వైసీపీపై విజయసాయి సంచలన కామెంట్స్..!

గత కొన్ని రోజులుగా తెలుగు రాష్ట్రాల్లో అత్యంత వివాదాస్పదంగా మారిన.. ప్రశ్న రావణ్(Prashna Ravan) వ్యవహారంపై ఇప్పుడు సర్వత్రా చర్చ మొదలైంది. రాజకీయంగా ఈ వ్యవహారాన్ని తమకు అనుకూలంగా మార్చుకునే ప్రయత్నం వైసీపీ చేస్తోన్న సంగతి తెలిసిందే. ఈ తరుణంలో సోషల్ మీడియా యాక్టివిస్ట్ జోసెఫ్ రావణ్, సినీ నటుడు ప్రకాష్ రాజ్ వ్యవహరిస్తున్న తీరుపై మాజీ ఎంపీ విజయసాయిరెడ్డి తీవ్ర స్థాయిలో ధ్వజమెత్తారు. హిందూ సనాతన ధర్మాన్ని, సంస్కృతిని కించపరిచేలా ప్రవర్తిస్తున్న వీరి వెనుక అసలు ఎవరున్నారని ఆయన ప్రశ్నించారు.

సమాజంలో ఇలాంటి మతపరమైన విద్వేషాలను రేకెత్తిస్తున్న రావణ్, ప్రకాష్ రాజ్‌ల చర్యలను వైఎస్సార్ కాంగ్రెస్ పార్టీ (YCP) సమర్థించడం అత్యంత దురదృష్టకరమని, ఇది ముమ్మాటికీ హిందూత్వంపై జరుగుతున్న దాడేనని ఆయన సంచలన వ్యాఖ్యలు చేశారు. ఈ విద్వేషపూరిత ధోరణిని తీవ్రంగా ఖండించాల్సిన అవసరం ఉందని ఆయన పిలుపునిచ్చారు. హిందూ సమాజ మనోభావాలను దెబ్బతీస్తూ, మత విద్వేషాలను రెచ్చగొట్టేలా సాగుతున్న ఇటువంటి వికృత భావాలను కేవలం సాధారణ వ్యాఖ్యలుగా కొట్టిపారేయలేమని విజయసాయిరెడ్డి స్పష్టం చేశారు.

వీటిని ఒక రకమైన ‘మతపరమైన ఉగ్రవాదం’గానే పరిగణించాల్సి ఉంటుందని ఆయన ఆందోళన వ్యక్తం చేశారు. సమాజంలో శాంతిభద్రతలకు భంగం కలిగిస్తూ, హిందూ సనాతన ధర్మంపై దాడికి దిగుతున్న ఇలాంటి శక్తుల పట్ల కఠినంగా వ్యవహరించకపోతే భవిష్యత్తులో తీవ్ర పరిణామాలు ఉంటాయని హెచ్చరించారు. శాంతియుత వాతావరణాన్ని చెడగొట్టేలా వ్యవహరిస్తున్న ఇటువంటి వ్యక్తులకు కేవలం చట్టం వేసే శిక్షలు మాత్రమే సరిపోవని, సమాజం కూడా వీరిని పూర్తిగా వెలివేసి తగిన బుద్ధి చెప్పాలని విజయసాయిరెడ్డి డిమాండ్ చేశారు. తెలుగు రాష్ట్రాల ప్రభుత్వాలతో పాటు, కేంద్ర ప్రభుత్వం కూడా ఈ వ్యవహారాన్ని తీవ్రంగా పరిగణించి, మత విద్వేషాలు రేపుతున్న వారిపై తక్షణమే కఠినమైన చట్టపరమైన చర్యలు తీసుకోవాలని విజ్ఞప్తి చేసారు.