చేయగా, మార్చి 17న షర్మిల తన కౌంటర్ సమర్పించనున్నారు. ఆ తరువాత ఈ వివాదంపై తుది నిర్ణయం వెలువడే అవకాశం ఉందని న్యాయ వర్గాలు భావిస్తున్నాయి.