14 మందితో జనసేన కీలక కమిటీ.. స్థానిక పోరుకు పవన్ వ్యూహం..
- Published By: Bhuvana
- August 22, 2026 / 08:25 AM IST
ఆంధ్రప్రదేశ్లో (Andhra Pradesh) త్వరలో జరగనున్న స్థానిక సంస్థల ఎన్నికల నేపథ్యంలో జనసేన పార్టీ (Jana Sena Party) కీలకంగా అడుగులు వేస్తోంది. క్షేత్రస్థాయిలో పార్టీ పరిస్థితి, కార్యకర్తల అభిప్రాయాలు, ఎన్నికల వ్యూహంపై సమగ్ర సమాచారం సేకరించేందుకు 14 మంది సభ్యులతో ప్రత్యేక కమిటీని ఏర్పాటు చేసింది. ఈ కమిటీకి అవనిగడ్డ ఎమ్మెల్యే, సీనియర్ నాయకుడు మండలి బుద్ధప్రసాద్ (Mandali Buddha Prasad) నేతృత్వం వహించనున్నారు. పార్టీ అధ్యక్షుడు పవన్ కల్యాణ్ (Pawan Kalyan) పేరుతో పార్టీ కార్యాలయం ఈ మేరకు ప్రకటన విడుదల చేసింది.
కమిటీలో పార్టీకి చెందిన పలువురు సీనియర్ నాయకులు, ప్రజాప్రతినిధులకు చోటు కల్పించారు. టి. శివశంకర్ , మంత్రి కందుల దుర్గేష్ , మచిలీపట్నం ఎంపీ వల్లభనేని బాలశౌరి , ఎమ్మెల్యేలు బొలిశెట్టి శ్రీనివాస్ , దేవ వరప్రసాద్ , వంశీకృష్ణ యాదవ్ , లోకం మాధవి , పత్సమట్ల ధర్మరాజు , సీనియర్ నేతలు చిలకం మధుసూదన్ రెడ్డి , కొటికలపూడి గోవిందరావు (చినబాబు), సామినేని ఉదయభాను , యనమల భాస్కర్ , కొరికాన రవి కుమార్ ఈ బృందంలో ఉన్నారు.
స్థానిక ఎన్నికల విషయంలో జనసేన పార్టీకి ఉన్న ప్రాధాన్యతను ఈ కమిటీ ఏర్పాటు స్పష్టం చేస్తోంది. గ్రామాలు, మండలాలు, పట్టణాల్లో పార్టీ బలాబలాలు ఎలా ఉన్నాయి? కార్యకర్తల పరిస్థితి ఏమిటి? ఎక్కడ పార్టీకి అనుకూల వాతావరణం ఉంది? ఎక్కడ మరింత బలోపేతం కావాలి? వంటి అంశాలను సభ్యులు క్షేత్రస్థాయిలో పరిశీలించనున్నారు. ముఖ్యంగా చాలాకాలంగా పార్టీ కోసం పనిచేస్తున్న కార్యకర్తల అభిప్రాయాలను తెలుసుకోవడంపై దృష్టి పెట్టనున్నారు.
ఎన్నికల విధివిధానాలను కార్యకర్తలకు వివరించడంతో పాటు పార్టీ అధ్యక్షుడి ఆలోచనా విధానం, కూటమి ధర్మం గురించి కూడా వారికి అవగాహన కల్పించనున్నారు. స్థానిక పరిస్థితులను బట్టి పార్టీ నాయకులు, కార్యకర్తల మధ్య సమన్వయం పెంచడం కూడా కమిటీ బాధ్యతల్లో ఒకటిగా ఉండనుంది.
అంతేకాకుండా జనసేనలోని వివిధ విభాగాలతో కమిటీ సభ్యులు సమావేశమై అక్కడి పరిస్థితులను తెలుసుకోనున్నారు. ఆయా విభాగాల నుంచి వచ్చిన సూచనలు, క్షేత్రస్థాయి నాయకుల అభిప్రాయాలు, కార్యకర్తల మనోభావాలను సమగ్రంగా పరిశీలించిన తర్వాత నివేదికను రూపొందించనున్నారు. స్థానిక ఎన్నికల్లో ఏ సామాజిక, రాజకీయ వర్గాలకు ఎలాంటి ప్రాధాన్యం ఇవ్వాలి, అభ్యర్థుల ఎంపికలో ఎలాంటి అంశాలను పరిగణనలోకి తీసుకోవాలి వంటి విషయాలను కూడా నివేదికలో పొందుపరిచే అవకాశం ఉంది.
ఈ కమిటీ ఇచ్చే సమాచారం ఆధారంగా స్థానిక సంస్థల ఎన్నికల్లో జనసేన అనుసరించాల్సిన వ్యూహంపై పవన్ కల్యాణ్ తుది నిర్ణయం తీసుకునే అవకాశం ఉంది. దీంతో ఈ కమిటీ కేవలం అభిప్రాయ సేకరణకే పరిమితం కాకుండా పార్టీ భవిష్యత్ ఎన్నికల కార్యాచరణకు కీలకమైన పునాదిగా మారనుంది. క్షేత్రస్థాయి వాస్తవాలను నేరుగా తెలుసుకుని నిర్ణయాలు తీసుకోవాలనే జనసేన ప్రయత్నంగా దీనిని రాజకీయ వర్గాలు చూస్తున్నాయి.
