New Districts: జిల్లా కాబోతున్న ఏపీ రాజధాని అమరావతి..!?

ఆంధ్రప్రదేశ్ లో జిల్లాల పేర్లు, సరిహద్దులు, రెవెన్యూ డివిజన్లు, మండలాల పునర్వ్యవస్థీకరణ కోసం రాష్ట్ర ప్రభుత్వం కీలక నిర్ణయం తీసుకుంది. ఈ మేరకు ఏడుగురు మంత్రులతో కూడిన కేబినెట్ సబ్ కమిటీని (cabinet sub committee) ఏర్పాటు చేసింది. ఈ కమిటీలో మంత్రులు అనగాని సత్యప్రసాద్, నారాయణ, అనిత, జనార్ధన్ రెడ్డి, నిమ్మల రామానాయుడు, నాదెండ్ల మనోహర్, సత్యకుమార్ సభ్యులుగా ఉన్నారు. జిల్లాలు, మండలాలు, గ్రామాల సరిహద్దులు, పేర్ల మార్పులపై ప్రజల విజ్ఞప్తులను పరిశీలించి, శాస్త్రీయ అధ్యయనం ఆధారంగా ఈ కమిటీ నివేదిక సిద్ధం చేయనుంది. ముఖ్యంగా రాజధాని అమరావతిని (amaravati) ఒక ప్రత్యేక జిల్లాగా ప్రకటించే అవకాశం ఉన్నట్లు సమాచారం.

2019 ఎన్నికల సమయంలో వైసీపీ అధినేత వై.ఎస్.జగన్‌మోహన్ రెడ్డి (YS Jagan), ప్రతి లోక్‌సభ నియోజకవర్గాన్ని ఒక జిల్లాగా ఏర్పాటు చేస్తామని హామీ ఇచ్చారు. ఆ హామీ మేరకు 2022 ఏప్రిల్ 4 నాటికి రాష్ట్రంలో ఉన్న 13 జిల్లాలను, 26 జిల్లాలుగా పునర్వ్యవస్థీకరించారు. ఈ ప్రక్రియలో పార్వతీపురం మన్యం, అల్లూరి సీతారామరాజు, అనకాపల్లి, కాకినాడ, కోనసీమ, ఎన్.టి.ఆర్, బాపట్ల, పల్నాడు, నంద్యాల, శ్రీ సత్యసాయి, అన్నమయ్య, తిరుపతి లాంటి కొత్త జిల్లాలు ఏర్పడ్డాయి. అయితే ఈ జిల్లాల ఏర్పాటు సమయంలో స్థానిక ప్రజల నుండి అనేక అభ్యంతరాలు వచ్చాయి. కొన్ని ప్రాంతాల్లో జిల్లా సరిహద్దులు, పేర్లు, పరిపాలనా సౌలభ్యం విషయంలో అసంతృప్తి వ్యక్తమైంది. అనంతపురం జిల్లాలో హిందూపూర్‌ను జిల్లాగా చేయాలని 350కి పైగా విజ్ఞప్తులు వచ్చాయి. అలాగే, ధర్మవరం, పెనుగొండను రెవెన్యూ డివిజన్‌లుగా చేయాలని డిమాండ్లు వచ్చాయి. ప్రకాశం జిల్లాలోని కందుకూరును నెల్లూరులో కలపొద్దని కొందరు డిమాండ్ చేశారు. మదనపల్లెను జిల్లా చేయాలనే డిమాండ్ తలెత్తింది. అయితే, వైసీపీ ప్రభుత్వం ఈ అభ్యంతరాలను పెద్దగా పరిగణనలోకి తీసుకోలేదు.

2024 ఎన్నికల సమయంలో టీడీపీ అధినేత చంద్రబాబు (Chandrababu), అధికారంలోకి వస్తే జిల్లాల పునర్వ్యవస్థీకరణను (districts reorganization) శాస్త్రీయంగా, ప్రజాభిప్రాయానికి అనుగుణంగా చేపడతామని ప్రకటించారు. అందుకు అనుగుణంగా, మంగళవారం రాష్ట్ర ప్రభుత్వం కేబినెట్ సబ్ కమిటీని ఏర్పాటు చేసింది. ఈ కమిటీ జిల్లాల సరిహద్దులు, పేర్లు, రెవెన్యూ డివిజన్లు, మండలాలపై సమగ్ర అధ్యయనం చేసి, ప్రజల నుండి సూచనలు, అభ్యంతరాలను స్వీకరించి, తగిన సిఫార్సులు చేయనుంది. ప్రస్తుతం రాష్ట్రంలో 26 జిల్లాలు, 77 రెవెన్యూ డివిజన్లు, 685 మండలాలు, 13,324 గ్రామ పంచాయతీలు ఉన్నాయి. ఈ కమిటీ ఈ అన్ని అంశాలపై సమీక్షించి, అవసరమైన మార్పులు, చేర్పులను సూచించనుంది.

జిల్లాల పునర్వ్యవస్థీకరణలో భాగంగా, రాజధాని అమరావతిని ఒక ప్రత్యేక జిల్లాగా ప్రకటించే అవకాశం ఉన్నట్లు సమాచారం. 2025 మే 8న జరిగిన కేబినెట్ సమావేశంలో, ఆంధ్రప్రదేశ్ రీఆర్గనైజేషన్ యాక్ట్-2014లో “నూతన రాజధాని” అనే పదాల స్థానంలో “అమరావతి” అనే పేరును చేర్చాలని కేంద్రాన్ని కోరుతూ ఒక తీర్మానం ఆమోదించారు. ఈ నిర్ణయం అమరావతికి చట్టబద్ధమైన గుర్తింపును ఇస్తుందని, దీనికి పార్లమెంటు ఆమోదం అవసరమని మంత్రి కె.పార్థసారథి వెల్లడించారు. అమరావతిని జిల్లాగా ప్రకటించడం ద్వారా రాజధాని ప్రాంత అభివృద్ధికి మరింత ప్రాధాన్యత లభిస్తుందని భావిస్తున్నారు. ఈ ప్రతిపాదన వరల్డ్ బ్యాంక్, ఆసియా డెవలప్‌మెంట్ బ్యాంక్ (ఏడీబీ) నిధులతో అమరావతి అభివృద్ధి ప్రాజెక్టులకు మరింత ఊతం ఇస్తుందని అంచనా.

కేబినెట్ సబ్ కమిటీ జిల్లాల పునర్వ్యవస్థీకరణను శాస్త్రీయంగా, ప్రజాభిప్రాయాన్ని గౌరవిస్తూ చేపట్టాలని నిర్ణయించింది. గతంలో వైసీపీ ప్రభుత్వం జిల్లాల ఏర్పాటును లోక్‌సభ నియోజకవర్గాల ఆధారంగా చేపట్టినప్పటికీ, కొన్ని ప్రాంతాల్లో స్థానిక అవసరాలు, భౌగోళిక సౌలభ్యం పరిగణనలోకి తీసుకోలేదనే విమర్శలు వచ్చాయి. ఉదాహరణకు, అరకు లోక్‌సభ నియోజకవర్గాన్ని పార్వతీపురం మన్యం, పాడేరు జిల్లాలుగా విభజించారు. ఇప్పుడు ఈ కమిటీ స్థానిక అవసరాలను, పరిపాలనా సౌలభ్యాన్ని దృష్టిలో ఉంచుకుని మార్పులు చేయనుంది. ఈ ప్రక్రియలో ప్రజల నుండి సూచనలు, అభ్యంతరాలను స్వీకరించి, వాటిని నివేదికలో చేర్చనున్నారు. ఈ ప్రక్రియ రాష్ట్రంలో పరిపాలనా సామర్థ్యాన్ని, అభివృద్ధిని మరింత పెంపొందించే దిశగా ఒక ముందడుగుగా భావించవచ్చు.